ZCD Party in tulaitak Challenging Moment pen Great Opportunity in ihsang zodinghiam

ZCD Party in tulaitak a Challenging Moment pen Great Opportunity in ihsang zoding hiam! (Corona Virus ahilo, Gam leh Minam Maban) ~ GS Khup

ZCD Party Ngimna Bulpite leh Thumeilette sung ah;

• (1) Zomi Min (Zomi Identity) tawh hong kiciapteh theihna ding,
• (2) Kawl Gam pen Federal Union tawh a kilam zawhna ding,
• (3) Panglong Thukimna (Self Determination) a taksuak zawhna ding,
• (4) Gambup Thukhunpi (Constitution) laih ding,

… cih thu bulpite kihel hi.

ZCD Party Dinmun

ZCD Party Policy pen a tung a Thubulpi Li hi phadiak in ka thei hi. Kiteelpi a kilut ciangin taangpi tung ah atung a Policy tengmah taangko in Vote kingen hi. Taangpi in Vote hong pia in MP panmun Bial (6) bang ah kingah hi. Hih Policy atangtunna dingin Gambup Thukhunpi (Constitution) laih kul ding hi. Gambup Thukhunpi a kilaihna ah Zomi-te thu Zomi Makaite mahin ih sun kul, ih kuppih kul hi ci in taangpi panpihna ih ngah hi. Tuamah bangin, Zomi-te thu Zomi Makaite mahin thu sung thei hi. Gambup Innpi (Parliament) sung ah Zomi Makaite in tutna leh panmun ngah uhhi. Tuabek thamlo Gambul kalsuanzia ageelkhol UPDJC pawl sung ahzong panmun kician ih ngah hi.

Challenges

Tu laitak in, Gambup Innpi (Parliament) sung panin Kawl Gambup Thukhunpi puah dingin NLD Party MP-te madawk in hanciam uh a, ZCD Party MP-te inzong thukimpih hi. Ahi zongin, lam-etna mahbang in Thukhunpi puah ding thukimna ngah zolo uhhi. Hih thu in mailam Kawl Gambup kalsuanzia ding thu tampi hong khelta hi.

Gambup Innpi sung pan Thukhunpi puah dingin thukimna a kingah zawhkei aleh, lam-et theih ding lampi adang khat in Panglong Khawmpi tung tawnin hanciamna hi a, abeisa hun in tua Khawmpi sung pan Thukimna a kingahsa Thumeilette zong Gambup Innpi sung ah kisung in, Gambup Thukhunpi sung ah tua Thukimna zui a puahphatna bawl ding nangawn kithukim zolo hi. Hih pen tu laitak a Gambup in a phukkhak Haksatna (Challenges) lianpi khat ahi hi.

Minam Party

Kawl Gambup ah hibang Challenges a om hangin, tu ni ciangciang, sak leh khang, sim leh mal, tuipi galkhat a om Zomi taangpi taangta inbel ZCD Party pen;

• (1) Minam Party hi, Minam Party mah Vote pia ni,
• (2) Zomi min suang Party hi, Zomi na hih aleh ZCD Party Vote pia in,
• (3) Minam tung a kilam Party hi, na Minam gum in,
• (4) Democracy ading a kilam Party hi,
• (5) Zomi khempeuhte Party hi,
• (6) Zomi buppi tung ah kilam Party hi,
• (7) Zogam khantohna dingin ma apang Party hi,

.. ci-in kisang a, muanna lianpi tawh tha kipia hi.

Lam-etna om nawnlo maw

Taangpi in Gam Makai dingin NLD Party leh ZCD Party Makaite ateel zawh Kum (5) sung lutta a, Term Khat abei kuan hita hi. ZCD Party Ngimna Bulpite leh Thumeilette a tangtun zawhna ding mualmong lungngai kibanglai hi. Gambup Thukhunpi puahphat zawhna dingin lampi bing semsem hi. Zogam ah Zomi-te in Thuneihna bukim angah theihna ding hanciamna ahi Zomi Movement maban sung pan, Parliament sung tawnin kalsuanna pen lungzin huaita tawh kibang hi.

