Kisa Khial Leh (Wrong Diagnosis)

Kisa Khial Leh (Wrong Diagnosis)

Kisa khial leh kibawl khial. Lungtang thagui sikhal (thrombosis) natna pen tuapbawk hu-sam (pneumonia) natna bawlin kibawlbawl mawk leh dam ngei lo ding hi. Naupang hutvei-in ciphual zel khat zong kaumakvei sa khial-in bamiton tang bekbek Syavuanpa in piapia sak mawk leh dam ngei lo dinga, hutza pia leh dam pah ding hi. A ciphual (symptom) kibang napi, a ci a phual sak taktak pen bang hiam cih Syavuante’n a zonna ah kaumak hanga phual maw, hut hanga phual cih theih khialhna (diagnostic error) om leh a damdawi zatui (remedy) zong khial pah ding hi. Wrong diagnosis on the same symptom leads to wrong remedy.

Lungdamnathu i kihilhna ah zong i kha hong gim sak ding thu teng damna sa-in i kha hong damsak ding thu teng gimna kisa khial leh i mimal, innkuan, pawlpi le i leitang in damna ngah thei lo ding hi. Pianthakna a maan a pian theih nadingin zong mihingte’ natna i zon cian kul hi. A natna bulpi pen mawhna hi ci-a na kimuh sak teh a damdawi Jesu a kisap lam hong phawk pan ding uh hi. A natna a kitheih khialh manin a sih lawh a tam mah bangin pianthakna thu ah zong a maan a hilh theih loh man un tampi tak in piangsual natna sih pih uh hi.

Coronavirus: Italy Syavuan ten Coronavirus pen tuapkeu, tuap bawk husan hak natna (pneumonia) sangin lungtang le thaguimalte ah sikhal sak (Thrombosis) natna ahihna ah bul zaw hi ci-in mu khia ta uh ci hi. A cih bangin “coronary” cih mahmah zong lungtang tawh kisai kammal hi. Italy Syavuan ten Coronavirus tawh a si mi 50 val bang a pumpi at khamin a etcianna vuah hih zah-a a kisihna pen natna (symptom) a kitheih khialhna hanga kibawl khialhna hang hi ci uh hi.

A virus in pumpi sung vante keusak, bawk sak, sisan khal sak hi. Tuap in zong phadiak mah-a, ahi zongin a siahuai pen lungtang thagui sikhal in si vat sak thei hi cih hong mukhia uh ci hi. (Kawlgam ah Sen bawl zu thawlpekte bang a dawndawnte khuak-lungtang sihui khalcip sak tawh luvai-in si ziauziau kici hi). Tua ahih manin nidanga a zat ngei loh uh ahi antibiotics, anti-inflammatory le anticoagulated zatui namte hong zang ta uh hi. (Inflammatory cihteh keh sak, bawk sak, mei banga am sak, i kam sung khawng a keh teh bawkin a kat daan nam, tua bang hunteh ci le tuisa tawh kam sung khawng i khuah gawp cih dan lam zatui hileh kilawm).

Sisan omna thaguite keusak khal sak leh tuap ah sisan tung nawn lo ahih manin tuapthun huih dikna (ventilator) a thuah penpan uh hangin phatuam lo cih mu uh hi. Tua ahih manin tuap sung sisan khalsak natna a kidam sak masak keh tuap sungah sisan lut thei lo-a, tuap ah sisan pai nawn lopi-a set tawh huih thun (ventilating) gawp pong mawk pen kimanna nei lo ci hi. Hih thu a maan leh a beisa-a a kibawl zia (treatment) uh pen a natna ahi lopi khat sakkhialhna (diagnostic error) tawh kibawlbawl ahih man vua kidamsak zo lo cihna hi ding hi.

15 March 2020 ma ciang bang Sen te in a sa, a kang, a bawk, a am, a khawlsak zatui nam ahi anti-inflammatories zatang le tohkui (influenzas) zatang ahi antibiotics te zat loh dingin gen uh-a ahi zongin Italy Syavuante in a natna pianzia (symptom) hong tel semsem uh ciangin tua zatuite hong zang uh-a cina tampi nuamtuam pah hat hat lel ngel ci hi. (Lai Siangtho sungah gam khat le gam khat kilangpan ding ci hi. Matt. 24:7. A cih mah bangin hih Covid=19 in zong kilangpanna kimawhsakna hong piang sak teltel ding hi).

Hih Coronavirus natna ah a phamawh (problem) pi pen a virus hi nawn loin a virus hanga satna keunate ci ding maw, sisan khalhnate, daih sak zawh ding kisam masa lam hih tuak hi. (Mei kat ciang meikangza kisap dan nam hileh kilawm).

Tuap sung huih thunna set (ventilator) sangin, COVID=19 tawh kisai ah pumpi sihui sung a bawk, a sa, a kang, a khalte kiam sakna antibiotics nam tawh kisai zatui nam kisam zaw hi cih Italy cidamna lam vaisaite in a muh uh ciangin kibawlzia zong a maanin hong nei thei toto ta uh ci hi. (Maan cihteh nidanga maan ngei-in tun maan nawn lo cih bang hi loin, a maan loh lam tun mu ta mu pan cih lam hizaw hi).

Gennop bulpi: a natna thei lehang dam nading neu cik khat hivaw a cih bangin dam nading pen tuap set (ventilators) pipite hi tuan loin antibiotics peuh hi lel thei hi. (Ventilator kisapna om lo cihna hipah lo. Ventilator set khawng hih COVID=19 hangin Kawlgam in ngahlawh lehang ut lua hang).

Tua mah bangin Zomi Christian pipite in ih kisap pen:

• 1. Nai-ganzi siam makai pipi (politician) i sak lai teng a sa khial khial lai (wrong diagnosis).
• 2. Kawlgam mite’ kisap pen Democracy pipi i saksak lai teng a sa khial khial lai (wrong diagnosis)
• 3. Pawlpi khangnote a thakhauh nading music i saksak lai teng a sa khial khial lai (wrong diagnosis)
• 4. Pianthak theihna crusade bek i saksak lai teng a sa khial khial lai (wrong diagnosis)
• 5. I Pawlpi kha lam ah a khantoh nadingin sumpi tam khia pen pulpit tungah pahtawina khawng i kipiakpiak lai teng a sa khial khial lai (wrong diagnosis)

✓COVID=19 dam nadingin ventilator set pipi sangin antibiotics khawng hihtuak zaw-a, tuamah bangin Kawlgam mite’ kisap i sak Democracy pipi, Zomite kisap i sak Nai-ganzi pipi na hi loin tua na up Jesu Khazih le tua na gen Lungdamna thu the Gospel (the Justification by Grace alone through faith alone in Christ Jesus alone) thu pen mah na hi gige hi cih… A khat nusia ding cihna hituan loin a kisam zaw kisa khial leh cihna hi. Kisa khial leh? Evan. Suangh Dal – Zomi Daily