Kum 2010 leh Centenary ~ Rev. Gin Khan Nang

Kum 2010 leh Centenary ~ Rev. Gin Khan Nang

Tukum 2010 kumin gam nihah kum za pawi (centenary) thupi takin kizang ding hi. Khat pen Kawlgam Tedim khua-ah kizang dinga, a khat pen Zomite khuapi khat ahi Lamka khua-ah kizang ding hi. Tedim kum za pawi ding tawh kisai gen masa ni.

Zogamah missionary hong lut pen American Baptist Mission panin kum 1899 March 15 ni-in Rev. A.E. Carson te nupa Haka khua hong tung a, tua kum za pawi cinna pen kum 1999 kumin Haka khua-ah kizang zo hi. Kum 1904 kumin Pu Thuam Hang leh Pau Suan Khristian suak uh a, Khristian suah zawh kum za cinna pawi pen 2004 kumin Thuklai khua-ah kibawl hi. Sangmang masate in Haka khua panin Tedim gam lam hong van zo lo uh ahih manin Tedim khua a om ding missionary dang khat a nget uh ciangin Rev. J.H. Copete nupa Tedim a om dingin hong sawl uh hi.

Kum 1908 December kha-in Haka hong tung uh hi. Ahi zongin Carson topa tua kum April kha-in si ahih manin a zi Laura Carson ompih dingin Copete nupa pen Haka-ah kumnih thaam uh hi. Dr. E.H. East zong a zi dam lohna hangin a ciah dingin kithawi uh hi. Dr.East thakheng dingin Dr. John Woodinte nupa 1910 September kha-in hong tun’ ciangin Dr.East-te nupa zong America gam zuanin ciah uh a, Cope-te nupa in Tedim zuanin hong dingkhia-in, kum 1910 November 1 ni-in Tedim hong tung uh hi.

Pu Pau Cin Hau khan laitak tawh kituak a, J.H. Cope in Pau Cin Hau lai pen Zomite adingin zat haksa ding hi cih thei ahih manin tu-a i laimal zat “Roman Script” kici tawh ABC hong bawlsak hi. Tua ahih manin Zomite laimal hong bawlsak Cope topate nupa in Tedim hong tun uh kum za November kha ciangin cing ta ding ahih manin TBC makaihna tawh Tedim khua-ah kum za pawi thupi takin kizang ding hi. Lamka-ah zong CBA Pawlpi in zang ding cih thu kiza hi.

Tedim hong tun ciangin pau sinin, lai hong bawlsak hi. Kum 1913 ciangin Lai Shim Lai Bu, Til Shimna I kici laibu khen khia a, laibu i neih masak penpen ahi hi. Kum 1993 kumin Lamka-ah Zolai Kum 80 cinna pawi kizangin laibu zong kithoh hi. Laibu i neih zawh kumza pen kum 2013 ciangin hong tung ding hi.

A nihna pen Manipur South District kici Lamka gamah 2010 kum sungin Khristian a lut zawh kum za pawi thupi takin kizang ding hi. Manipur a Pasian thu a puak masa penpen ahih leh William Pettigrew hi. Amah pen Scotland gam Edinburg khua mi hi a, England gam Anglican Pawlpi mi ahi hi. Arlington Aborigine Mission sawlna tawh India hong pai-in Dhaka-ah om phot hi. Tua khit ciangin Assam gam a sem American Baptist Mission tawh kizomin tuikiphumkik a, ABM missionary dingin kila hi.

Kum 1894 kumin Imphal hong pai-in Sanginn phuan a, kumpi in phalna pia nuam lo hi. Kum 1896 ciangin Ukrul khua-ah pai-in Sanginn phuan a, Tangkhul Nangate Pasian thu a puak masa pen ahi hi. Tua hun lai-in Manipur gam pen ABM huam ahih hangin Lamka gam pen van zo lo uh hi. Lamka gamah Aizawl lam panin Pasian thu hong lut masa zaw hi.

I theihsa bangin Aizawlah 1894 kumin England gam panin Arthington in missionary nih hong sawlin Rev.S.W. Savidge leh Rev. J.H.Lorrain in Januray 11 ni-in Sairang khua tungin tua panin Aizawl lut uh hi. Amau kum 4 a om khit uh ciangin Lunlgei lamah kisuanin Aizawl gam pen Calvinist Methodist Mission in la hi. Kum 1908 kumin Dr. Fraser England gam pan hong pai ciangin tangval khat Watkin Roberts (Sap tlangvala kici) in hong zui hi. Watkin Roberts pen mimal hanciamna tawh hong pai hi a, Dr.Fraser pen Methodist missionte zat ahi hi. Watkin Roberts in zatui sai hongin Pasian thu gen tawh thuah zel hi.

