Tulai kawlgam Khuahun (18 Sep 2015)

Tulai kawlgam Khuahun (18 Sep 2015)

Gal Gimnam Tektek
Kawl kumpipa leh mualtungmi thautawi makai te’n maikha October teh Gambup Kilemna Mualsuang (Nationwide Ceasefire Accord) bawl ding acih khit teh Shan gam leh Kachin gam ah kikapna nasia takin om aa, Shan gam bang gal vanleng nangawn tawh do hi ci’n kigen hi.

Tua ahih man in Shan thautawi lian mahmah khat ahi RCSS/SSA in party te’n kitelna vai campaign abawl lohna ding in Shan state sung khuapi 16 ah tukha 16 ni aa kipan khawlsak hi. Hih tawh kisai in amau’ makai khat ahi Col. Sao La in agenna ah “August kha pan tukha 16 ni kikal sung bekbek in kikapna 7 vei om in amau’ lam pan 20 val si uh in kozong 5 si ung. Campaign bel amau’ ading aa lau huai aih ciang aa ka khawlsak uh hi. Kumpi tawh kilemna bawl ding bel ngaihsut phat huai lai mahmah inteh” ci hi.

Kitelna Ah Lutkhuan Ngahlo Mi 100 Val Pha
Gambup kitelna ah akidem nuam candidate lak ah 100 val in lutkhuan ngahlo hi. Atamzaw pen muslimte vive hi. Tulaitak aa MP pawl khat nangawn kihel hi. Tuatawh kisai in Zangkong aa om America leh UK kihel nitumna lam gam 9 te’ gam palai zum (embassy) te’n tukha 15 ni in lungnoplohna lai suaksak khawm uh hi. ASEAN Parliamentarian for Human Rights in zong 15 ni in a lungnoplohna thu genkhia hi.
NLD candidate sung ah muslim om vetlo ci’n kigen hiauhiau hi.
Tutung kitelpi ah party 92 pan candidate 6000 val kidem ding hi.

Thautawite Hat Tektek
Tulai tak aa kawl kumpi Thein Sein akah ciil 2011 kum lai in kawlgam bup ah mualtungmi thautawite’ khut sung ah khuapi 50 kiim om hi.
Tu’n bel mualmi thautawite’ khut sung ah khuapi 100 val omta hi.
2007 kum December kha aa Myanmar Information Management Unit (MIMU) ii ciaptehna ah kawlgam bup ah khuapi 325 om hi.

Bus Hawlte Nuak
Tukha ni 7 ni aa Naypyitaw parliament ii thukhensatna thukimloh man in Zangkong khuasung aa taii bus hawl mi 1000 val nuak hi.
Lampi tawh kisai thukhun a palsat khak leh 1500 a liau den kimlai parliament in atawm pen liau sum tul 30 ah khanto hi. Tua liausum tamsalua uh ahih manin bus hawlte nuak hi.
Zangkong khuasung ah bus 4000 kiim khawng bek a om lak ah 1000 val nuak ahih man in mipi genthei tuam mahmah hi.
Nisim in Zangkong khuasung ah bus tuang mihing million 2 val ci hi.

Zolai Thak
Tongzang leh Tedim gam aa Zo kampau te’n asin theih ding Zo Lai UNDP leh kumpi pilna lam te’n vai hawm uh ci hi.

Tulai tak tua project ading in Zangkong aa Kayin Huang ah thusinna pia uh hi. Tua thusinna ah kawlpi pan Rev Mang Kap leh Siema Khat, Tedim pan Rev Do Mang, zangkong pan Siepi Let Cin Khup, Palikmang Mang Khan Thang leh adang 2 avek in mi 7 akah laitak ci hi.

Preschool pan kipan sak ding ci hi. 2016-2017 laisin kum pan kipan sak nuam dan uh hi.
Kawlpi UZO (United Zo Organization) in Zo Lai simbu tan 4 dong bawl khin cih thu zong kiza hi.

Kiukhat Pan
Mung Lan Thang/ Thangboi
Zangkong