Extra Income: Sum muhnadang tuamtuam ~ Carey Suante

Extra Income: Sum muhnadang tuamtuam ~ Carey Suante

Nung in I sum muhzah khanna ding in za khanna leh khasum khanna ding I kikum uhi. Tua pen a taktak in I sepnapi (primary job) hi a, I sum muhnapi (primary income) zong ahihi. Ahizong in sum muhna dang tuamtuam (alternative sources of income) zong om thei hi. Hihte pen extra income kici in, alternative income leh side income zong cih theih hi. Manipur gam Zomite in side income nak zon lua uh ahihman in side income pen neekguk cihna suak pian ta ahih man in, hih lai sung ah side income cih zanglo ding hi hang! Ei kikup ding pen a siangtho, leh eimah mah in I sepkhiatna pan sum muhnate ahihi.

Tuhun ciang in leitung mun tuamtuam ah hih alternative income-te a primary income uh a suaksak tampi omta hi. Tuate in midangte na sem nawnlo in, inn pan in amau na mah sem ta uhi. Tua bang nuntakna pen thupi kasak tawntung khat ahihi. Amau hun, amau mah in zeek uh a, a nuntakna uh amau thu hi deuh se leh kilawm hi. Mihing pen midang khat nuai a nasep nuam kisa khinlo hi. A haksazaw phial zong in eima thuthu a om leh nuntak pen ki lunggulh zaw tek hi.

Sum muhna tuamtuam

Primary Income: Hih pen I sum muhna lianpen hi a, I nasepna pan I muh I khasum hi tangpi hi. I sum muhnapi ahihi.

Alternative income: Hih pen I nasepna pan hilo mun dang pan I sum ngahte ahihi. Hih pen na laigelhna pan, na van zuakna pan, na neihsa vanluite na zuakna pan cih bang in I naseppi pan ahilo sum muhte ahihi. I sum muhna dang tuamtuamte ahihi.

Sum muhzia tuamtuam

Active income (earned income): Hih pen mi a tamzawte sum muh dan ahihi. I sepna pan I khasum, I lawh ahihi. I sep leh kingah in, I sep kei leh kingahlo thei hi. Tua man in active kici sese hi.

Passive income (residual income): Hih pen mihaute’ (a diak in khang tampi a haute) sum muh dan ahihi. Gentehna in royalty, commission, rent, etc. ahihi. Hibang sum muhna pen nasemlo a muhna zong cih theih hi. I sep leh zong a bultung bek in kisem ding hi. Tua man in passive kici hi. Tuhun ciang leuleu in internet hang in minautang zong passive income nei omta hi. (A nuai ah a kicing in kikum ni.)

Banghang alternative income kisamhiam?

Donghu ding: Nasepna tawh kisai za khanna ding leh khalawh khanna I kikum uh a, ahizong in I nasepna pen beitheilo, mangtheilo hilo hi. Tua man in sum muhna dang khatpeuh neih ding pen hoih mahmah hi. A siapen I tuah ni ciang I donghu ding ahihi.

Hauhna ding: Na nasepna a kip a, na khalawh tawh na kivak zawh peuh leh, mun dang khat pan na muhte pen khol in na meet bawl thei hi. Sum pen I zatzah tawh kihau hilo a, I zatloh zah lian mah hauhna hong suak hi.

Na talent zatna: Na nasepna ah nangma mimal talent zang khalo thei hi the. Gentehna in, lasak siam mahmah in zum sung khat ah laisun sun cih bang pen, na talent a zang khalo na suak hi. Tua man in na zum kah man ciang in na lasak siamna tawh koilai hiam ah sum mu thei ding hiteh. Ahih kei leh, innsung ah la gelh in, na late album (video/audio) bawl in zuak theih hi.

Laigelh lunglut leh siam khat na hih leh na laibu bawl in zuak thieh hi. Music siam khat na hih leh nai khat, nai nih sung pub, restaurant khat ah ahih kei leh, kikhopna khat ah music tum in sum lawh theih hi. Hih in nangma mimal lungkimna zong hong pia zaw ding hi. Lawhcing kisakna zong om zaw hi.

Na pension ciang na zompah thei hi: Mihing khat kum 60 ciang bang na kisem thei hi. (Gam omna tawh zong kisai hi). I pension zawh ciang in zong ne lai ding dawn lai ding I hih man in sum pen kisam lai veve hi. Tua ban ah tu-le-ta tam na neih leh na khalawh pan a na kholsa (pension scheme/fund/retirement fund) bek tawh haksa kha ding hi.

Tua ni ciang, na man hunhun a na lamtoh hih sum muhna pen hong manpha mahmah ta ding hi. Kum tampi mah sem khin ta ding na hih man in zong lawhcing mahmah ta kha ding a, nang sep zong kisam nawnlo kha ding hi. Nang na sep ngap kei leh a sem ding khangno khat peuh na nasem ding in na cial thei ta kha ding hi. Tua ciang in nang passive income nei na suak ding hi.

