Thuthak Tomkimcing 23 Oct 2014

Thuthak Tomkimcing 23 Oct 2014

A. Tedim ah khua vot hiauhiau ta.

Khuado gimnam hong veng pianpian ta in Khuado sangkhak kihong kik ta hi. Zogam sung ah nungsung teng guah zuzu hi mai hi. Tun bel Tedim khuapen khua hun tawm hong kikhel pian in vot simsim ta hi. Khanglui papi te in sikh hiau acih hun hi a, puantung silh leh lukhulo in piang pha nawn lo ahihi. Khedap puom mah neih kei leh Zolia te zaatul kitamm ding nai mahmah hi. Zotaang te zong siamsin na ah ciamnuih liim bawl lua kha leh muk kitamm sa in kinui veivai thei ding hun ahihi. Tedim khua vot hiauhiauta hi.

B. India Sumkhek na tawmkhat kia ta.

Depawali khit teh India sumkhek tawm hong khia hi. Haimual Ciau ah Rupee 10 ciang in Kyats 15:30 kim in khek a, Tamu ah ahih leh Rupee 10 teh Kyats 30:15 ciang in kikhek ci hi. Ciau lam guah tui hongkang pian leh Rih pai nuam mi tampi Mizo leh Vaite, Mikang te India lampan hong pai suk henhan thei zel uhhi. Kalay pan in Ciau mawtaw tungsuak theita in lampi ah zantamm omlo in lampi hoih zaw deuh ta hi.

C. Champhai Pastor’s Quarter ding kilamhsak.

Mizoram Champhai Bethel veng ah Pastor’s Quarter ding thu zuimi te lamsak in hanciam pha mahmah uh hi. Bethel vengsuk pen Zomi atamzaw kibu phual na hi zaw diak hi. Tuni bang veng leh paam pan in tangtha kuan uh a, mi 90 bang pha in Pastor Huang ding sepsak zuahzuah uh hi.

D. New Year bawl minam te in Calendar neitek.

Leitung minam lian kici te in New Year nei tek uh hi. Nisimna Kha simna Kum simna zong amuntek ah nei tek uhhi. Tua New Year abawl anei te in Mikang minam, Mivom minam, China minam , leh Bamaa te ei theih pak leh kumsim in kizak ngei New Year bawl den te ahi uh hi. Tua te in Gregorian Calendar, Solar Calendar, dungzui in amun tek uh ah Calendar nei uh hi. Islamic Calendar, Lunar Calendar, Julian Calendar, Hebrew Calendar leh Thingyan Calendar (kawl) cbt ahihi. Amuntek ah Nisimna Khasimna leh Niciaptehna nei tek uh ahihi. AD 2000 khit ah hong kipan Chin New Year in Calendar kician zong anei lo abulbal nisimna omlo New Year minpua maimai hi a, Zomi te neihsa Khuado amelh cip nopna bek ahihi. Hau Thang