Scientist ten Pasalte natui loin naungek kibawl thei ding hi ci

Scientist ten Pasalte natui loin naungek kibawl thei ding hi ci

Sept. 15, 2016: Scientist ten zatui tuamtuam hel khawm/gawm khawm (cocktail chemicals) in pasalte natui (bawtui) tawh kibang natui bawl tawm ‘artificial sperm’ kici zangin numeite natui (egg) kikhem thei ding a, tua in naubu sunga kipan tung naungek (kha nih a phak ma tan) embryo kici piangsak thei ding hi ci-in tangko khia ta uh hi. Hih bang scientist ten a muh khiatna hangun zatui limtak-a zat ding a deih pawl leh a tangkopih pawl “medical ethics campaigners” kicite patausak mahmah hi.

Na tel tak-a a kancian (researchers) ten hih bang technology kizang leh pasal ciing (nau nei thei lote) nei numei nau nei nuam napi pasalte natui zang nuam lo ten nau a paai theihna dingun nakpi takin huh ding hi ci uh hi.

Scientist ten hih bawl tawn natui (artificial sperm) panin naungek kipiangsakte pen numei in piang ding a, a nute uh tawh a mel kibang linlian ding hi ci uh hi. Ahih hangin hih bangin natui bawl tawm kinak zat lua leh numei tam cih takin hong tam ding a, minam khat sung/kipawlna/khua leh tui (society) pen numeite ukna leh pasalte nenniamna suak ding hi cih zong lauhuai hi ci uh hi. Hih bang misiam ten a muh khiat manun UK uliante zong patau pian ta uh hi.

Bang hang hiam cih leh UK ah nau nei thei lote kikep theihna ding a om hangin natui om loin naungek bawl ding thukham in phal lo hi. Hih bangin natui lo tawh naungek bawl theihna ding “artificial sperms” kici pen US gam sunga om Los Angeles khuapi-a Institute for Reproductive Medicine and Genetics kici-a research siamte muh khiat ahi hi.

Reproductive Medicine and Genetics-a research bawl ten Parkinson natna neite a damna dingin khuak sunga nerve cells kici-a zat ding natui (egg) kici zong bawl ding zong nakpi takin a hanciam lai tak uh ahi hi. Hih bangin Parkison natna damsak theihna zusa tung panin sitna na nei uh a, ganhing neu nonote (insects) leh ukeng/uiphuk Parkinson natna neite damsak thei ta hi.

Naungek khat leitung ngeina tawh a pian theihna dingin numeite natui kop (pairs) chromosomes kici 23 leh pasalte’ natui 23 vei hong kikhitsiang (fertilised) ciangin naungek khat naubu sungah hong kipan thei hi. Hih numeite natui 23 leh pasalte natui gawm chromosome 46 hong kigawmin hong kikhitsiang ciangin naubu sungah nuntakna hong kipan thei pan hi.

Tua bang hi napi research siam Dr.Jerry Hall leh Dr Yan-Ling Feng in numeite natui zong bawl tawm thei uh a, nuntakna kipat theihna dingin cell division kici piangsak thei a, tua bangte zusa tungah sitna nei uh a, lawhcing hi cih a theih ciangun ni 13 khitin susia kik uh hi (mihing’ tungah bel kisit nai lo hi). Hih siavuante gel muhkhiat na thak pen tu ni-in Florida khuapi-a American Society of Reproductive Medicine (ASRM) kici ah lah khiatna nei ding uh hi.

ASRM director Dr. Michael Soules hih pen numeite natui ah kizang thei leh zatui lamsang zatna tuamtuam (clinical applications) ah hamphatna om ding a, mi tampi lunglut ding hi ci hi. London-a Guild Hall University a sem medical ethics tangkopih Dr. Jacqueline Laing in bel hih bang bawl tawm natui bawl khiat ding leh zat ding pen patauh huai mahmah a, scientist ten a ut peuhpeuh a hih theih/bawl theih hangun a hih/bawl ding uh cihna hi pah lo hi ci hi. Pasalte’ natui leh numeite’ natui bawl ding pen mihingte nuntakna neu etna hi ci-in gen beh hi. – Daily Mail/ Thang Khan Lian