Thudam leh Thatang ~ Pau Khat Suan

Thudam leh Thatang ~ Pau Khat Suan

Kawlgam ah itna leh pilna masuan a thudam tawh nasepna sang thaumuk leh thatang tawh thuneihna lian zaw ahihman in gamthu vaihawmna gina theilo in, mimal tawm leh thanem minorityte ki-nuainet, ki-simmawh ahihman in thuak haksa sa uh hi.

Tuahang in Kawlgam ah daihna leh lungmuanna, liangko kikim a thuhoih kituh a nahoih vaihawm kidemna sang thatang tawh zawhthawh thu kisuang zaw ahihman in buaina veng theilo hi. Khuaphawk hun leh kikhel hun mahmah hi napi mihingte’ kiliatsak nopna in ong bumhai zo mahmah lai ahi hi.

Thatang suang a gitloh masuatna pen mihaite, a lungmuanglote, a guallel a kisa dente, guallelh khak ding a patau pongte leh duhhop huaihamte’ molhtum hi a, mipilte in a khuak uh masuan in manawt uh hi.

Haitatna leh ngongtatna in mimal leh minam niamkiatsak a, mipi in gentheih lawh hi.

Mizawng daipam lak ah a haupen hih sang in mihau veng a azawngpen hih ding uthuai zaw a, Zolai sang ah a pilpen sang, University ah ahai pente pil zaw lai a, mihai lak ah a pilpen hih sang in mipil lak ah ahaipen hihding uthuai zaw hi.

Angsung thei leh duhhop huaiham makai in haina pahtawi a, a mite in thu a theihding deihlo in patau den a, mipilte kihta in nawlkhin ding hanciam den hi.

Mipilte in thukhualna tawh mipi’ hoihzawkna ding khauhtak a dinpih ngam masiah, mipilte’ aw a kizak masiah mihaite leh migilote’ aw kiza den ding a, itna leh deisakna tawh nuihna sang gitloh ngongtatna hang a kahna leh hagawina ki-maingat den ding hi.

Mipilte leh thu saupi a mukholtheite in a mau’ mimal angsung kikhualna hang a a daih hithiat man un a thanem nute leh naupangte tung ah lungkhamna, gentheihna leh kahna aw a sawtlo in ong tungpah ding hi. Nute’ launa, lungkhamna leh dahna khitui in zan thapai in a lukham kawtkim sak ding a, naungekte’ kahna aw in mual le guam khempeuh thawn ding hi.

Pilna in thudam masuan a, thatang leh molhtum suan’na in gentheihna leh lungkhamna bek piangsak hi. Tdkhen