ZAM Thupuak :: 28 December 2014

ZAM Thupuak
ZAM :: Zomi Association of Malaysia

Zomi Cup honpawi nopci takin kizo

2010 pan a kipan kusim Zomi Nam Ni pahtawina a a kibawl Zomi Cup tukpeng ki mawlna 2015 adingin 21 December 2014 nai 09:30am pan 10:30 sung Thang Ho leh Lian Do tualpi Taman Pudu Ulu ah honpawi nasia takin kibawl hi.

Zomi Cup pen 2010 in Team (8), 2011 in Khua (19), 2012 in Khua (26), 2013 in Khua (40) Team (41), 2014 Khua (43), 2015 Khua (32) leh mipi 1,200 val tawh nasia takin honpawi ki nei a, ih minam Zomi pulakna, lapsangna ding leh Zomi Minam Ni pahtawina dingin aki vaihawm ahi hi.

Zomi te gualtung kituang thei lua hi

Lametna om mahmah Zomi pawlkhat in “kei lel tak” cih kineumuh kholhna nei thei uh hi. Ih kim ih pam a om minam dangte in zong Zomi khuasuak khat a om ciangin “Zomi te maw!” ci-in lamdang sak tuak dihzen uh hi.

Angsung thei mi pawlkhat, mimal ading nasem pawlkhat in Zomi om kei, UNHCR in Zomi Association of Malaysia (ZAM) theihpih kei a cihcih laitak un, Zomi om lua mahmah cih lakkhiatna leh Zomi te kipawlna ZAM theihpih ung cih ciang bek hilo in 2014 a dingin “Best Community-Based Origination” (Kipawlna hoihpen) kipawlna 50 vallak pan ZAM hongpia uhhi. Hih bang a pahtawina ZAM in hong ngah ciangin namdangte in ZOMI te tuazah ciang dongding nasia maw ci-in lamdangsa phial uhhi. Kamsang Nathanael in leitungbup honkhia ding Pa Nazareth pan cih a zak ciangin lam dangsa in, “Nazareth pan na hoih piang thei maw!” ci hi.

Zomi mi suak theilua hi. Minam dangte bangin tupna nei-in, hanciam in, citak peuh le hang gualtung ki tuang lua mahmah hi. Mi kisuak lua mahmah hi. Minam dangte kideep zo lua hi.
1939 kumin Olympic kimawlna Germany gam Berlin khuapi ah kibawl hi. Adolf Hitler akipan innteek Germany te peuhmahin amau le amau a thupi pen minam a kiseh laitak uh ahi hi. Kimawlna khempeuh ah minam thupi pen ahi Germany bekin a khatna ngah ding a cih laitak uh ahi hi. Ahi zongin amau ki lametna banglo in, leitungbup in lamdang asak thu khat tua tung Olympic ah hong piang hi.

Tua thu in banghiam cih leh, Jessi Owens kici America te mivom khatin a khatna bekbek mun 6 ah hong ngah mawk hi. Kanteh kanna, meter 200 tai kidemna, mili kipawl meter 400 tai kidemnate ah amah zah a hat kuamah om nailo zahkhopin Owens in a khatna vive hong la hi. Pawipi khit ciangin Ownes kam dotna kinei a, Owens in. “Tupna nei-in , ka hanciam a, ka citak hi,” ci-in a gual zawhna a hang tomkimcing takin dawng hi.

Ei ZOMI te zong Jessi Owens bangin tupna nei-in, hanciam in, citak peuh leng namdangte ki phazo lua, ki baanzo lua, gualtung kituang lua hi. Namdang tampi te a kimuan mahmah laitak kawmkal ah UNHCR-EDU in sang 127 lakah pahtawina thupi 3 lakah Zomi makaite, “Lifetime Achievement Award” leh “Outstanding Contributions to Learning Centres 2014” hong piaksak a, UNHCR-CDU nuai a om kipawlna 50 val lakah ih kipawlna ZAM in (Kipawlna Hoihpen 2014) hong ngah hi. Hih teng khempeuh ih hanciam khopna, sepkhopna, ih ki thutuakna, ih cihtakna leh ih kipawlna tha ih piakna hang ahi hi. Zomi Nam Ni pahtawina a ih bawl Zomi Cup ah a kumkum a hong kihel khua te tungah lungdam mahmah hi hang. Zomi Cup honni speech

