Vondeih Kep Ding – 69 (Dimno’ Pa)

Tawngno,
Tangthu khat hong gen ning.

Khatvei sanginn khat ah lamet loh pi-in model mithang numei khat hong pai-in nungak te khutmee te hong etsak hi. Khat nu in ama khutmee lak in,
“Ka khutmee te ahoih dan. Zum zilzial in pum hilhial.”
Siangtho tak in akhut akhe te kem in naham asep lohlam gen hi.

A kianga khat nu in lak leuleu-a,
“Ka khutmee te ahoih dan, ngek in sansuah sitset in kizum zilzial,” ci-in hong gen kik hi.
A khut ahoih theihna dingin bangmah sem lo-in zingsang simin khutcin sanza nuh in strawberry gah tawh apuah detlam gen hi.

A thumna nungak nu in amam zilzial akhutmee te hong lak in,
“Kei khutmee te mah hoih pen in teh. Siangtho tak in kem in sun tawh zan tawh ka khutmee ka puah tawntung hi.” hong ci hi.

Paiphei in azom a nungakno kiang ah,

“Nang aa e leh?” ci-in hong dot leh nungak nu in akhutmee hong lakkhia ngam lo hi. A gei-a alawm numei te-in hong nuihsan gawp in hong zahpih gawp uhi. Numeino nu’ khutmee te hong etsak leh na hoihlo takpi hi.

A lawmte’ khut dan bang lo-in akhut sung hamgawp in akhutmee te zong bilbawk gawp ahih manin alak khia ngamlo ahih lam hong theih ciangin,

“Nau aw, a taktak in cileng nang khut mah hoih pen in manpha pen sa ing. Na lawmdangte’ abangin zum zilzial in ngek dikdek ta kei mah leh nang khutmee mah hoih pen in etlawm penpen ahi maw.”

“Naupang lai khat hinapi cin na khutmee te bilbawk in na khut sung hamgawp cih pen nu leh pa’ tha dawn in anhuan mehhuan, lokhawh singpuak akipan na khempeuh ah na hihpihlam hong lak hi.”

“Nang khut tawh a kilawm penpen dingin letsong khat hong pia ning.” ci- in a kham zungbulh hong lakhia in numeino nu’ khatmee ah hong bulh sak hi.”

Tangthu in hiciang in tawp!

Tawngno aw, nang bang hile cin kua nungak pen hoihsa penin na zungbulh na pia tam? Mi pawlkhatte-in amuh lian bek uh en in thu khensat pah uh-a, pawlkhatte-in amuh nate’ nunga om amuh loh nate dong ah bangci om cih alungsim uh tawh et beh lai-a, tua khit ciangin khensatna nei pan uhi.

Hong it,
Na pa

Columbus, Oh
October 17, 2016

Facebook ah Dimno’ Pa Page non na Like sak ve vua!
https://www.facebook.com/dimnopaa/