Ki mawhmawh Sak

Ki mawhmawh Sak

Mi khat in D.L.Moody kiangah, “Moody aw, kua in na nasepna hong
nawngkaai sak pen hiam? Ci-in a va-dot leh “D.L.Moody sanga hong
nawngkaai sak zaw om kei,” ci-in dawng pah lek hi. Ih na sepna khat
peuh lemtang keileh eima lampang ki sit tello pi-in mi khat peuh ki
mawhsak nuam kha pahpah hi. Mi pilten mi mawhsak cihte ki za ngeilo
hi. A lungsim uh tawh a ki tuaklo te mawhsaklo in kuppihzaw uhhi.

Mipil khat in i picing ma mite ki mawhmawh sak aa, i picin zawhteh ei
leh ei i ki mawhsak zaw hi cihi. Khatpa leuleu in i hai lai teng
leitung ki uknuam aa, i pil takteh ei leh ei i ki uknuam hi ci leuleu
hi. Eima sep khilh khat mikhat peuh ki mawhsak kha thei hi. Minam
ading i sep khilhleh mipihten hong mawhsak kha thei mah aa, ei lam
panin mipite mawhsak cihzong hoihlo leuleu hi.

Lengtong Kam Khen in, ” ih ki gen siatsiat zong, pil thei tuanlo hive
hang”, na ci hi. Minam adingin nasem na pi-in ngahna ding aom teh
deidanna hong om kikteh mipi ten hong gensiat pen khiallo hi. Mipi pan
khopna tawh ih lawhcing khawm aa, ngahna ding, nekna ding aom teh hawm
diamdiamin nekhawm diamdiam leng ki mawhsakna omlo pah aa, ki
gensiatna omlo pah hi. Ei mimal vaihawmna khat a lawh cin vatloh teh
mikhat peuh mawhsak gawp, ki pawlna khat peuh phunsan phei cihte zat
hoihlo hi.

Mimal vai ah kuamah ki mawhsak nang omlo hi. Mi nuntaakna ei tawh ki
tamsailo hi. Mimal vai peuh gengen in nitum ding hilo hi. Minambup vai
ah i gamtat khial khakleh mipi pawl khat in hong ci giap kha ding hi
cihzong ngaihsut huai hi. Bang tawh ki sai-in kei hong ki mawhmawh sak
hiam cihzong ngaihsut huai aa, ki puah phat nang zon ding hi pah hi.
Bang hangin mi mawhsak ka hiam cihzong ngaihsut ki samzaw lai hi. A ki
sai kilkel lo khat peuh, mi om muang khat peuh va sukha sese, va
sawnpaai sese cihzong om thei hi. Mawhsakna khilhsakna gensiatna a
munzui-in zatnang om veve hi. Zat vetlo ding hoih hi cihbel hi
khinsamlo hi.

Ih mawhsakna ahang tel in, mawhsak huai mah hiam, kei mawhsak ding mah
hiam, kei tawh ki sai kha hiam? Ka mawhsakna hangin phattuamna a pia
ding nam hiam? ….cihte ngaihsut huai hi. Phat tuamna ding aomlo, mi
tawh ki totna ding peuh, ki muhdahna ding peuh cih bangin i gamtat
khilh khak ding ki dawp huai hi. Lungdam.

Thawn Tuang
Nashville TN USA
May 3,2015
Ka laigelhte>>www.zomi-angvaan.blogspot.com