United States Ngeina le Dan Thusinna
Khutzat Laibu : ZOMI (Azom)
Khenpi Lina

Munpiakkikna Palaaite’ Panmun

Galtaimi khat vai khempeuh USA a om munpiakkikna agency khatpeuhpeuhah tavuan kipia hi. Amau ngimna-ah galtai mi khat in amanlangin amah leh a mah kicingtaka, a nuntak zawh nang hi pen hi. USA a tuncil pan kipan ni 60 sung a kisam ham tangte leh om nang mun te zong vai hawm sak hi.Gen teh na in na unau sanggam te USA tung khinsa a om uhleh amau kiang tua a kisamteng hong vaihawmsak zawh ding leh zawhloh ding cih agency te in dong thei hi. Ahi zongin USA na tun theih nang amau huhtheih, piaktheih, vantheih hi tuanlo bek thamlo zong kisamlo hi. Galtaite ading a mau kisap dan tawh ki zui-in a vansak munpiak kikna leh khat i sepsak dan, panpihdan kibanglo hi. Nang ngah panpihna leh midangte ngah etkak pen nang ading kimanna neilo hi.

Hih munpiakkikna agency te pen kumpite khutnuai a om kipawlna hilo hi. Galtai hong tungthakte kisapna bangin huh theih panpihtheih nadingin US kumpi tawh kithukima asem NGO te a hi uh hi.

Na kisap bangbang hong panpih ding agency ahih tei hang ei le ei mah ei ading amasa penin a thupi pen ihi hi.

Agency te hong panpihnate

Vanleng phual pan hong dawn.
Om nang mun leh a kisam inn sung vante hong zonsak.
Security card hong siauh sak.
Kipawlna tuamtuamte (ngeina dan leh minam tawh kizui-a kipawlnate) tawh hong kimusak.
Na tunna mun a kizang mawtaw, bus, meileng cihte tuandan zat dan leh zattheih nang hong huh.
Naupangte sang hong apsak.
Nasep hong zonsak dingte tawh hong kimusak. Cidamna lam tawh kisai hong vaihawmsak.
Mangpau sin nang tintante tawh hong kizomsak.

Palaite tawh nasepkhop ding dan

Thalawpin manlang in. Huh ding na kisap phetin a manlangin munpiakkikna agency te tawh kizompah in. Midangte’n zong agency pan mah huhna ngen uh ahih manin lungduaitakin ngaksiam in.
Lungduaitakin ngak siam in. Nang bek huhna kisam hilo na hih lam phawk inla lungduai in. Kisapnate na ngah nang na hun piak kul hi. Siauhlua (form) na siauhnate-ah zong kumpi zum lamte huhna kisapna munte-ah case worker te’n hong huh ding hi.
Kiniamkhiat inla kam khum zangin. Munpiakkikna agency nasemte leh deihsakna tawh hong sepsakte’n ahoih penin hong sepsak ding uh hi. Huhna na ngah khitteh nanglam pan zong “Hehpihna tawh” “Lungdam mahmah” ci-in kam khum takleh zaknoptakin na pau theih ding kisam hi.
Upna nei in. Cihtakna leh man taka ahoih penin case worker te’n hong huh ding ahih manin hong huh dingte um ngamphot in. Na unau na sanggamte leh lawm le gualte hong gente zong khial thei ahih manin um tuan kei in. Agencyte sepdan bawldan khat le khat kibanglo ahihlam phawk in. Case worker te’n ahoih penin hong vaihawmsak dingte leh a sepna uhah experience nei khin mahmahte uh ahi hi. Na lamet bang ahi kei phial zongin limtak leh hoihtakin hong sepsak uh ahihlam leh adang agency te tawh zong hong kizopsaklam thei in. Kisapna tuamtuamte nangah theih nang siauhluate (form) tinsak, hong vaihawmsak hang tuate abanbanin na ngah theih nang hong vaihawmsakto sawnsawn pen kumpi zumlamte le adang agency te hizaw hi.
Ngah ding ki lawmte nangah keileh a kisai zumte ah kigenthei hi. Munpiakkikna agency khat ciat i sepziate ki batlohna thu US na tun phetin thusinna ah hong kigen ding hi. Zopzop lai ding…

New Life for You Ministry (N4U) makaihna tawh Zomi bup antan thunget kipan ding

Amun : ZAM Hall
Ani : 31/12/2014
Ahun : 10am-3pm

Thunget ding:

