Singapore ah Zika Virus ngahthak mi 27 kimukhia leuleu, mi 242 phata

Singapore ah Zika Virus ngahthak mi 27 kimukhia leuleu, mi 242 phata

Singapore gamsung ah Zika Virus angahthak mi 27 pen tuni Sunday (04 September) ni in ki mukhia leuleu cih kumpi thunei te’n genkhia uhhi. Tuni akimuthak tengtawh akigawm in Singapore gamsung ah Zika Virus angah mi 242 tak phatota hi.

Ministry of Health (MOH) leh National Environment Agency (NEA) te Joint Statement bawlkhopna ah hih akimuthak Zika Virus ngahlak ah mi 25 tepen Aljunied Crescent/ Sims Drive/ Kallang Way/ Paya Lebar Way cih kuamsungteng panhi cileuleu uhhi.

Joo Seng Road vengsungpan inzong tuni Zika Virus ngah khat kihel a, nungdiak inzong hihvengsung panin mikhat in ngahngeikhin hi.

Thokang piankhiattheih nading in aki ummawhna munkhempeuh Vector Control ci’n thaza kikap in ki siansuah kawikawi hi.

NEA te genkhiatna ah Joo Seng Road kuamsungteng zong lungmuanhuai omnanwlo ahih manin Vector Control kinakpat mahmahding ci’n genkhia uhhi. ZD Sawltak #zomidaily