Lungnopna thusim

Lungnopna thusim

Mipawl khat neihlelam kicing in aneih uh hangin lungsim suakta lo mi tampi om hi.

Ka zakngei tangthu khat ah …
Puteek khat in asihma in atapa sam in
“Ka ta aw kei ka ci dam nawnlo ahihman in sawtvei hong ompih man nawnlo ding hing. Na mailam nuntakna ah lungnuam tak akantan zo dingin hong lam-en ing ei.”

“Pa … nuntakna sungah kici om leng lungnopna kingah thei ding aihia hong gen ve?”

“ Ka ta aw paikhia inla apualam aa midangte nuntakna te va en in. Amau te in lungnopna nangah nading lampi te hong gen ding uh hi.”

Puteek pa asih khitteh atapa zong lungnopna zong dingin hong zinkhia hi. Asawtlo in gun gei khat hong tungin tua gun gei ah sakol tui dawn laitak khat amu hi. Tua sakol pen gawngin ah teek mahmah ta hi. Sakol in dong hi
“tangvalno … nang kawh pai ding?”
“Lungnopna zong ding. Koi lam om cih na theihleh hong gen ve?”

“Hong gen ning …tangval aw … Kei pen ka neulai in lopa ngek bek ne in, tui siangtho dawn ding cih bek ka lungsim sung ah om hi. Sakol ankuang sung ah ka lu khumsuk leng ka kamsungah an abaihsa in hong tung hi. Nek ding le lup ding simloh bang mah ka ngaihsun ngei kei hi. Tua hun lai in leitung aa nuam asa pen khat in ka ki ngaihsun hi. Ahihang tu in ka teek ciangin mite in kei hong thusim nawnlo hi. Tua ahihman in tangvalno aw kong vaikhak nop ah na khangno lai in na khangno hun manpha takin zat siam in. Kei bang dan in na khangnona mawk bei sak kei in. Ei aading midangte in abaihsa takin hong vaihawm sakna te tungah nuamsa in zual kha kei in. Na khempeuh pen thatang, hansanna le cihtakna te tawh hanciam ding ahi hi. Midang te tung napiak ding lungnop te tawh ki lungkim sak in. Buaina tuamtuam te lau kei in. Tua hileh lungnopna in na khantawn hong zui ding hi.”

Tangvalno pa zong sakol tawh kikhen in akhualzin hong zom hi. Lampi ah gul khat tawh hong kituak in tua gul in
“kawh pai ding na hiam tangvalno aw ..” ci in hong dong hi.
“Lungnopna zong ding aci. A omna natheih leh nong gen ve”

“Hong gen mah ning ei … Kei pen ka hakawm aa om ka gu te tawh kiphasak in ka om hi. Mi khempeuh in kei hong lau in kua mah kei sang akhauh zaw omlo aive ci in ka um kha ngei hi. Ahihang ka upmawh pen ka khial gige mawk hi. Ataktak in mihing te in kei pen thah ding zahdong aa hong mudah na hi mawk hi. Tua ahihciang aa mihing te ahih nak leh lau in ka kihem khia in ka bu den hi. Mihing te ii kam ah zong gu om hi. Na kammal te tawh midang te na sak nading pau kha kei in. Tua hileh na khansung in launa cih om nawnlo ding hi. Lau aa kibu cih zong om nawnlo ding hi. Tua hileh lungnopna na mu ding hi.”

Gul ii thugen angaih khit ciangin khangno pa in akhualzin hong zom leuleu hi. Hong pai … hong pai in munkhat atun ciang singdawn khat ah utong khat amu hi.

“Kawh pai ding na tangvalno?”
“Lungnopna zong ding aci … hong gen ve a omna natheih leh?”
“ Aw … tangval … nang kong muhdan gimtuak hong sa si ing maw. Nong din khiat zawh sawtta hingel inteh maw. Na maitang tungah khua-ul te, na puante zong nin mang khinta, na lungsim zong gimtuak lua. Hi dan tawh lam pailai leteh na kituahpih te in lam hongpelh san ding hi. Hibang tawh na hileh lungnopna in zong nang hong pelh kha ngel ding hi. Hong gen ning … na lungsim sung hita leh na pumtung aa ninteng kising khia inla siangtho takin hong omdih in.Tua hileh nakiim napaam siangtho in hong etlawm ding hi. Tua hun ciang lungnopna nangkiang hong pai ding hi.

Khangno pa in zong telpah lian in innlam zuan in hong tai vingveng hi. Lungnopna pen mun khempeuh ah zon kullo hi. Lungnopna pen mihing te lungtang sungah aomlam hong phawk kha ta hi. Lungnopna na deihleh amasa in nalungsim sung aa hoihloh nateng lakhia inla siangtho sak masa in tua hileh lungnopna in na nung hong zui ding hi.

Ref: He Yue Qing ii gelh Chicken soup for the soul laibu sung pan

Suumpi
Zingsol