Kimakaihna thak ah & Leadership Crisis ~ Pau Khat Suan

Kimakaihna thak ah & Leadership crisis ~ Pau Khat Suan

Zomite i phutkhak haksatna tampite lak ah i sepding a masapen “Leadership crisis” hi cih i gen kum 10 bang acing ding hita a, kum 10 sung in tua nasep maban bangciang tunta i hiam cih nakpitak ngaihsut huai mahmah hi.

Athu in gengen napi hang a sep ding ngaihsut a i neih kei leh i thugen pen agah ong om theilo ding mah ahi hi. Sepsawmna a om ciang bek in sepdan ding geelna omthei pan hi.

Hih sepkhiatna ding ah –

• 1) khangthak pattahna kisam hi.
• 2) kisin sak kul hi.
• 3) a kisin lai mite amau guak in zawttawm sak theih hilo hi.
• 4) pilsinna ding sanginn a kisap bangmah in, mi masate in khangthak ading kisinna ding mun le mual a geel, a vaihawmsak ding kisam hi.
• 5) na khat peuhpeuh a semngeite bek a semthei ding a ngaihsutna in i ma ongkhak mahmah ding hi.
• 6) mithak pattahna deihsak angvan tawh thu vaihawmna in mihoih muh ding khaktan a, zai huam zolo hi.
• 7) angvan khakloh a zaizaw a pualam pan hanciamna tampi piangsak thei a, tua in kidemna leh kikhenna piangsak zawsop thei hi.

Khang masa leh khangkik kidawlto diamdiamna (လက္ဆင့္ကမ္း) a ginat kei leh khangthak makaithakte nakhempeuh kithakpat den ding ahihman in i ma kitelh ngeilo ding hi. Bangzah a i pil i siam zong in thakpat denkeei tawh, Maban a ki လက္ဆင့္ကမ္း thei i kim i pam a midang namdangte’ khetul zong kibanlo ding hi.

A beisa khang 2, khang 3 i tangthu pan lesson sintheih, ngahtheih ding kicing mahmah ta hi.

Mi masate thu dot noplohna leh ki mi masa sak a thudot utluatna pen a kibang haina hi a, makai ut luatna leh ei le ei bek a makai thei kisakna pen makai ding a picinlohna ahi hi.

Huaituam nei a, angvan deuh neihna in kidemna leh kikhenna piangsak a, a huamkim zolo deihsakna bek tawh thu vaihawmna pen khangkikte gawtna suak hi.

Makaite’ cih khempeuh akawi amam, asuk ato ah “yes” aci den keei “yes man” pen “nungzui hoih” i sak laiteng, tua in leadership crisis khat pan leadership crisis thak khat ah ong tunpih bek ding hi.

More: Ngimna, sepzia leh ki makaihna te ki enkik ni ~ Khup Lian Thang

“Yes man” peuhmah makai picing suak ngeilo hi. “Yes man” bek pahtakna pen ukcip lungsim (dictatorship) hipah a, tua “Yes man” te mahmah zong dictatorship lungsim neite hipah hi. Ong khangkhia ding makai thak i gal-etna ah limtak ngaihsut huai hi. Pau Khat Suan