Kum 2500 valsung gam neilo in omta leh a mangthanglo Israel mite

Kum 2500 valsung gam neilo in omta leh a mangthanglo Israel mite

1. BC 2000 – 1700 : Abraham leh Israel pupate hun. Hih hun panin Israel kici minam hong piang hi. Hih hun panin Israel mite in tangthu record kician takin nei ta uh hi.

2. BC 1700 – 1250 : Egypt gamah salsuah hun hi a, Joseph hun pan sal suah hun khempeuh huam hi.

3. BC 1250 – 1030 : Egypt gam pan Moses makaihna tawh paikhiatna leh Canan gam luah hun, Thukhente makaih hun hi.

4. BC 1030 – 930 : Kumpi Saul, Kumpi David, Kumpi Solomon te ukna hun. Hih ukna lakah David uk hun pen a nuam pen leh a minthang penpen hun ci-in kiciamteh hi. Hih hun sungin Solomon in Jerusalem biakinnpi lam hi.

5. BC 930 – 580 : Israel gam phel 2 suakin amau kumpi tuak tek tawh om uh hi. BC 722 kumin leilu lam gam leh a khuapi Samaria bei hi. Assyria te in salin paipih mang uh ahi hi. B.C 586 kumin leitaw lam gam leh a khuapi Jerusalem bei hi. Babylon kumpi Nebukhadnezzar in zo gawp ahi hi.

6. BC 587 – 538 : Babylonian (Tuhun Iraq) ukna sungah om hun.

7. BC 538 – 333 : Persian te (Tuhun Iran gam) ukna nuai ah om hun. Hih hun sung sal suahna pan Israel mite hong ciahkikin Jerusalem biakinnpi lamkik uh hi.

8. BC 333 – 63 : Hellenistic (Macedonia gam) te ukna nuai ah om hun. Alexander the Great in Persia te leh India gam pawlkhat ciang dong uk hi. Hih hunin Israel mite amau leh amau suakta takin ki-uk napi uh Kumpi Antiochus IV in biakinn ninsakin milim khawng koih gawp ahih manin Maccabean rebellion kici kumpi lehdona lianpi piang hi.

9. BC 63 – AD 636 : Rome mite ukna nuai ah om hun. Topa Jesuh suah hun lai-in Rom gam ukna nuai ah Israel mite om uh hi. Hih hun sung BC 20 kumin Herod the Great in Jerusalem biakinnpi puahpha in hoih tak lam kik a, tua pen Topa Jesuh hun lai a biakinnpi minthang mahmah pen ahi hi. Ahi zongin AD 70 kumin kisusia hi. Tua hun panin tuni dong Jerusalem biakinnpi kilam kik zo nai lo ahi hi.

10. AD 313 – 636 : Byzantine ukna nuai ah om hun. Constantinople khuapi in nei-in Rome gam nisuahna lam teng kumpi gam uk uh a, Roman Empire meizom khat mah hi, kici hi. Hih kumpi gam pen kum zalom 14 kim dong kipsuak hi.

11. AD 636 – 1099 : Arab. Hih Arab mite ukna hun sungin Jerusalem biakinnpi mun ah ‘Doom of the Rock’ kici Muslim te biakinnpi kilam a, tuni dongin Jerusalem biakinnpi kilamkik zo nai loin tua Muslim biakinnpi om suak lai phot hi.

12. AD 1099 – 1291 : Crusaders te ukna nuai ah om hun. Europe gam panin ahunhunin Khristiante in Jerusalem la kik ding, ci-in biakna gal sim dingin kuan zel uh a, tua galdo mite khut sungah kum sawt khop Israel mite om uh hi.

13. AD 1291 – 1516 : Mamluk mite ukna nuai ah om hun. Mamluk kici mite pen Arab mite in sal a a matte hi uh a, Arab gam kumpite nuai ah Galkap hangsante ahi uh hi. Kipumkhat semsem, thahat semsem uh ahih manin kum zalom 13 pan kipan zalom 16 sung teng amau leh amau in gam nei-in Muslim gam tampi uk zo uh hi. Egypt gam leh Syria gam zong Mamluk-te in sawtpi uk ngei uh hi.

14. AD 1516 – 1917 : Ottoman ukna nuai ah om hun. Ottoman Empire pen tuhun Turkey gam sung a teng minam kimte genna hi a, 1922 Turkey cih min a puak hun dong Ottoman hunin kiciamteh hi.

15. AD 1917 – 1948 : British ukna nuai ah om hun. Hih hun sungin Germany kumpi Hitler makaihna tawh “The Holocaust” kici Jew minamte 6,000,000 (Six million) val a lomlomin kithat hi. Galpi Masa pan kipan England te in leitungbup phial uk uh a, Galpi Nihna a ven zawh 1948 kum May 14 ni ciangin Israel gam kici amau leh amau ki-ukin a suakta gam khat hong suak to uh hi.

Kumpi Saul sep hun kum 20, Kumpi David sep hun Kum 40, Kumpi Solomon sep hun sung kum 40 leh Southern Kingdom bei hun B.C 586 dong sim le hang gamdangte ukna nuai ah a om loh uh kum 345 pha hi. B.C 587 pan kipan a suakta Israel gam a din kum 1948 dong sim lehang kum 2534 sung teng midangte ukcipna nuai ah om uh ahi hi.

A.D 70 ciangciang pen midangte ukcipna ahi phial ta zongin amau gam amau khua leh tui ah a minambup un teng khawm thei lai uh hi. Ahi zongin A.D 70 pan kipan A.D 1948 Independence a ngah kik dong uh amau leitang tungah zong teng kha nawn loin mundang gamdang mite khut nuai ah genthei takin kum 1878 sung bang om uh ahi hi.

Israel mite tangthu gelh mipilte in, “Israel mite tangthu pen tua kumin puk a, ahi zongin tua kumin ding kik hi…” cih tawh kiphonglokik den hi, ci uh hi. Tangthu dangte pen khan hun om napi akiam khit ciangin kiphong lokik nawn lo a, Israel mite pen kiphonglokik hamtang hi, ci uh hi. A kaikhawm: Rev. Thang Van Lian Src/ref: Britannica, Wikipedia