Malaysia a om Zomi bup tungah kha khanlawhna thak hong tunna ding.
Malaysia a om Zomi tul 30 valte sih leh nat vai, kimat kihen vai, UN vai, nasep zonsak vai khempeuh ah Itna deihsakna tawh ong huh hong vaan den ZAM zumpi a nasem khempeuh thupha pia in thungetsak ding.
Khangthak tuailai momno sih hun nailopi a Accident tawh asi tawh eilehei kithat a si tawh ih minam sungah sihsia natsia tam lua ahihman in 2015 akipan Zomite sungah kithahna leh sihsia natsia a beina ding.
Khamtheih zu leh zatui zang a nulehpa zilehta sanggamte a phawk zo nawnlo mi mangthang kha mangthangte’n “New Life” a thak nuntaakna ong ngahna ding.
Gamtat luhek asiam hetlo, a it huailo Zomite a gam vuah nuam taka hong om sak Malaysia kumpite thupha pia ding. Ei hangin a gam uh cidam in Zeisu anei piangthak mi ong kibehlapna ding.
UNHCR, RSC, DHS, IOM, CO Class a nasem officer te leh kamphente ading.
Leitungbup kha mangthangte a ding leh Zomi te ih tuntunna gamah Pasian maipha zong a Khasiangtho tawh kidim ciatna ding.
Malaysia, India, Thai gamte ah gam thumna ngak a om Zomi khempeuh piangthak sinsen in gam thumna tung a ih ngah pilna siamna hauhna te tawh ih gam ih lei zunkik puahkik zawhna ding.
Nupa kikhen a beina ding leh Nungak Tangval te Pasian deih bangin kitenna ding leh (living together) a beina ding.
Zomi kimin ngimna kician nei a, leitung lok a Pasian mizat minthang mipil mihau tampi ong pian khiatna ding.

Theihding: Pawlpi min tawh vaihawm hilo in “New Life for You Ministry” Min tawh kivaihawm hi a Zomi kha mangthang mi mangthang te itna veina nei Pasian nasem khempeuh leh mipite kipawl khawm a thunget khopna hi. Pawlpi, Khua, Beh cihte genin ki neilo ding a kha mangthangte ading khitui tawh khaici kituh ding hi.

Kha khat in khatvei ta Zomibup antan thunget kinei ding a Thupuak pan a ni ding ong kizasak kik ding hi. 2015 January a ding pen 03/01/2015 (Saturday) nai 10am pan 3pm dong hi ding hi. Zomi bup mapang khawm dingin New Life for You Ministry pan ong zawn ung. Theihbehnop a om leh kizopna ding:Sia Kamtawng017 361 0125

Tukal Palaai te buaipih diak teng

Kham Lian Mung (Khampat) 22-23. December ni-in Tung Shin zatopi ah ki buaipih.
Dal Gin Sian (Saizang) 24 December ni-in ACTS ah ki buaipih.
Zam Sawm Lam (Dimlo), Hau Than Suum (Dimlo) Asia Jaya Palik zumah ki buaipih.
Niang Lam Cing (Cikha) 22 December ni-in PJ ah ki buaipih.
Sian Hoih (Tungzang) Klang zato ah ki buaipih.

ZEC-Klang sang luthun ding

ZEC-Klang sangah 2015 sangkah kum ading sangnaupang min sanna 5-7 January (Mon-Wed) ni 3 sung ZEC-Klang zumah 10am pan 2pm dong ki nei ding a, sang ki-ap ding peuhmah in UN card/ kipawlna card pello hongkeng hamtang un. Sangnaupang khat ciang sang lutman (admission fee) RM40, Sangsap (school fee) RM40 hi ding hi. Sang ah Mucu (KG) panin tan 6 ciang om hi.
Sang vai dotnop a om leh anuai ate kidong thei hi.

Siapipa Ph. 016-615 7573Sang Ph.03-3318 6469
Email:[email protected], [email protected]
Kidawm ciat ni!

Tusung teng Malaysia mun khempeuh phialah lamkhak (roadblock) omden pian hi. Zomi te ih hawhna ih ciahna ah kidawm in pilvaang ciat ni. Kota Raya kiim tengah tusung teng mawtaw tawh luak den ahih manin UN Card tawi nailo Zomi peuhmah a kisam lua ahih kei naak leh vaak loh theih kisin ni.

Zomi Cup 21 December 2014 Result genkhiatna

Theihding: Tualpi a pai kimawl te hita leh a ente hihta leh akua mahpeuhin tui, avot, nektheih tuam nekding a neite in na nekkhit, na dawnkhit ciangin ninbung sungah na paihsak pahpah un. Na nekna, na dawnna ciang nangawn nin bung sungah napaih zawh kei ding a leh neksawm, dawnsawm kei zawin nin kitawm kei leh tampi kiliau kha hi.

Zomi Cup 14 January 2015 ni kimawl ding khuate

Tune Insurance te hong paikik ding

January 10 ni 9am-5pm kikal Tune Insurance te ZAM hall ah hong paikik leuleu ding ahih manin a lei-nuam khempeuh in ZAM hall ah nai 9am lapin hong pai un. Nong pai ciangin na UN card number, na UN man (photo) gei a number, suah ni, suah kha leh suah kum cihte kisam mahmah hi. Mi dang na vaikhak ding leh zong tuate lo tawh kingah vetlo hi.

