Nuntakna tawldam ~ T. Sawmlian

Nuntakna tawldam ~ T. Sawmlian

Ni sa-in, khuahun nuam tak nuaiah innkuan a hun nuam zangkhawm dingin New York a Long Island South kici munah Louisa R Stead, a pasal Mr. Stead leh a tanu uh kum li a pha pan Lily-te pai uh hi.

Piaunel lakah, innkuan a hun nuam a zat laitakun, tuipeek a om naupang khat, huh kisam, mangbang taka kiko aw za uh a, a et uh leh pasal naupang tuikia, huh kisam mahmah, patau mahmah a kiko gawpgawp mu uh hi.

Mr. Stead in tua banga huh a kisam naupang en maimai thei loin, huh dingin tui sungah va pai a, huh a sawmna lamah a zi leh tanu muh laitak mahin, a huh sawm naupang tawh tui sungah tumsuk uh hi.

Tuaci bang a mulkimhuai taka a pasal in a nusiat zawh ciangin meigong-tagah, Mrs. Stead leh Lily pen genthei mahmahin, haksatna tampi in bawm hi. Tua bang hun ciangin Pasian muan ding a kisapna hong phawk semsem uh hi. Nikhat, nek ding an leh a leina ding sum bangmah a neihloh laitakun, inn kongkhak a hon uh leh nek ding leh sum bangzah hiam na om mawk hi!

Tua bang a Pasian a muangte tungah Pasian muanhuaina a muhna hangin Mrs. Stead in kum 1882 in, “I lungnuam hi, Jesu muang leng (Tis so sweet to trust in Jesus)” cih la hong phuak hi. I pumpi leh kha ading a Jesu nasep thupi leh amah a muangte adingin tawldamna ahih dan, a tawntung in hong ompih ding ahih manin lungmuanhuai ahihna hih la sungah kimu thei hi.

1. I lungnuam hi, Jesu muang leng, Ama hong gen bang um leng, Ama hong thuciamna muang leng, Topa’ hong cihna thei leng.

Sakkik: Jesu, Jesu ke’n ka muang hi, A muanhuai na thei zo ing. Jesu, Jesu manpha Jesu, Amah muang semsem nuam ing.

2. I lungnuam hi, Jesu muang leng, Hong sapna a si muang leng, Hong dam hong siang sakthei a si, Sungah upna tawh bual leng,

3. I lungnuam hi, Jesu muang leng, Mawhna pumpi nusia leng, Nuntak lungnop tawldam nuamna, Jesu khut tung pan sang leng.

4. Jesu kong muantheih ka nuam hi, A manpha lawmpa na hi, Hong Honpa aw a tawp dongin, Nong ompih ding ka thei hi.

Leitung nuntakna lamsuk-lamto ah, kiim le paam ah thusia-lasia leh thuthang lauhuai tuamtuamin hong umcihin, haksa sa-in, genthei kisa-in, nuntakna man nei lo bang a kingaihsut hun na nei kha hiam? A kamsia deuh, a thuak diak leh pampaih den hi-in na kitheih hun bang a om zelzel hiam? Ahih kei leh mite muhna a nuamsa mahmah ding bangin, sung lamah lungnopna, lungmuanna nei loin, gim le tawl pi in na om kha hiam?

Mrs. Stead in a haksat mahmah hun, a gentheih mahmah hun, a lungkham mahmah hunin Topa hoihna muh sawm teitei, lamen den, Pasian muang ngiat ahih manin, tuaci bang hunah amah a muangte tungah Pasian a muanhuaina mu a, tua bek zong hi loin, tuhun eite ading nangawn a la manpha hong phuak thei hi.

I kial a i vah zongin, i nei a i sam zongin, thusia leh thuhoih in hong kimvelin, mite in hong simmawh hong pahtawi hangin, mi in hong theihpih a, hong theihpih kei zongin a tawldam nuntakna kinei ding hi; lungnopna ahi a kip a kho, a muanhuaiden, a manpha lawmpa ahi Jesu muang lehang!

“Na lungsim khempeuh tawh Topa muang inla, nang’ theihna ah kinga kei in” (Pau. 3:5). “Topa tungah na vai teng ap in; amah muang in, amah in hong sem ding hi (Pau. 37:5). [Jesu in], “Van-gik puain a him mi khempeuh aw, ka kiangah hong pai un; tawldamna kong pia ding hi” (Mat. 11:28) ci hi. Nipini zat nuam ciat ni ei… T. Sawmlian ~~daihna_cabin 270621