Update: UN DPI/NGO Conference kah ding vai

Dear Zomi Innkuan Makai-te, Tanu-te, Zingmangte leh Siamsin-te:

A hong tung ding UN DPI/NGO Conference ( August 27-29, 2014) kah ding sazian hong pia sa khempeuh UN website ah ki pre-regiter sak a, UN lam pan in approval hong piakna Confirmation Letter na email uh ah hong tung ding hi. Nung Thurday (July 31, 2014) a kipan sazian hong pia te in approval ki ngah nai lo a, Monday ( August 4, 2014) ni in approval piakna Confirmation Letter hong tung ding in hong lamet sak ingh.

UN website ah a at na ah Pre-registration deadline pen August 13, 2014 ci-a, a hi zong in pre-register a bawl khempeuh approval pia hamtang ding cihna hi tuan lo ahih man in approval piakna Confirmation Letter email na ngah ma siah Airticket lei nai lo in ngak phot huai ding hi.

Conference kah ding khempeuh pre-register in approval piakna Confirmation Letter tawh UN sung lut theihna ID badge kibawl thei bek ding a hih man in pre-register bawl lo a, Confirmation Letter lo tawh Conference kikah thei lo ding hi. Tua a hih man in ciangtanna tawh kizui in conference kah ding a sawm khempeuh in min sazian nong piak nai kei uh leh nong piak pah nang un khatvei kong theisak kik uh hi.

Zing-ah thai-ah approval piakna Confirmation Letter ngahsa teng Conference vai ding, zin tung vai ding cihte tawh kisai maban ding te kikupna leh vaan khopna ki nei toto ta ding hi.

Hih Conference pen UN Headquarters, New York, USA ah 2007 kum in kibawl a, tu in kum (7) khit ciang UN Headquarters, NY, USA ah hong kibawl kik pan suak hi. NGO khawmpi a hih mah bangin NGO lianpipi te zong khawmpi kah ding uh a, a lunglut te a ding Workshops tuamtuam (Website ah koih) om ding zong pulak khin uh hi.

Hih Conference ah UN ECOSOC leh UN DPI Consultative Status a hi lo kipawlna te zong kah thei uh a, a hi zong UN conference dangte tawh a kibat leh Consultative Status ahi lo te Observer tutna ah tu sak ding uh a, UN ECOSOC Consultative Status ngahte Civil Society / NGO tutna ding ki ciaptehna ah tu ding uh hi. Consultative Status ngahte thugen theihna, lai ten theihna hamphatna ngah uh hi. Observer dinmun tawh thugen, laiten theihna a piak kipawlna tawm mahmah thei hi. ZIUSA in hih hamphatnate a ngah thei ta dinmun i hih man in angtang hang.

UN ECOSOC Consultative Status dinmun hamphatnate lak ah khat ahi kum (1) sung – Jan 1 – Dec 31 – UN Ground Pass ID Badge ZIUSA min tawh New York ( President, GS leh makai (5), Geneva ( President, GS leh makai (5 ), Vienna ( President, GS leh makai (5) ) i ngah theihna ah ZIUSA GS min tawh UN Ground Pass ID Badge hong piak khin uh hi. Conference, Meeting, UN sung lutnopna aom hun ah ID badge bawlbawl kul nawn lo in a lut, a kah thei ta dinmun ZIUSA in a ngah ta ki suak hi.