Mangpha Pu Thian Za Thang @ Pu Thang Bawk, Kum 71 (Tongseal beh)

Mangpha Pu Thian Za Thang @ Pu Thang Bawk, Kum 71 (Tongseal beh)

Dahna Pulakna (Condolence Letter) USA gam Virginia State Alexandria Khuapi aa ateng Pu Thian Za Thang, @ Pu Thang Bawk kum (71) in abeisa January 6, 2018 nitak nai 8:48 pm hun in a tenna innphualzangpan damlohna hangtawh mual ong liapsanta cihthu ih zakmanin Zomi Innkuan USA kipawlna in nakpitakin kidahpih, kilainatpih hi.

Pu Thang Bawk te innkuanpen Zogam,Tedim township, Khuasak ah teng uhhi. Zogam a omsung ama nasepngeite ahihleh Thuklai State High School ah laiatpi sawtpi tak sem a, America Sizang Innkuan (ASI) ah zongh Advisor leh SCBC (Siyin-Chin Baptist Church), Maryland ah life time deacon sem ahihmanin papi citak mahmah khat in kiciamteh hi.

Pu Thang Bawk pen USA leitang tunga ong nusia Zomi sanggam laizom khat ahihmanin dahpihna, lainatpihna lahkhiatna in Zomi Innkuan USA kipawlna in Zomi Innkuan DC Area makaite tungtawnin paakkual khat tawh mangpha khakna kinei ding hi.

Ih it mahmah Pu Thang Bawk tawh a nunungpen hunzatkhop ding nipen ong tungding January 13, 2018 (Saturday) ni Jefferson Funeral Chapel, 5755 Castlewellan Drive, Alexandria, VA 22315 ah zingsang 10:00am to11:00am hunsungteng viewing hun hidinga 11:00am to12:00pm kikal hunin Siyin Chin Baptist Church pawlpite makaihna tawh a nunungpen hehnep hunbawlna kinei ding hi. tuakhitciangin Mount Com- fort Cemetery ah vuina kinei suak ding hi.

Pu Thang Bawk ong nusiatna hang aa a dah akap alungleng khuangai a zi atate, pianpih sangggam laizom teng, Tanau meltheih, Khuapih tuipih, beh leh phung, lawm leh gual khempeuh tungah ibiak vaanglian Pasian khasiangtho in a makiangpan a ong pai hehnepna bucing ong piaksak henla, aluang khituite ong nulsakin lungnop tawldamna ong guan kimtek tahen cih Zomi Innkuan USA kipawlna in thu kangen uh hi.

Dahpihna Lianpitawh,

Tg, Kai Lam Thang
Secretary of Genvai Zomi Innkuan USA, Inc.
January 12, 2018