Pasian leh Lim ~ Rev. Fr. Damian Dal

Pasian leh Lim ~ Rev. Fr. Damian Dal

(i) Pasian lo adang nate nabia kei un! – Pasian in Moses kiangah thukham namsawm napia a, amasa pen in: “Kei in na Topa Pasian ka hihi, kei longal adang nate nabia kei dinghi” cih ahihi ((Paikhiatna 20: 2-3). Laisiangtho in, Pasian khatbek biak dingleh, Pasian ahilo mihing ahi a, ganhing ahi zongin, akibawl lim le mel te akipan, huihlak ganhing, tuisung ganhing, muhtheih muhmawh khapumpi bek nei in, avangnei anungta nakhempeuh ahizongin, tua te bia lo in, anungta, nakhempeuh abawl Pasian khatbek biakding pen Pasian hongpiak thukham hi in, Thukham namsawm sungah akhatna ahihi.

Thu Hilhkikna 4: 16-18; “Tua ahih ciangin note hoihtakin kidawm un. Horeb-ah mei sung panin Topa in note’ tungah thu hong gen ni-in, bangmah mulo na hih manun, note-a’ dingin lim khatpeuhpeuh, pasal tawh a kibang hitaleh numei tawh a kibang hitaleh, leitunga om ganhing khatpeuhpeuh tawh a kibang hitaleh, huihlaka leeng kha anei vasa khat peuhpeuh tawh a kibang hita leh, leitungah a bokvak khatpeuhpeuh tawh a kibang hitaleh, leinuai-ah a om tuisunga ngasa khat peuhpeuh tawh a kibang hitaleh, a kiseek milim bawlna tawh a sia-in nagamtat khaklohna dingun kidawm un”

Siampi Laibu 26: 1; “Note in nomau-a’ dingin a mai-ah nakun dingun milim bawlloin, a kiseek milim hitaleh biakna song hitaleh na dingsak kei dinguha, na gamsung uhah suangmilim naphutkei ding uhhi; banghang hiamcih leh kei pen Topa na Pasian uh ka hihi”

Siampi Laibu 19: 4; 25: 55; Paikhiatna 20: 2-4; 23: 24; Thu Hilkkikna 5: 6, 8; 16: 21, 22; 27: 15 te ahzong kimu theilai hi.

(ii) Pasian in Gul lim leh Vanmi te lim bawlsak

Pasian in Israel mite adingin Vanmi Cherubim lim leh Gulngo lim abawlna ding in thupia hi. Paikhiatna Laisiangtho sungah Pasian in Kherubim aci vanmisiangtho te lim bawl in, Thukham singkuang acing dingin akikoih nang leh bangci koihding cih dongin Moses tungah thu napia hi:

Nangmah in kham tawh kherub nih na bawl ding a, hehpihna tokhom mong tuakah a kiseek tua kherub-te na omsak ding hi. Mong khatah kherub khat, a mong langkhatah kherub khatmah bawlin. Hehpihna tokhom tawh a kizomin among tuakah kherub nabawl dinghi. Kherub-te in a kha te-uh a tungah zalding uha, amau’ kha te tawh hehpihna tokhom liimsunin amaute khatlekhat kimaingat ding uhhi. Hehpihna tokhom lamah kherub-te’ mai nga ding uh hi.

Singkuang tungah hehpihna tokhom na koih dinga, singkuang sungah nangkongpiakding thuciamna nakoih dinghi.Hehpihna tokhom tung, thuciamna singkuang tunga om kherub nihte kikal panin nang konghopih dinga, Israel mite-a’ dingin nang’ tungah kongpiakding thute khempeuh nang’ tungah konggen dinghi. (Paikhiatna 25: 18-22)

Topa Pasian in Moses kiangah Sumngo gul lim abawl in, singkhuam tungah akhai nading leh, Israel mite in tua akikhai sumngo gullim enin damna angah nading uh hicibangin thu napia hi:

Topa in Moses kiangah, “Gul gupha tawh a kibang sumngo gul khat bawlinla, khuamkhat tungah khai in. Gul in atukmi peuhmah in tua gul a et ciangin hingdinghi,” aci hi. Tua ahihciangin Moses in sumngo gulkhat bawl a, khuamkhat tungah akhai hi. Gul in mi khatpeuh atukleh amah in tua sumngo gul enin hingpahhi (Gamlakvakna 21: 8-9).