Minam Party koi lam ah

Gambup in hibang Challenges atuahkhak laitak in, ZCD Party in bangci bangin mainawt ding, Zomi Movement in bang lam tawn ding, Zomi taangpi taangta in koi lam ah pang ding cih thuthukte limtak geel kulta hi. Tuaban ah, 2020 kum pen Gambup Kiteelpi kibawl ding kum ahih manin, hih Kiteelpi a kibawlma in ZCD Party hi taleh, Zomi Movement hi taleh, Zomi taangpi taangta in hi taleh, a hun lap-in thu kician, maban kician, vai kician ahawmkei aleh, namdangte kikal ah, a tuantual pen, a ziakai pen minam kisuakzel ding hi.

Challenges & Defining Moment

Tua ahih manin, ZCD Party in hih Challenges pen bangci bangin nawk ding hiam! Gambup huamin akilam NLD Party kalsuanzia tung ah kinga in, ZCD Party Policy teng sunsiahphot a, Political Party khat hihna ciangtawh khuadak in kalsuan ding maw! Ahihkei aleh, ZCD Party Policy leh Zomi Movement maban atangtun theihna dingin lampi kician khung ding maw! Kawl Gambup ah hibang haksatna Challenges pen akhangto gamte lungsim puak danmah in Opportunity in sangin, Party Kivaipuakzia limtak puahpha a, mainawt ding maw cihpen tu hun manpha (Defining Moment) sung mahmah in akhensat huai, kalsuan huai ding hi. Tu hun pau dan in, Policy Development kisam cini.

Gambup Party tung kinga ding maw

Kawl Gambup Thukhunpi puahphatna ding, Federal Union lamna ding, Tualsuak Minamte thuneihna ding cih Ngimnate pen Gambup huamin ma apang NLD Party tung ah kinga hi, USDP Party tung ah kinga hi, Galkap Kumpi tung ah kinga hi ci in, Minam Party hihna pan kidaithah sawm ahih aleh, ZCD Party a van zangtuam mahmah ding hi. A hun zui in, Political Party khat hihna tawh nungzuih ding hibek ding a, Gam ading deihsak zawhna tantan tawh Development lam hanciam ding hiding hi.

Challenges & Opportunity

Hih Challenges pen Opportunity in sang ding hihang acih aleh, taangpi taangta in ZCD Party a sandan siksan in, Minam Party kician a hihna, taangpi tung a kilam a hihna, Mipi thuneihna (Democracy) bangin a kalsuan a hihna, Zomi khempeuhte neihsa, Zomi buppi tung a kilam ahih manin thutak leh kilangtak in kalsuanna (Rule of Law and Transparency) a om theihna dingin, a masa penin ZCD Party Kivaipuakzia mahmah puahpha in mainawt ding kisam ding hi.

Tuaban ah, Minam Party, Zomi buppi a makaih ding Party lianpi khat hihna tawh Party Makai panmunlen dingte zong a picing, mipil misiam, nasep siamna (Capacity) anei, gam leh minam a it, Zomi leh ZCD Party a gum tawntung ahih ding kisam ding hi. ZIUSA Kipawlna mahbang in Minam Kipawlna khatin din zawh ding kisam hi. 😊

Zomi Movement Maban

Zogam ah Zomi-te in thuneihna bukim ngah theihna ding hanciamna pen Zomi Movement kici hi. Abeisa hun sung tengin Zomi Movement alawhcin theihna dingin, Zomi-te in Minam Party dinmun pan Gambup Innpi (Parliament) sung ah thu sung ding, ma pang dingin kihanciam hi. Hih maban ma apang ZCD Party in Gambup Party ahi NLD Party kalsuanzia tung ah kinga in, a Policy leh Minam vaite ahong daihthah kulphot a, Development maban bekmah ahong nawt theih aleh, Zomi Movement maban a kalsuan theihna dingin lampi kician adang (Alternate Plan) khatbang sat kul thei ding hi.

Parliament sung panmah in, a beisa hun sangin aciik zaw, akhauh zaw, agam zaw in ma apang dingin kithawi ding maw, Parliament pualam pan mapan theihna ding lampi zong ding maw, Zomi Parliament maban phungvuh ding maw, NCA lampi tung ah mapan theihna dingin Zogam Galkapte phungvuh ding maw.. Gam leh Minam a it takpi, Gam leh Minam Mabante ah ma apang takpi, Gam makai, Minam makai, Khua leh Tui makai, Pawlpi makai, Khangno makai khempeuh in lungngai in, tu Defining Moment pen zangsiam a, Challenges pen Opportunity in sanzawh ding ka lunggulh hi. GSKhup (Tulsa, Oklahoma, March 12, 2020)