2015 ading ZSM lutna laibu kingahta

Maikum 2015 kum ZSM lutna dingin, Khua kipawlna, Pawlpi tuamtuam pan ahi zongin mimal in ahi zongin zumpi ah kilut theita hi. 2015 kum ZSM lutna ding RM10 hi nawnlo in RM20 hita ding hi. Bang hanghiam cih leh ih gensa bangin misi tam luatna hangin RM10 tawh kicingzo nawnlo ban ah, hanleitang man khanglua aa mikhat kivui nangin leitang man RM4800.00 bang bei ahih manin ih kipawlna/ mimal panin hanciam na tawh mipih atuahsia te adingin ih piakkhiatna khan ding hi hang. Nang leh na innkuanpih te in hih sum nazat khakloh nangin Topa’n hongdam sakta hen.

ZSM kumcin kikhoppi om ding

Kumsim a kinei denkumcin kikhoppi leh palai kiteel na 29/12/2014, 11:00am-3:00pm sung ZAM Hall ah kinei ding ahih manin Khua makai khempeuh leh Pawlpi sungah Pasian nasem sia/ma te, Pawlpi Upa te khempeuh kihel kim nangin kong zawn uhhi.

Lungdamkohna

2014 kum sung ZAM Thupuak ading sumtang leh laidal tawh hong panpih teng:
Zomi Catholic Community Malaysia RM1,350
Zomi Christian Fellowship (Canaan) RM100
Dal Khan Kap (Saizang) RM50
Kham Khan Dal (Dimpi) RM50
Bethel SungaiLong RM100
Pa Felix En Za Siam(Laaitui) RM50
PaZamKhanThang(Mualbeem) RM50
Rev.CinKapTuang RM50
EverSmileMinistry RM100
Tg.PanKhup RM200
Church of Jesus RM50
SianHawmSang(Buan) RM50
Tual Sian Pum (Kapteel) RM20
Khai Lam Suan (Muallum) RM50
Tg.ThangMuanSuum (Tuithang) RM50
Tg.Sian Tuang RM50
Tg.Mungpi (Phai) RM50
PhilipMaungpi (Taungzalat) RM300
SianuHauNem(Leilum) RM100
AbrahamKhai(Tuitawh) RM70
“N4U” Ministry pan Sia Kamtawng RM100
Kham Sawm Mung te unau (Laaitui) RM50
Pum Lam Thang (Pyidawtha) RM50
Hau Cin Thang & Kap Do Nang (Ngalzang) RM50
Thang Langh Pau (Keizang) RM50
Myanmar Believers Fellowship (Sunway) RM100
Dal Kap (Saizang) RM50
Zion UPC Kepong RM50
Hau Suan Lian (Laailui) RM50
Dr. Ngul Khan Pau te nupa (India) RM200
Nang Lian Mang (Tuilangh) RM50
Thang Kap Sing (Tongsial) RM20
Khup Lam Thang (Chantagyi) RM50
Monica Muangnu (Saizang) RM50
Zomi Adventist Church RM50
Thang Sawm Lian (Buanli) RM50
Sia Hau Khan Mang (Japan) RM50
Zomi Christian Ministers Council RM50
KL–Adventist Church RM50
Pa Thang Sian Muang (Vangteh) RM50
Nu Mamaan (Sawbua) RM100
Pa Khup Khan Piang (Tuicinlui) RM50
Thang Kim Khai RM10
Michael Mung RM20
Gin KhenMung (Ngalbual) RM50
Kap Lem Thang (Tuimang) RM50
Langh Khan Hang (Lailo) RM50
Dal Sawm Piang (Anlangh) RM50
Suanghoih National Organization-Malaysia RM50
Moses Pum Pau (Sezaang) RM150
Rev. Joseph Lian (MCF) RM50
Suan Cin (Buanli) in A4 size laidal 900.
Thang Sian Tung & Nang Lian Mang (Tuilangh) in A3 size laidal 500.

ZAM Thupuak pen pawlpi tuamtuam leh Zosai te ah ki hawmkhia in kal khatin laimai 4 copy 20,00 kiprint den hi.

Ebenezer

Tu a ciang natun pen Pasian hang ahi hi. Samuel in, “Ebenezer” ci-in mualsuang a phuh mah bangin huhna mualsuang phutlo ding na hiam? “Ebenezer” a khiatna “huhna mualsuang” ahi hi. “Na hehpihna tawh hih ciang kong tung, huhna mualsuang hiah phut ing,” cilo ding na hiam?

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  [email protected]

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…