Nambat 11 leh Mr. George Floyd

Nambat 11 leh Mr. George Floyd

Thupatna: Tu hun ciangin, numei naupang in English kinopneh, a thei kitam mahmah ta, lungdam huai hi. Tua thu hangin, “Ant or Termite” cihte pen “Miksi – Leikha” hi cih thei tek kha ding hi hang. A thuk zawin a kan laite in “Ant” one word bekbek panin, a tawmpenpen laimal 5/6 bang dawngtawi thei lai kha ding uh hi. Gtn.

• Ant ,n. miksi
• Anthill ,n. miksibu, miksikua, miksisai
• Myrmecophobia ,n. miksi/leikhate kihtat launa
• Myrmecophagous ,a. miksi-leikha nei-in kivaak
• Myrmecology ,n. miksi-leikha thusinna
• Myrmecopgagy ,n. miksi-leikha ne-in
• kivaakna…cih bangin Dictionary bawlpa (Lexicograpger) khat in hong gual suk thei kha ding hi.

Malsimna Number-te zong, a diakin Pasian’ Kammal Lai Siangtho sung bangah

• 3…in a bukim kop khat,
• 4/40….in Pasian khut ii sehsa thu cih ahi zongin, sittelna, khalhna, leh etcikna,
• 7….in kicinna nambat,
• 8….pen kipat thakna, nuntakna thak,
• 10….in zong kopcing ta hi cihna leh
• 50….Jubilee kum cin kum hi-a, salte in suahtakna ngahin, leiba a kimaisak kum cih bangin Lai
• Siangtho sung pan hih Nambatte in khiatna na nei ciat lua uh hi.

Nambat 11 leh Mr. George Floyd:

May 25, 2020 ni-in, Minneapolis, USA ah Polik bu khat in Mr. George Floyd (mivompa) minit 8 leh setkaan 46 sung khe tawh nekcipin, manlum hi. “GEORGE FLOYD” kici min laimal gawm mal 11 pha hi ven maw! Lungkham lungzinna nambat, ci uh hi. USA sung khuapi 100 val leh leitung mun dangah lungphona kinei a, White House kongbiang dong va neh ta uh hi. Police cars haltum, innte haltum, saite luhin vante ciahpih cih bangin lungzinna piangsak uh hi.

Tuma kum 5 lai Mecca ah Lungzinna:

September 11, 2015 lai Mecca khua ah, Haji biakna pawi siim mite in thu a nget khukdin laitakin, vangikpi domna Crane tuukin mi 250 ding in sih lawh uh hi.

Tuma kum 9 lai Japan ah Lungzinna:

March 11, 2011 kumin Japangam leilu lamah, pi 36 asaang, tuidalpi kantanin Tsunamis in mawtawte taisuk, mite taisuk, innte susua-in taisuk, lote lampite siasakin, lungzinna na piang hi. FGA, Rgn ah ei Tedim papite leh Pasian’ nasem a om thei teng in, Tonzang uk subga, bengh kicinvai, koicih lehang, cinit sak kik thei ding cih, kikum leh thu ka nget ma uh, nai 3 lai-a, thupiang ahi hi.

Tuma kum 19 lai USA ah Lungzinna:

2001 January 1 pan, September 11, 2001 ciang, ni 254 om hi. 2+5+4 = 11 pha lian hi. “NOSTRADAMUS” min malgawm 11 mah na om sema, hih pa’ muhkholhna ah “Iron Bird” ci-in, na mukhol hi. Tua Sik Vasapi Aircraft Serial Number amasa bel pen, 11 in New York World Trade Twin Tower 1, leilu lama bel na phupai masa hi. Tua sungah mi Passengers 92 na tuanga, 9+2= 11 mah na pha hi.

Sik Vasapi a Nihna ii Serial Number 77 sungah, Passengers “65” na tuang uh hi. 6+5= 11 mah na pha leuleu deihkaih hi peuh mah lo mate!

1993 kumin, Mr. “RAMZI YOUSEF” in hih World Trade Tower na suksiat sawm ngei hi. A min laimal gawm lehang, “11” mah na pha zel lian se veh e!

“NEW YORK CITY” pah phot, laimal gawm “11” na pha khinkhian zawlai! Mi ngongtat makai’ gam min en dih ve, “AFGHANISTAN” zong laimal 11 mah na cing sese mawk veh e!

Washington D.C ah zong na ngongtat sem hi. “THE PENTAGON,” zong laimal 11 na pha sem veh e! “COINCIDENCE” ah mal 11 na pha sem “KITUAKKHASE” cih Zokam nangawn ah laimal 11 na om mawk veh e!

Thukhu’pna:

Nambatvai ih gen ciangin, Khristian ih hihna tawh, lawkivai, khutlam et, biden (fortube-telling/ဗေဒင်) vai lua na sa hiam? Na phawka, na phawk kha kei zongin; na um a, na um kha kei zongin, hih malsimna Number-te poimawh veh aw, ci lo na Hiam!!! Lungsim Sayavuante in “Hendecaphobia” a cih uh, Nambat 11 kihtat launa hong nei sam ken maw! Ka lungdam, Thomas Pau Gin Mang, Th.M, D.Miss Creation Family ///Tomkal Melbourne///

Source:

• (i) Ka thuciantehna Note sung pan
• (ii) Evan. Pum Khan Nang ii gelh “Thu Tuamtuam”
• (iii) Tulai (Kisungzopna) Internet pan