Korea tembaw kibutna hangin Captain pa kum 36 thong kiading

Korea tembaw kibutna hangin Captain pa kum 36 thong kiading

Tukum April khasung in Korea tembaw khat kibung a, mi 300 val in sihlawh hi. Tua tembaw ahawlpa pen Capt. Lee Joon-seok kici minnei khat hi a, hih tembaw kibutsak vai hangin kum 36 thong kiasakding ci’n thukhenzum pan thu kipiata cih Fox News pan kiza hi.

Capt. Lee Joon-seok pen adiakdiak in anasep kinlohna, awlmawh lohna hangtawh thongdan kum tampi akipia hi a, tuaban ah tembaw tuipi sungah atumsuk ciangin tembaw sung aom mipi Passengers te hotkhiatding ngaihsunlo in taisai ahih manin, mithat tualthat ci’n kumtampi thong akikhia ahihi.

Hih tembaw kibutna pan asi atamzaw pen naupang kum cingnailo vive hi a, Capt. Lee Joon-seok a thongkiat kumzahding thukhenzum Court pan aki genkhiat ciangin tawm salualai uh a, akapkap tawh aki dikdik tawh mipi phiazelzul hi.

Capt. Lee Joon-seok banah adang tembaw naseppih Crew tezong kum tampipi thongdan kipia hi. Chief Engineer pan kum 30 kipia a, adang tembaw nasem mi 13 tepen kum 20 nuaisiah vive kipia hi.

Chief Engineer Park Ki-ho zong mithat tualthat tawh kibang ahih manin, kum tampi thongdan akipia ahihi. Banghanghiam cihleh tembaw tuisung ah atum ciangin anaseppih alawm te mi 2 nusia in a tembaw taisan hi. Bekthamlo ahuhding in hongpai te kiangahzong alawmte vahuh un ci’n genlo sawnsawn cimawk hi. ZD Sawltak