Sihna manna na tuah leh na innkuanpihte’n zomto thei hi.: ei mimal siamna leh theihna ah a kingalo sum muhna khat na neih leh nang na om kei zong na innkuanpihte khat in na zom thei hi. Hih bang sepnate lak ah van zuak, real estate agent, website cih bangte ahihi. A kiluah sawn thei sum muhnate cihna ahihi. Sumbuk kician mahmah khat na neih leh a khangkhang I kiluah sawn theih ahihi.

Alternative income source banghang omhiam?

Laigelh – Laigelh siam khat na hih leh na laigelhte zuak theih ahihi. Tangthu gelh in publisher (laibu bawlte) kiang ah hong khetsak nuam uh hiam ci in kan theih hi. Hong khetsak uh leh sum naak khat nei na suak ding hi. Article khat leh nih bek zong zuak theih hi. A tangpi in Zolai tawh sum muhna om thei nailo a, ahizong in English tawh na gelh leh website, magazine, newspaper leh publisherte’n hong lei nuam uhi.

Blogging – Blog na neih leh tua zong sum muhna in zat theih hi. Na laigelhte ebook in bawl in na zuak thei hi. Visitor na hauh leh advertisement na koih thei a, tua pan sum na mu thei hi. Na capital investment zong tamlo hi. Kum khat in webhosting leh domain man $100 kiim hi lel ding hi. A free zong om hi – Blogger.com, WordPress.com, adg adg.

Web writing/online writing – Blog na nei kei zong in blog neite kiang ah na laigelhte na zuak thei hi. Blog minthang pawlkhat in laigelh siam nih leh thum laigelh ding in cial uh a, article khat ah $5 pan $100 dong a pia zong om hi. Na article English tawh kigelh a hih ding hi.

Ghosting Writing: Hih pen mi khat min in nang laigelh ding cihna hi. Na laigelhte ah nang min tuanglo ding a, na gelhsak pa min tuang ding hi. Hih bang a laigelh zong tam mahmah hi.

Music tum/Lasakna – Lasiam, music tum siam khat na hih leh, pub, restaurant leh hotel ah leh mopawi, pawi khat peuhpeuh ah sum lawh theih hi. Hih bang a na siamna zang na hih lam mi na theihsak ding kisam bek hi.

Typing/data entry – Lai khet ding a nei a kisam om tawntung hi. Hih dan nasepnate inn pan zong sep theih hi tangpi hi.

Transcription – Hih zong inn pan sem theih nam mah hi a, nasep ding hong pia ding kisam bek hi. A kicing zaw na theih nop leh hiah ka blog ah na sim in!

Nau kepna – Na innvente naukem bek in zong sum muhna khat piang thei hi. Khangnote in zong a hih theih ding khat ahihi. Siamna tuam kisam lo hi.

Teaching/coaching – Lai hilh in zong ni khat nai khat nai nih sung (na zum kah man ciang) bang sum muhna na nei thei hi. Lai lam bek hilo in swimming, stitching (khauphan), pak bawl dan, drawing, sketching cih bang tuamtuam class bawl theih hi. Na hun-ol neih hunsung khat a na bawl ding hi lel hi.

Designing – website, logo, visiting card, t-shirt, interior designing, landscaping cih bang siamte a ding in tulai ciang in na omna tawh kisai vetlo in sum muh theih hi. Na siamnate blog/website khat pan lak khiat ding hi a, tua pan na nasep hoih a sa peuhmah in amau a ding sem ding in hong cial ding uhi. Hih bang nasepna pen freelance zong kici hi.

Blog/website bawl: Website bawl, blog bawl (bawl ka cih ciang a set up ciang hi) na siam leh hih bek in zong mi a bawl theilote’n sum pia in hong cial ngam mahmah ding uhi.

Commissioning – Midang khat I van hiam, service khat peuh na zuak sawn sak ciang in tua pan sum hong kipia pen commission kici hi. A na nasepsakpa’ agent na suak hi.

A tung ah na muh bang in sep theih ding tam mahmah hi. Nang lunglutna leh siamna tawh kisai bek a, sum muh beh theih na ding tam mahmah hi. A tung ah I genloh a dang pawlkhat:

• Consulting
• Van zuak
• Subscription/membership zuak
• Affiliate marketing
• Modelling
• Voice-over
• Acting
• Investing
• Stock marketing
• Real estate development
• Real estate agent
• Survey
• Ghost shopper
• Photography
• Videography
• Carpentry
• Electrician
• Repairing electronic products

Warning

Extra income neih ding a thupi ahih tei hang in innkuan kilemlohna ding leh kisiatna ding ahih loh ding thupi zaw hi. Sum bek tawh mihing ki nungta lo hi. Extra income pen tulaitak na nasepna ah lungkimlo, na lunglutna lam hilo, na khalawh khamlo cih bang ahih leh na lungkim na ding in hoih hi.

Na khalawh na kha veve a, kisap luatna a om kei leh extra income pen zong tangtang ding kisamlo kha ding hi. Hong sau lua kha ahih man in Extra income tawh kisai a sawtlo in zoplai ding in koih ni. Carey Suante