Valentine’s Day (Valentine’ Ni) ~ Jam Daniel

Valentine’s Day (Valentine’ Ni) ~ Jam Daniel

Valentine’s Day cih ciang I theih hangin banghangin hong piangkhia hiam cih pen kitheikim lian lo kha ding hi. Tuni dongin I zat theih na dingin a thu le a hang om cihna ahihi.

Bethlehem ah Jesu suah zawh kum 250 kim a thupiang ahihi. Tua hun laitak in Siampi(Priest) Valentine kici khat om hi. Rome gam uk le Rome galkap limtak puah ding a hanciam kumpi (Emperor) Claudius ukna sungah teng ahihi. Valentine in mite amau utloh naapi ah sawltentan sangin pasal peuh mah in galkap nasep kisapna mun ah kipiakkhiatna (volunteer) a om theih na dingin a thupit ngaihsut hi. Ahizongin telkhuan a kipiak ciangin Rome gam-uk sung a pasal tampi in nial uhi. Galsung ah galkap hihna sangin a zi a tate uh tawh inn a om mah nuamsa zaw uhi.

Tua hangin, Kumpi Claudius in pasal-tangval peuh mah a kipiak khiat theih na dingin kuamah zi nei a om theih nawn loh na dingin kumpi thukhun khat bawl hi. Rome gam uk sung ah kiten theihna a khaktanna hangin Claudius Cruel cih minno ngahlawh liang hi.

Valentine in hih thu pen gitlohhuai sa hi. Banghang hiam cihleh ama siampi nasepna ahang nam khat in a kiteng nuamte kitensakna ahihi. Kumpi Claudius in hih thukhun (law) khauhtakin a bawl hangin Valentine in a kiteng nuamte a simtham in kitensakna bawlsak veve hi. Tua bang hun ciangin galkapte paina khe ging bang a zak uh ciangin lau veve uh ahih manin a gen nop thute abil buk vuah damtakin gen hi kici hi.

Nitak khat Valentine in a inn kong mai ah galkapte khe ging za hi. A kitensak nupate gel taikhia in suakta man uh a, ahizongin amah kiman hi. Amah thong sungah kikoih in sih thukhen na kipia hi. Valentine in a kikoihna mun ah a nuam theipen ding mah in om hi. Kitenna a piaksa nupakop tampite a thongkiatna mun ah va hawh uhi. Ama om na sung a lut theihloh uh hangin a ma tungah bang zah in itna nei uh hiam cih a theihsak nop man un kongvang (window) pan in paak le lai gelh tawm tuamtuam lot zel uhi.

Ni khat, thongcing mangpa tanu vahawh hi. A pa phalna tawh, a kikoihna thongbuk (cell) sungah hawh in a nai a sim in kiho zel uhi. Tua nu in Valentine nasep (kitensakna) pen kumpipa thupiak nial ahih hangin thuman sem ahihna mu hi. Valentine a sih ciangin a omna ah lai them khat nusiat a, alawm bawlna (friendship) le adikna (loyalty) lungdam ko hi.

A laigual tawpna ah, Valentine kiang pan itna (Love from your Valentine) ci-in letmat thuh hi. Tuni dong (Valentine’s Day) in itna kithuhna ah ngeina bang khat in kizang liang hi. A sih ni February 14, 269 A.D in hih kammal mah kigelh a, anuntakna a piak Topa Pasian nasepna le itna a neihna hangin ni thupi khat in kiciamteh a zahtakna kipia hi.

Mi khempeuh in itna I kisam a, I hawmkhiat theih a thupi pen zong itna mah ahihi.

Henry Miller in, “Hunta I cih theih ngeiloh khat om a tua in ITNA ahihi. A kisamzah I piakkhiat zawhloh khat om a, tua in ITNA ahihi” ci hi. (The one thing we can never get enough of is love. And the one thing we never give enough of is love.) – By Henry Miller

Tuni’n I kidot nop thu khat in, Valentine’s Ni hong piankhiat na dingin amanpha mahmah hong kipiakhia (worth giving) itna bangci kep in khantohpih na hiam cih thu ahihi. Lai Siangtho sungah kimmu thei hi.

“Ka Pa in kei hong it zahin note hong it ka hih manin keima hong itna sungah om un. Ka Pa’ hong thupiakte zui-in ama itna sungah ka om mah bangin note in zong ka thupiaknate na hong zuih uhleh ka itna sungah a om na hi ding uh hi. Note hangin kei ka lungdam theih nading le note’ lungdamna a cingtaak a suahtheih nadingin hih thute a hong gen ka hi hi. “Note tungah ka hong piak thu in: Note ka hong it zahin note khatlekhat na ki-it un. JOHN 15:9-12

I ki hanthot nop thu in: TOPA HONG ITNA SANG IN “Ka Pa in kei hong it zahin note hong it ka hih manin keima hong itna sungah om un.” JOHAN‬ ‭15:9‬ ‭

ITNA THUK IN

Jesu’ hun lai a kipan Rabbi’ nungzuite pen ‘sila, nasemte’ (servants) kici hi. Ahizongin Jesu in tua pen ‘LAWM’ cih kammal tawh hong laih hi. Jesu tawh na kizop manin nasem (servant) hihna pan lawm (friend) hihna dong ah hong zakhang sak hi. Tua ahihleh tuni’n Jesu a’ding bangci bang lawm na hiam?

“Ka hong thupiak bangin na gamtat uhleh ka lawmte na hi uh hi. Nasemte in a tote’ nasepna bangmah thei lo ahih manin note pen nasemte ka hong ci nawn kei ding hi. Ka Pa’ tung panin ka zak thu khempeuh note kiangah hong genkhin ka hih manin note, lawm, ka hong ci zaw ding hi.” ‭‭JOHAN‬ ‭15:14-15‬

ITNA KHAHKHIA IN

“Tua hi a, note ka hong thupiak in: Khatlekhat na ki-it un, cihna ahi hi.” JOHAN‬ ‭15:17‬ Jesu hong itna I ngah khit takteh en zong itna mah lak kik a, tuakhitteh Jesu tawh I ki itna bangmah in kimlepam ah hawmkhiat ding ahihi. (thusia peuh hawm hawm nawn kei in). “Note tungah ka hong piak thu in: Note ka hong it zahin note khatlekhat na ki-it un.” JOHAN‬ ‭15:12‬

THUTAWPNA

St. Valentine pen Kumpipa thu nial in minpha ngah keitaleh, misiangtho khat hihna angahna le tuni dongin I phawk theihna ahang thupi pen in: Jesu itna angahna hang; Jesu a it kikna hang le itna thu a khahkhiatna hang ahihi.

Eite zong hih thute I sep zawh taktak nailoh man hi a, hih zo hilehang Saint Valentine sangin I neu zaw tuan kei ding hi. Happy Valentine’s with Jesus! Jam Daniel