Pallium i cih banghiam? ~ Rev. Fr. Damian Dal

Pallium i cih banghiam? ~ Rev. Fr. Damian Dal

Pallium i cih in, tuucing hoihpa cih limlahna hi in, akang sitset tuuno mul tawh akibawl ahihi. Tuu no mul tawh kibawl sese hiam cihleh Topa Jesu in mihingte ahotna dingin amahmah biakpiakna tuuno in hongkipiak na limlah na zong ahihi.

Pope Benedict XVI agen na ah: pallium pen tuuno mul tawh akibawlna in, tuuno in amang, adamlo, athanem ahi, tuucingpa in aliangko ah pua in aciahpih a, nuntakna tuinak ah apaipih kik tua tuuno lim lahi naci hi (Homily, 24 April, 2005).

Hongpiankhiatna athu tom:

Pallium pen Christian kipatcil pekpan in akizang, tuucinglian te ciaptehna khat ahihi. Ahi zongin, AD 300 ciangdong laitawh nakiciapteh nailo hi. Athu in AD 312 kum in, Christian kibawlsiatna pi vengin, Christian te in suahtakna taktak nangah pan hi. Hih thuhangin, AD 312 ma a, Christian te nuntakzia leh kizopzia tampi te laitawh nakiciamtep lo in, ngeina in nakizang suksuk hi. AD 336 kum in vangam hongzuatsan ahi Pope St. Mark in amai nuai a nasem ahi siadaw (bishops) te Pallium anapiak na hoihtak in naki ciamteh hi.

Tua apiak bishop pa pen Bishop of Ostia ahihi. Hih ciaptehna pen Liber Pontificalis (Pontifical Book) ah kimu thei hi. AD 513 in, Pope Symmachus in St. Caesarius of Arles (bishop of Arles) tungah Pallium napia a, tua tawh kizom in, Italy gamsung leh apua a om siadawpi te tungah Pallium piakna nakizang hi. Tuhun ciangin pallium pen Archbishop (metropolitan bishop) te tungah kipia a, alianbel Siampipa tawh akizopna, pumkhat ahihna uhleh, siadaw (bishops) dangte tungah biakna thutawh kisai in, vantheihna thuneihna lahna ahihi.

Pallium akizatna ii khiatna

Pallium i cih pen, alianbel Siampipa (Pope) leh ama sanggam te ahi siadawte (bishops) kizopna lahna in akizang hi a, alianbel Siampipa tawh pumkhat ahihna leh, siadaw (bishops) dangte tungah nasep theihna vaipuakneihna lah na (right of jurisdiction by a metropolitan bishop) inzong akizang ahihi. Pallium icih pen liturgical vestment – biakpiakna tawh kisai vanzat khat hi in, akang tuuno mul tawh akibawl ngawng-awhkual khat ahihi. Fr. Damian Dal (Reference: Pontifical Liturgical Commission, “The Office of the Liturgical Celebrations of the Sovereign Pontiff.” Vatican)