Taiwan President in Trump ahopih manin China ah thangpai

Taiwan President in Trump ahopih manin China ah thangpai

Dec. 4, 2016: Taiwan President Tsai Ing-wen in US president kiteelcing thak Donald Trump zanhal in phone in hopih in, gam nihte kikal-ah kitaunauna kipsak semna ding a genpih manin Chinate ciltang mek khaksak na bang velval leuleu uh hi. Taiwan in China tawh kitauna hoih a neih manin USte lungkim loin kizopna (diplomatic ties) 1979 panin na sat tat a, tua khit nung US president lak panin Taiwan president hopih masa pen Trump hi lai hi.

Trump in vote a zon’ lai-in (campaign) China pen sum amau i deih dandan in a hei (“currency manipulator”) na ci mun mahmah a, China tawh sum bawlna lamsang US ah China bawl van kipualutte siah tampipi (high tariffs) lak ding hi na ci hi. Obama in bel a zuau ngian a sel zawh ma-in kilemna bawl nuam kineih pongin president a cing kum 2009 in China ah va zin hi.

Trump in bel China thu tawh kisai ka thugenna mah ah ka ding kip ding hi ci hi.Trump in President Tsai a hopihna uh-ah US leh Taiwan in economic, political leh security lamsang kizopna hoihzaw sem neihna ding thu kikum uh a, Trump in tu kum bul in president a cin manin Tsai nosiat in a lungdampihna ko hi.

Taiwan pen thu khempeuh neihna nei gam (sovereign country) in a kiciamteh loh hangin US in a beisa kum sawm thum sungin Taiwan tungah galkap $12 billion man na zuak ahih manin China tangtel sihtan a bang den ahi hi.

China leh Taiwan gam nih bangin a kikhenna thubuai “cross-Strait issues.” tawh kisai US in a kidin’na kilaih lo a, China leh Taiwan pen gam khat bangin ka ngaihsutna uh 3 Joint Communiques tawh thukimna ‘one China’ policy kici mah kilen a, cross-Strait kitanauna (relation) vai ah kilemna ding mah kideih hi ci-in US National Security Council spokesman Ned Price in ci hi. Ahih hangin Trump’ senior adviser Kellyanne Conway in bel Trump in US policy om sate lim takin tel a, ahi zongin laih theihna ding thuneihna nei hi ci hi.

Obama in 2011 in ‘Pivot to Asia’ policy leh Trans-Pacific Partnership (TPP) trade deal kici hong panin China kiim-ah US galkapte galdo kisinsakna a neihsak mun luat manin China leh US kikal nakpi takin hong sia hi. 2015 in liangko kikimna ding ngimna tawh Chinese President Xi Jinping in “new type of great power relations,” kici bawl ding sawm (proposed) a, tua pen Trump in a thukimpihna ding China in lamen hi.

More: Nokia te’n 2017 kumsung in Smartphone hong hawmkhia kikding

1970s lai-in US-China kitauna a bawl hoih kum 93 mi Henry Kissinger zong tu kalin China ah va zin a, China uliante va kimuhpih hi. President Xi in zan in Dr. Kissinger ka kimuhpih a, leitungah thupiang khempeuh a genna thu ka bil tawh tawh lim takin hong genpihna ka za a, mai hun ah China-U.S. kitauna ding thu hong genpih hi ci hi. Source: The Hindu/ Thang Khan Lian