Nuamtakin Tukhawm Khawlkhawm Man Lo
Thursday, September 4
Ka innteekpa uh zingtung zingsang nai 5:00AM kim mahin inn pan a nasepna ah pai hi. Innteek nu Donno pen zingsang nai 9:00AM in a ma nasepna tuam ah va pai a, Kamnu in va huh hi. A nupa in sushi hual nasep vive ahihi. Ko gel pata bek mah ka om uh a, vakna ding lah mawtaw zong om lo pah phot ahih manin ka omcip uhhi. Zingsang an breakfast pen khamtak mah a kine a hih manin gilkial khollo hi.
Ka nasepkuante uh nitak nai 3:00PM in a kimin hong tungkik uh a, khuasung mahah kikhawlin an ka ne khawm uhhi. Ka tunni uh a ka kikholh uh leh ka paikhiat maa a, ka aneek khop bekmah ka kikhawl man thei bek uhhi. America nuntak dan pen mikim a kua mah peuh hi zah ta in manlah in nasem tangtang khong uh a, a khantoh loh a phamawh hi.. ka ci simsim hi.
Ka ciahkik uh ciangin nitak nai 5:00PM dektak mah hong sat leuleu a, tua zan Pa Paupite nupa kiangah giak ding ka hih man un, hong dawn dingin Dimkhekte hongtung khin seisai uhhi.
Ka innteeknu Donno in bel hong pa bawlin hong ngai lai mahmah takpi tuak hi. Ahi zongin ka sehsa mah bangin ka zuih kul ahih manin, ut lai pipi mahin ka nusia uhhi. Innsungah khut kilen khin a pua lam ka tun uh ciangin, Donno in a inn kongkhakpi khak pah dingin kithawi a, Ko Htun in hongkik hamtang hi kei leh, hong ngai lua zaw in heh in kong hong khaknelh ngeu nuam ahihi.
Donnote Inn Pan Dimkhekte Innah
Columbus khuasung tuak mah a teng ahih manin Dimkhekte inn ka tung pah uhhi. Ka lupna ding uh bawlsa in na koih sitset a siangtho lua ahih manin zong ka lawng vat ngam kei liang uhhi. A innsaapna apartment ahih hangin lupna khan uh kicing mahmah in a inn zong thak lai sitset hi.
Nitak anneek ciangin vaimiim ciim huan aw, Zo huan a kihuan meh a tuamtuam, bawngsa em voksa naakguh em a limtheithei ka ne uh a, ka gil vahnapi inh ka kamin a kham zok thei kei hi. Paupi tawh bel ka kithei kha lua ngei kei a, Dimkhek ahih leh a pa dam lai in a zu a ham a ka kithuahpih ahih mah bangin amau innkuan tawh innkuan khat mah tawh ka bang liang uh a, tanu bangmah a ka ngaihsut ahihi.
Paupi pen ei mi a tung masa sa, ana kom ana vaan hi a, ei mite ii liimbelhpi khat ahihi. Ko pai laitakin ei Zomi 20 pha nai lo uhhi. Ka tun uh ciangin a kikhawm thei a man sunsun teng tawh hun bawlna hong nei a, kei zong thu gen khuan hong pia ahih manin, US gam thupi kasak na dan vive mah ka gen hi.
Leitung nuntakna vaai bek hilo in biakna lamah zong Paupi mah in a makaih ahi a thupi ka sa peuhmah hi. Tua ni zan mahin Dimkhek in anute hopih a, Kamnu tawh tawmvei sung bang kiho man uhhi.
Azom omlai…
Agelh: Awn Za Pau
Comment piaknop aomleh...