Yangon ah sangnaupang Tan 9 akahlaitak abuanpa kum 23 thong kiadingin thukipia

Yangon ah sangnaupang Tan 9 akahlaitak abuanpa kum 23 thong kiadingin thukipia

Myanmar gamsung ah sangnaupang numeino Tan 9 akahlaikhat zawhthawh thutawh abuanpa kum 23 thong kiading in thukipia cih 7Daily pan kiza hi. Tua sangnaupang numeino pen Online tungtawn in khemin zolzol a, zintunbuk Hotel sungkhatah khupcip in abuangawp kici hi.

Tua mibuanpa, thong kum 23 akiading in thukhenna athuakpa ii aminpen Than Ko Ko Maung kici hi.

Abeisa 2016 September khasung in Tan 9 akahlaitak numeino khatpen BeeTalk kici App tungtawn in hopihzel cihi. Tua Tan 9 akahlaitak numeino pen kum 15 bek aphapan khat ahihi.

Tuabang in BeeTalk tungtawn in kihoho uh a, ki maingap semsemin anunung ah lawmkingai dinmun tungto uhhi. Ahi zongin apualam ah khatveizong maitang kituah in kimu ngeilo uhhi.

BeeTalk tungtawn in aki maingap mahmahkhit uhciangin pasalpa in khatvei apualam ah kimuhpih dingin samkhia hi. Tua akimuhcilni in numeinu ii adawnding Soft Drink sungah ihmut suahsakza zatui namkhat koihsak cihi.

Tuakhit ciangin tua numeino pen North Dagon aom Hotel khat ii inndei sungah kalhcip in, zawhthawh thutawh buangawp, Rape gawp cihi. Tua tungtawn in numeinu ii anu in tua pasalpa pen thu thukhenzum ah thu abawl ahihi.

Than Ko Ko Maung akicipa pen nung December 19 ni in Yangon Western District Court ah thusitna kinei in, thukhenmang te’n kum 23 thong kiading in thu apia uh ahihi.

Than Ko Ko Maung pen Penal Code 376 tawh kizui in mibuan ahih manin kum 20 thong akiading in thu akipia hi a, tuaban ah mikhat mancip cihtawh atuamin kum 3 thongkiading in thu akibawl ahihi. Akigawm in kum 23 atuamtuak in thong akiading ahihi.

Numeino ii an in hih thukhenna tawh kizui in agenna ah Decree kipia pen tawmlua hi. Ka tanu in athupiang khempeuh kuakua in adongzong in akibang in gencian sitset theihi. Tua zintunbuk Hotel inndeisung ahzong katanu abuanpen mi 2 bang phading cihi. Hihpen mihing azuak Human Trafficking zong hipah hi. Hotel sungah akepcip pen ni 3 sung bang hi a, Soft Drink adawnsak abung tezong Police te khutsung atun ciangin mangthangsak uhhi ci’n anu in genkhia hi.

Myanmar gambup in tukum November kha ciangciang naupang buan athuak “Child Abuse, Rape” Case pen 700 valbang phakhin cihi. Tua sazian pen kumpi thunei te ii pulakkhiat hi a, nungkum sangin kumcinglo buan athuakpen azah 82% bang tamzaw cimawk hi.

More: Singapore ah Myanmar Maid khat innteekpa’n buan ahih manin kum 13 thongkia

Tuabang in kumcinglo naupang buan athuakpen Yangon Region sungah tampen a, tuazom ah Irrawaddy Region sungah atampen nihna kici hi.

Hih thuthang tungtawn in naupangno, sangnaupang leh khangno te adingin Social Media pen kidopsiamding thupi mahmah cih hongphawksak hi. Sawltak #zomidaily