Pasian’ kammal Lai Siangtho ~ David Tuang

Pasian’ kammal Lai Siangtho ~ David Tuang

Pasian’ kammal Lai Siangtho sungah, a beisa hun, tuhun leh mai lam huna thute kicing takin om a, khat khit khat hong tangtung deudeu ta hi.

Pasian’ kammal Lai Siangtho pen, mihingte’ lumgsim, kha leh pumpi adingin damna zatui hoihpen khat hi.

Pasian’ kammal Lai Siangtho tawh a nungta/kalsuan mi khat pen, Satan’ vangliatna in susia zo lo hi.

Pasian’ kammal Lai Siangtho thupisak in, a lunggulh mite’ tungah, Pasian in kha pilna(thuthuk/thusim)te hilh tawntung hi.

Pasian’ kammal Lai Siangtho tawh na nuntakna lam in. Kua mah in tua nuntakna susia zo lo ding hi.

Pasian’ kammal Lai Siangtho pen, lim lang bangin zang in la, lampi maan hong lak ding na siapa hi sak den in.

Pasian’ kammal Lai Siangtho pen, theih ding leh neih ding ciang bek hi lo a, nuntak pih ding zong ahi hi.

Pasian’ kammal Lai Siangtho tawh thuman thutak kikhentel thei bek ding hi.

Pasian’ kammal Lai Siangtho pen, ei ut bangin deih kaih ding hi lo a, ama deihna bangin zuih ding hi zaw hi.

Pasian’ kammal Lai Siangtho maanmaan in sim in la, Pumpi ading an nek bangin, kha an hi sak in. Pasian’ kammal Lai Siangtho sungah lungsim, kha leh pumpi adingin a kisam khempeuh kim takin om hi.

Pasian’ kammal Lai Siangtho in mi mawhpen ihih lam hong kitheisak a, mi hamphapente ihih lam hong kitelsak hi.

Tua ahih manin, “Pasian’ kammal Lai Siangtho pen, na khempeuh kicin’na bulpi leh i galhiam hoihpen ahi hi,” a ci nuam ihi hi. Lai sim mimal kim tungah Topa’n thupha hong pia ta hen. Amen! Khazih sungah, David Tuang