Malaysia TM te’n Internet Speed ahat semsemding in vaihawm

Malaysia TM te’n Internet Speed ahat semsemding in vaihawm

Malaysia gamsung ah Internet Server Provider minthang mahmahkhat ahi Telekom Malaysia Bhd (TM) te’n hongtungding maikumnih sungin Internet zatman tawmmansak zawding leh Speed hatsak semsemding uh ci’n zanni in genkhia uhhi. Mailam ah Internet zatman tawm mansakzawding uh ahih manin, tulaitak in TM panin Internet Plan aneisa te Internet Speed ahatzaw in Free Upgrade bawlsakding uh cihi.

Adiakdiak in TM Plan lakpan in VIP5 leh VIP10 Plan te nalakkhit leh hongtungding December kha akipan Speed Upgrade hongbawlsakding uhhi. TM Plan aneisa tepen asum kikhiam loding a, napiak ngeizahmah piaksuak kulding hi. Ahi zongin Internet Speed pen azahnih in amanlang dingin hongki khanding hi.

Gentehna in tulaitak TM Plan lakpan in VIP5 Plan nalakleh khakhat RM149 + GST hi a, tua VIP5 Plan ii Speed pen 5 Mbps ahihi. December khaciang in hih VIP5 Plan ala tepen asum piakbeh kullo in, Speed ahatna 10 Mbps ah amawkna in Free Upgrade hong bawlsakding uhhi.

Tulaitak TM Company te’n Malaysia gamsung ah Broadband Custombers mi 2.37 Million nei uh cihi. Tualak ah 900,000 tepen Unifi Custombers vive ahi uhhi.

TM Broadband Customber lakah 60% khawngin tulaitak 4 Mbps ciangciangbek Speed ngah uhhi. Unifi Customber te ahihleh 68% khawngin amaulak Package tawh kizui in 10 Mbps leh atungsiah Speed ngah uhhi.

Hongtungding January 2017 akipan Malaysia gamsung ah TM Company te’n Internet khasim asaapman khanlozaw in, Speed ahatna khanding uh cih limgel mahmah uhhi. Ageelbang un hong septakpi uhleh TM leh Unifi Customber te adingin Internet zatdan Speed nopsemsem dinghi. ZD Sawltak #zomidaily