Kum 1909 kumin Senvon khua hausa Kamkholun (Thado-Kuki) in a thu za-in Senvon pan Aizawl a laisim a om Lungpau leh Thangkhai lai puasakin Pasian thu a vaikhak hi. Watkin Roberts in Lusei pau tawh kitei Johan Lai Siangtho bu khak hi. Laibu a ngah uh hangin sim thei lo uh ahih manin Kamkholun in “Pute aw, a hilh dingin nomau mahmah hong pai un,” ci-in a vaikhak ciangin Watkin Roberts leh a huh ding Savawm,a Taitesena, Luaia leh Thangburha pai uh hi. Feb.1, 1910 ni-in Aizawl pan kipan khia uh a, Feb. 5, 1910 ni-in Senvon tung uh hi. Watkin Roberts-te a ciah uh ciangin sanginn hong dingin vaikhak hi.

A ciahna uh lampi-ah Thangkhai leh Lungpau (Vaiphei mi) Khristian suak a, Manipur South Districtah Khrisitan suak masa penin kiciamteh hi. Watkin Roberts in sang hong dingin Savawma, Zanvika leh Thangchhingpuia te sawl a, May 7, 1910 ni-in Senvon tung uh hi. Tua ahih manin kim khat in Feb. 5 ni pen Missionary Day-in zang a, kim khat in May 7 ni zang uh hi. Watkin Roberts in 1913 kumin Thadou –Kuki Pioneer Mission (TKPM) min phuakin nasem hi. Senvon khua hausa Kamkholun pen Thado mi ahih manin hih min phuak hi dingin ki-um mawh hi. Kum 1924 kum ciangin North East India General Mission (NEIGM) ci-in kikheng a, kum 1930 ciangin Old Churachand kici (Lamka) munah kituah hi. Kum 1948 ciangin Presbytery tuamtuam 5-in kikhen hi. Tuate in:

• 1. Evangelical Convention Church (ECC- Paite)
• 2. Kuki Christian Association (KCA- Tahdou-Kuki)
• 3. Manipur Christian Organization (MCO- Vaiphei)
• 4. Evangelical Assembly Church (EAC- Hmar)
• 5. Evangelical Synod Church (ESC-Gangte)
• 6. South East Manipur Anal Christian Association (SEMACA-Anal)

Kum 1986 ciangin NEIGM pen Evangelical Congregational Church of India (ECCI) ci-in kikheng leuleu hi. Bang hang hiam cih leh America-ah bulpite pen Congregational Church hi a, bulpi tawh kizopna a nop zawkna dingin a laih uh ahi hi. Hih NEIGM sung pan i sanggam ECC (Paite) Pawlpi pen NEIGM pan paikhia-in Baptist ah lut uh a, Evangelical Baptist Convention ci-in Baptist World Alliance tawh kizopna bawl uh hi. Kum 2009 kisimna bangin tu laitakin EBC sungah Pawlpi148, milip 51,201 pha-in, tuiphumsa 30,255, leh hunbit nasem 282 pha hi.

Lamka gam Pawlpi tuamtuam in hun tuamtuamah kum za pawi zang ding uh hi. Independent Church of India (ICI) pawl in Feb. 5-7, sung Lamka-ah zang ding hi. Hih tawh kisai-in Jan. 6 ni-in Aizawl panin Mei det kipanin tua pen Lamka dongah paipih ding uh hi. Tua mei det pen nidanga Watkin Roberts tenna mun tu laitaka Synod Conference mun panin kipanin la uh hi (A nuai maan en in). ECCI Pawlpite leh a kizoppihte in May kha ciangin zang ding uh hi.

Lamka khua lutna Tuibuang Peace Ground kici munah Gate bawl sawm uh a, Jan. 8 ni-in Prof. L.S. Gangte in bulpatna groundbreaking nei zo hi (A nuai-ah maan en in). Tua hunah Mizogam Synod makai Rev. Zosangliana zong thugen dingin pai ding hi. Tua ahih manin 2010 sungin Zogam sak leh khangah kum za pawi kizang ziahziah ding hi. Hallelujah! Rev. Gin Khan Nang