Malaysia, Klang Valley sungteng ah guahtui tamlua in tuicin tungkawikawi

Malaysia, Klang Valley sungteng ah guahtui tamlua in tuicin tungkawikawi

Malaysia, Klang Valley sungteng ah tuni Monday (October 30) sunlam in guahtui tamlua mahmah ahih manin, khuapisung muntuamtuam ah tuicin (Flash Flood) tungkawikawi cih theStar pan kiza hi.

Adiakdiak in Mid Valley City leh Sprint Highway Kerinchi exit kikal aom Federal Highway lamzikpi tungteng ah huaisia phadiak in, mawtaw paina lamzikpi a theihsa tui kivung zihziah hi.

Federal Highway lamzikpi pen mawtaw 4 apaikhawm theidingin 4 Lanes takin akibawl himahleh 1 Lane bekbek kizangthei in, tualoteng asauna 1km sungbang tuibekbek dimzihziah hi.

Nitaklam 3:30pm hunpawl akipan Traffic Jam huaisialua mahmah a, anakkha Driver te’nzong Video leh Photo zaihin Social Media ah khahkhia uhhi.

Bukit Jalil leh Taman Tun Dr Ismail sungteng ahzong tuahun sungteng mahin tawmveisung tuicin tungman a, Social Media tungah kizelpah hi.

Alam Sutera geinai Bukit Jalil Highway lamzikpi dungteng ah mawtaw paina lamzikpi Lanes 2 tepen buantuinin in tuamcip hi. Tuahang in Bukit Jalil Nursery leh Kinrara kikalteng Traffic Jam sakin mawtaw tampitak awkcip hi.

Video: Downpour causes flash floods in Klang Valley

TTDI MRT Station dungteng, Jalan Damansara dungteng ahzong tuicin tawmvei tungman ahih manin, mawtaw te damdam in kikhin nitnitlel hi.

Info Roadblock JPJ/Polis kici te ii Facebook Page ahzong tuicin tungin mawtaw Driver te acihmawh mahmahlaitak Video Clip khat ki khahkhia hi.

Related: Kuala Lumpur, Jalan Kuching vengsung ah Saturday ni in tui khanggawp

Kajang, Giant Hypermarket geinai Persiaran Saujana Impian dungteng ahzong lamzikpi tungah buannintui vivi kivung kemkam kawikawi hi. Guahtui tamlua mahmah ahih manin, lei anuailam Underpass tezong akizangthei omvetlo cih kiza hi. Sawltak #zomidaily