(iii) Banghangin lim adeih lo Pasian in Cherubim vanmi lim ahi a, sumngo gullim ahizong in bawlsak in, mite etding in koihsak hiam?

Hebrew Laikhak 9: 5 na ah: “Tua Thuciamna Singkuang tung sanah Pasian’ ompihna lim ahi kherub (Cherubim) nihte om a, tua kherub nihte in hehpihna tokhom liimsung uhhi. Hih nate’ thu tu-in aneng atawngin i gen khinzokei hi.”

Cherubim vanmi te limbawl in, Thuciamsingkuang ii lu le taw ah akoihsak na thu in: (a) Pasian Thuciam hihlai ah om hi, (b) Pasian omna mun vanmi te in uumcih dimdiam hi, (c) aki muthei lo Pasian lim le vang pen vanmite in hi ci in uumcih in bia den uhhi cih limlahna ahihi. Tua vanmi Cherubim limte amuh uhciangun Israel minam te in hihlai ah Pasian thuciam om a, hihlai ah asiangtho Pasian omhi cih atheihna dinguh hihi.

Sumngogul lim bawlin, gul gunei ii tukkhak mite in tua sumngo gul kikhai a et uhciangin damna ngah sak hi. Topa Jesu in: “Moses in gamlak khuam tungah sumngogul akhai mah bangin Mihing Tapa zong hong kikhai dinga, amah a um mi khempeuh nungta tawntung dinghi (Jn 3: 14-15), ci in hong hilhhi.

(iv) Pasian, Lim leh Christian te

Hih atunga thute tungpan in lim, milim cihte ii akhiatna leh akizatzia te i tel thei hi. Catholic Christian te bek hi loin, Moses hun pan kipan in Israel mite in “lim” te Pasian tawh kizopna in nazangkhin uhhi. Milim te bangding in leh banghangin kizanghiam?

(i) Biak dingin kizang hi loin, limlahna in akizang ahihi. Tua hangin “lim” kici hi.

(ii) Pasian nasepzia leh Pasian nasepna te mihing te mitkha ah muhtheih nadingin, limlang bangin akizang hihi.

(iii) Lim te tungah thumna, paaina, biakna leh thungetna kinei hi loin, tua lim te enin, Pasian akipan, ama bawlsa asianthosaksa vanmi te leh misiangtho te ihmit kha in mu in ihpahtawi theihnang in upna lungsim khua hongmusak “Limlahna” in kizang ahihi.

(iv) “Lim” in bangmah vangliatna nei lo in, van ahi lel hi. Hih thu hangin, tua limte in damna pia, tua lim in nalamdang piangsak cih thu Catholic pawlpi in hilhngei lo hi. Tua limte, van te zangin, Pasian in nalamdang lakkhia thei hizaw hi.

(v) Tua “lim” te in mihingte ading huhna hongpia thei loin, tua “lim” te in khuttawh kibawl lim ahi lel hi. Roma galkap te bawl Singlamteh in bangmah mannei lo hi. Ahizong in, tua Singlamteh tungah Topa Jesu hongsih na thu hangin, Jesu sihna singlamteh in man nei in, Christian te gupkhiatna limlak ahih manin, munkhempeuh ah Singlamteh kiphut hi.

Milim, ahi a, lim deihlo aci mitampi te in, amau te khuttawh bawl singlamteh mual te tung, hankhuk tungah phut in, “Thungetmual” ci in ahi zongin, tua amau te bawl, amau te phuh Singlamteh zahtakbawl in thupi sak uha, ateengah tu in, kuun in, thungen uhhi. Atomin genleng, “Lim” in limlang ahihi. Pasian tawh ikizoptheih nang, i lungsim honghuh ahihi. Rev. Fr Damian Dal (Leuven, Belgium)