Zomi Khristian mittawh President Obama leh President Trump te gal et pakleng ~ Thang Van Lian

Zomi Khristian mittawh President Obama leh President Trump te gal et pakleng ~ Thang Van Lian

President Barack Obama in kumpi tokhom aluah ni tuni bang hun 2009 kumin Presbyterian College and Theological Seminary, Seoul khuapi ah M.A sinin ka om laitak hi a, mivom ahih si tawh pakta khol lo ka hih manin ka lunglut khol kei hi.

African lawm teng (Obama gampih Kenya te zong om) in lawp takin inauguration ceremony en ngeingai uh ahih manin kei zong ka en pong hi. A thugen ka ngaihngaih leh kei teekteek hong sukha tawh kibang lua ahih manin ka lungdam mahmah a, youtube pan ka ngai phapha hi. Ka khitui mualtuang zo hel hi. Galkap ukcipna nuai a omte hong phawk si, ka ci hi.

Mit tawh amu kha lo leh bil tawh a za kha lo ka mipihten zong thei nuam kha leh, ci-in internet pan English version ka zong khia a, zan thapai mah Zomi version tawh teikhia-in ka man phet ciang ZONET ah ka khah hi. Ukcipna athuak gamte, mizawngte… America in hong mangngilh lo hi na dah kei un, a cih pen kei adingin hong gensak hi, ka ci hi. Ka lungdam lua ngiat hi.

Tutung Trump in thu hong gen leuleu ciangin US gam, amau’ gam atung ta ka hih lam ka kiphawk vat hi. Keikia bek midang alunglut mel om loin TV mai ah ka tu hi. A thugenna ah gam zawngte leh gamdang mite adingin bangpi lua om khol lo a, America tawh khut kilen nuamte seppih ding, mi khempeuh kilawm kituakin enin ho ding… cih ciang khawng bek ahi hi.

Facebook khawngah Zomi atamzaw in Trump deih a, Clinton gum tilteel zong pawlkhat om veve hi. A kingawhcih lawh kha dekdek bang bei lo hi. Doctorate ka sinpih lawmte atamzaw in zong Trump pen na pakta het lo citciat lai dep uh hi. Kei mimalin bel biakna vai-in Trump mah a deih tilteel ka hi hi. Hih vai-in Kawlte pawlkhat tawh zong facebook ah ka kikogawp ngei phial dih zen kha hi!

Obama hun lai-in, ‘Apa khang a gam beel apai, atapa khang ciangin President suak thei…’ cih thu in zong Zomite dinmun panin lawpna thak tampi hong guan limlim zo hi. Tua tawh kizui-in kumpi masate sepna zui-in gam beel Zomite leh midang tampi US ah hong la takpi a, Kawlgam nih vei tang hial hong zin tak ciangin Kawlgam zong tampi mah hong kikhel tuam hi.

Pu Trump genpi pen leuleu in ‘America first – America mite masak ding…’ cih hong hih leuleu ciangin mi pawlkhat patau-in heh nuam uh hi. Obama hun sungin IS kici Muslim migilo tampi hong piang a, biakna lamah tampi kiamsukna om hi. Khristian gim nam het lo hi. Pu Trump leuleu in lungdambawl khawng bawl pah ziahziah a, kumpi suah ni zong Khristian gim namin etlawm mahmah lungkim huai mahmah hi.

Zomi Khristiante dinmun panin i et ciangin America pen Khristiante mah maingal ding, suakta takin teek tang den hen la, Muslim khawng leh biakna dangte amau mun ciat ah na suakta peuh le uh hong tualbual hong thuklut luat ding uh ka phal kei hi. Zum innte, meeting te leh sang innte nangawn ah Jesuh thu kigen ngam lo, thu kingen thei lo, cih pen na ka sa lua hi.

Refugee vai ah Trump lunglut lo hi, ci a adah tampi om hi. Himah hi. Ama mi gente pen Muslim refugee tamzaw ding a, Zomi tawmcikte tawh kipaikan kha lo dingin ka ngaihsun hi. Khristiante thanemna pen America ii thanemna hi ding hi. Tua ahih manin Trump hun sungin Khristiante kimaingal zaw ding ahih manin leitungbup ah zong Khristiante maban ding tampi nuamtuam dingin ka lamen hi. Khristian gam in gam haksate apanpihna khan zaw dingin lamet huai hi.

Kumpi khat akah ciangin policy kikhel, nasep zia kilaih i ci ta zongin Democracy gamah tua bang liangin Zomite dinmun pan dah luat nading om lo dingin ka ngaihsun hi. Khristian gim nam semsem leh pilsinna, cidamna leh sum zonnate a vekpi-in ahoih toto ding hi veve hi. Biakna view bek ultungsak cih gaih theih hi tuan sam lo hi. Kiteel ding ciangin party khat sung pan candidate ding nakpi-in kituh uh a, eite in party kitam zo zah dingin i ngaihsun dep uh hi. Party sung pan candidate akitel khit ciangin gambup huamin party liante hong kidem leuleu uh a, USA gam kisia ta ding, aci nuam zong phuahtawm thusuak bei lo hi.

Ahi zongin kiteelna aman ciangin vai khempeuh siangsak uh a, America gam ading… ci-in kipom kinamin ma pang khawm thei ziau uh hi. Eite i awkaih kibang lo peuh, Pawlpi neu khat, beh vai khat, hausa vai peuh tawh akhang phial a mi a langneih theite hi lai ihih manin etteh ding tampi i nei hi. I beh leh i awkaihte sangin Zomi minam vai mitsuan thei ziau leng deih huai ka sa hi. Clinton hi leng tuni Trump kumpi suahna ah i pai zo ding hiam? Amah pai lel a, amaitai pen pawl hi lai dep hi! Hih lungsim picinna pen etteh huai ka sa mahmah hi. Trump thugen sangin Clinton maisuah in ka lungsim hong bun zaw hi.

Bangbang ahi zongin kumpite kumpipa, tote Topa Pasian in kumpi lian kumpi neute khempeuh tungah ukna nei den ahih manin galkap ukcipna sung pan a suakta dekdek inn lam a omte hi ta leh, US tung khinsa Zomite in eima tunna ciatciat panin vision sangpi tawh tai kidemna ah hanciam ni, ci-in i kizawn hi.

President Trump in America first… acih mah bangin Pasian in ei atate mah “Amasa pen…” ci-in hong masak den, first priority hong pia den ahih lam phawk gige ni. Rev. Thang Van Lian