RIO Olympics ah Cancer natna nei leh kum 54 mi khatin Gold Medal ngah

RIO Olympics ah Cancer natna nei leh kum 54 mi khatin Gold Medal ngah

Aug. 17, 2016: Kum 54 a upa leh six-time Olympian ahih banah nung kumin a sin tuap (lung) ah cancer natna om ahih manin a tuap vei lam pang kipaih khiatsak napi lungkia loin a hanciam lailai, mi ten “Puteekpa” a cih hangun lametna a khahsuah lo Argentina mi Santiago Lange in Rio Olympics 2016 Nacra 17 mixed catamaran class (sailing regatta/gunkuang tai kidemsakna) ah a kipawlpihnu Cecilia Carranza Saroli tawh khatna ngah in zanin Guanabara Bay tuipiau ah a zi leh a tapate gel in lungdam luankhi tawh a kidim a pa uh na kawicip hi.

Santiago Lange pen Olympics ah gukvei a kihelna hita a, gold medal khatvei a ngahna ahih banah Rio Olympics-a kimawl lak panin a upa pen ahi hi. A lawhcin’na mi dang ten zong lungdampih lua in a kawi ding, a khut len ding leh a nung betsak ding kitatsat lo hi. Gold medal a ki-awksak khit phetin pahtawina a kipiakna (podium) tung panin tuak suk in a tapate gel kawi hi. A ta ten a pa’n khatna a ngah khit phetin tui sungah va delh-in, a pa va kawi uh hi.

Santiagio Lange leh a gunkuang hawlpihnu Cecilia Carranza Saroli in a kipat cil un hih khialh kha uh ahih manin daan (penalty) kipia a, a tawpna pen tungin, tua panin hanciamin kipan kik uh hi. Mi’n “Puteekpa” a cih hangun lungkia loin a hanciamna hangin khatna ngah veve uh hi. A nihna ngah Australia mi Jason Waterhouse leh Lisa Darmanin hi a, point/mat khat bekin kikhia uh a, silver ngah uh a, a thumna bronze ngah pen Austria mi Thomas Zajac leh Tanja Frank ahi hi.

Santiago Raúl Lange pen September 22, 1961 in San Isidro, Argentina ah piang a, Argentine Olympic sailor leh naval engineer ahi hi. Olympics ah guk vei 1988, 1996, 2000, 2004, 2008 leh 2016 kihel hi. A gunkuang hawlpih Carlos Espínola tawh 2004 leh 2006 in Tornado category ah bronze medals ngah uh a, 2016 in Cecilia Carranza Saroli tawh Nacra 17 kidemna ah khatna ngah in, gold medal pahtawina ngah uh hi. Pahtawina a ngahna dangte:

4 times World Champion, 3 Snipe World Championships (1985, 1993,1995) 1 Tornado World Championship (2004), 1987 leh 2006 in runner-up (Snipe 1987, Tornado 2006), 2003 third place (Tornado), silver medals 1983 leh 1987 Pan American Games, bronze medal 1995 Pan American Games. Associated Press Writer Luis Henao/Wikipedia Thang Khan Lian