Lungdam Kohna – Ni Thupi

Lungdam Kohna – Ni Thupi

Dear Zomi U leh Nau, Leitung ah ni thupi pen a i neih nih om a, i Nu sung pan mihing a i pian khiat, i suah khiat ni, leh i nuntakna hu bei a, i sih ni a hi hi. Tua zom ah, kolbulh khaukhih thuak a, Thong Inn sung pan suahtak ni hi dingin ka ngaih tuah hi. Suah ni leh sih ni pen mihing khempeuh in i phut khak thu hi a, kolbulh khaukhih cih pen mihing khempeuh in ki tuak kim lo hi.

Ka om na Malaysia gam sungah lamet kholh loh in, 11 Ocotober 2014 in CID te in Selangor State sung Kepong ah hong man uh a, Jinjang Lokap ah ni 14 sung, Sungai Buloh Penjera ah ni 26, tua pan in, Semenyih Camp hong puak uh a, UNHCR nasepna zangin i biak Pasian in tuni cidam tak in hong suak ta sak hi.

Kawlgam mi bekbek 97 ka pha uh a, Zomi 3 ka kihel uh hi. Sanggam pih pawlkhat Chin State sung pan in zong honkhat mah kihel hi. Camp sung pen haksatna gen ding hi lehang bei theillo ding a, kha 4 val deuh ka om sungin, ko giahna block sung bek ah mi 2 in hong sih san mawk hi. Tulai tak a om lai Zomi pih bekbek 100 bang val lai uh a, tua te a dingin zong, nakpi tak in thu nget sak lai ni.

UN officer ten hong gen na uh ah, “mailam ah kimat kihen natuak uh leh UN in mawh puak hong lazo nawnlo ding hi ung” ci-in, hamsa sa pipi in hong vaikhak uh hi. Leitung i nuntakna sungah i muan i belh leh i bukna pen Pasian bek hi a, Pasian nasepna ah UN tungtawn, kumpi tungtawn, NGO tungtawn cih bangin hong pai a hihna kaphawk thak thak hi.

Tuni in i ki ngakna suangpi a kip kho taktak ta hiam?

I muan mahmah UN i cih in zong ciangtan nei a, Pasian a hih leh a tawntung a hong huh ding leh i natna hong damsak ding, i mawhna hong maisak ding, hankhuk tung ding hong suakta sak, muvanlai banga tha hong guan, vanglian Pasian, tawntung nopsakna kumpi ahi hi.

Note: Hih lai tuni 3 Apr 2015 ni kong khah khiat pat hangin, zanni 2 Apr 2015 ni ka gelh ahih manin, a nuai ah 2 April 2015 mah in ka gelh a hi hi. Dal Sian Hung (Kuala Lumpur, Malaysia 2 April 2015)