Minambup ading Dahna: Pu Cin Sian Thang

Minambup ading Dahna: Pu Cin Sian Thang – Nimit – July 31, 2021 Laisuah No. 20210706

Zomi te makai pi khat ahi Dr. Pu Chin Sian Thang in 2021, July 31, 5:40 PM hun in Pasian kiangah hong ciahsan cih za i hih manin Zomi Federal Union (ZFU) in dah mahmahna thu i pulak hi.

I Pu pen Myanmar gam-ah Federal Democracy om theih nading in kum tampi sung hamsatna thuakin lung kialo takin ma hong panpih i makai pipa hi-a, Galkap ukna kum tampi sung kimat kihenna, bawlsiatna leh gentheih hamsatna tampi a thuak hangin lungkia lo, a nungkik ngiatlo, taaisim busim lo a, tangtak in a ding a zahtak huai mahmah i Pu ahi hi. Zomi te bek thamloh Myanmar gambupin zong hong zahtak pih i muan mahmah makai pipa ahi hi. Ama’ hong nusiatna pen minam bup ading dahna leh supna lianpi khat ahi hi.

I Pu hong nusiatna hangin a dah a kap a innkuanpihte, tanau, pawlpi pih leh lawm le gualte tungah a lamdang Pasian hehnepna hong tun theih nading thu i ngen hi.

Zomi te hong huai in, ki pumkhat aa, khutkhat tawi, khekhat khai bangin, ki huai diamdiam, ki it liailiai in, Zomi sung ah Zaleen tak om ding na tup leh na ngim na te khansawn ten tuubang cingin, lambang zuih zawh nading thupha hong nusiat in maw. Zomi te nunna phunggua bang hong hahsiam Zomi Huaisiam Zuapa aw ci in zahtakna lianpi tawh, ut lo pipi in, Mangpha hong paih ung ei. Zomi Federal Union

DAH MAHMAHNA

Nimit : August 1, 2021 – 1988 pan 2021 dong kum (33) sung tawntung ZNC/ZCD hong makaih in ZOMI te gual tawh tanh bangkim theih na’ng zuih ding Policy (4) nong khunsak hi.

1961 Taunggyi Conference pan mabang na pat na sepnate Kawlgam Politic leh ZOMI te tangthu ah cikmah hun in mang ngei nawnlo ding hi.

1998 kum in ukna buluh galkapte nasia takin a linglawngsak CRPP nong patkhiatna Kawlgam tangthu ah bei ngei nawnlo bek thamlo in, i minam min ahi ZOMI mahmah zong Kawlgam sung leh Leitungbup ah hong kizelsak na hi hi.

More: ZNC pan ZCD nasepna leh Pu Chin Sian Thang naingangyi sepna tomkim

1961 pan nong nusiatni dongmah na ngim na tupna ahi Federal thu a gen, a sungh den na hih manin “FEDERAL PU” ci-in kong pahtawi uhhi. A dah, a kap tu leh ta te, Gamvai naseppihte leh ZOMI bup tawh kibangin ka DAH mahmah uh hi. Zomi Congress for Democracy – Central Executive Committe, Headquarters