Kei Maa Moral Politics (II) ~ Nicholas Pau

Kei Maa Moral Politics (II) ~ Nicholas Pau

Party Politics pen khat veivei Company Politics tawh kibang kasa hi. Tua hang zong hiding hi. Nidang, British ten, Kawlgam ong lak cil lai khawng-in, Kawlgam pen, India Province sungah ong koih-in, Company khat, Corporation khat ii ukna nuai ah ong koihziau ngei hi.

Leitungah Gam tampi tak lak pan, Minam tuamtuam a etteh huai tam mahmah aa; tua Gam tampi lak pan, gam khat, minam khat ahi ziau gam tam mahmah hi. Tua Gam khat Minam khat gamte le Kawlgam dan aa Gam khat minam tampi gamte ki-tehkak thei phalo hi. Banghang hiam cih leh, I Kawlgam dan te pawl pen, Gam nei ciat minam tampi-te ki-gawmkhopna Gam ahih man ahi hi. I gam ciat pen ei ma ngeina ei ma danciat tawh a ki-uk minam tampi-te ahi hi. Tua ahih manin, I zat kammal ciat ah zong, hong uk-te min I nei hi. Gentehna in, Kachin(Wunpong) ten “Duwa”, Shan ten “Sawbwa”, Zomi ten “Ukpi”.

British ten ong uk lai in zong, ong gawmgai-lo in, Ministerial Burma(Burma Proper) le mualtung gam teng pen, Scheduled Areas (Frontier Areas) ci-in, ong koih uh hi. I gam ciat ah, ei ma kampau, ei ma ngeina zangin, nuamsa mahmah lel in, kua mah dang zong a phawklo, a englo minam-te ihi hi. I gam sungah, I zat kampau, Zopau hi-in, Zopau I siam-aa, I zatlo’ kampau, zong aki samlo kampau ahi, Kawlpau le adang kampu khempeuh (Falam, Hakha, cih nengneng te aa kipan), I theikei pah hi. Tua I zatlo’ kampau I theihlo’ na pen, mibatlo’ na, tualniamna hang hilo in, kisamlo zatkullo, eima kampau ahih lo’ man ana hi lel hi.

Leitung Gam tuamtuam ten zong, Kawlgam dan mah in, a gam sungah, Gamke ci ding maw, “State”, “Province” tuamtuam nanei uh hi. Ahih hangin, Kawlgam aa State tuamtuam te tawh ong kibatlo’-na pen, Kawlgam aa State te leuleu, Geographically aa State bek ong hilo in, ngeina tuam, kampau tuam, sandan tuam anei, Minam tuam, Minam dang khat ong hi leuleu hi.

Hih bangdan thuthuk pen, Zogam kheng aa, pilsin, siamsin ten ong phukha toto in, Kawlmi lo limlim, ong netniam nopna uh ahi zong, kumpi I cihcih ong nencip-te gamtat diklo’na te ong mu toto uh hi. Tua ahih manin, Mandaly College aa siamsin masasa amau aituam hamphatna, a nuntakna ding tampi tak nusia in, minam aa ding nasem dingin, mat le hen thuak ngam, bawlsiat thuak ngam, luang kham in, amau sepzawh zahzah tawh a thahat lai hun hoih-te Gam le Minam aa ding piakhia-in, ma ong pangto ciatciat uh hi.

Hih munsan ah, Mandalay College kacih na-in, tua hun lai, Zogam lampan tan (10) zo limlim Mandalay ah kikah phot aa, tuapan, Yangon University te ah a zomto thei cihdan ahih man hi. Hih bangdan aa kipia khia ka sanggam tanau sungpan zong khat le nih kihel in, kei bel neu lai lua mahmah ka hih manin, amau kipiak khiatzawh na hangin, kei tumtak in, a na angtang ngei mahmah khat hing.

Mogok ah ka tan lang(KG) kipat lai; Mogok pen, amasa in Shan-te aa hi-in, Shan Gam sungah a om hi-aa, suang manpha a pian ciangin, Mandalay Division sungah ong guanziauh uh ahi hi. Ka khanpih sungpan, “Nga-tat-pia” cih min nei khat pen, gol pen ahih manin, khanpih teng khempeuh tungpan siah la hi. Thangkhoi pum (2) I neih leh, amah pum (1) piakkul cih dan hi. Amah bel a ki-thusiamsak aa ki-nei hiding hiven, ken zong kaneih peuhpeuh ii a lang no ong hawm ding; kei tung ah no khatciat in zong, na neih peuhpeuh uh, a lang ong pia ding cihdan hi.

Khanpih khempeuh in kihta ahih manin, a neih peuhpeuh uh bel, a lang apia hamtang dan uh hi. Kei utlo in, ka piak kei leh ong vuaksawm. Ken bel innpan bangmah a puazo bel hilo in, nidang aa, bawngnawi-vui sikkeu neu nih khawng ip neu sung aa ka Nu’n ong guansak hi in, amah tua alang pia mawk leng bangmah cian nawnlo mawk ding hi in. Ong vuaziau leh zong, a tha in ken a zo ding bel hi lo in, Kawlngian ci ding I hiam, ong vualo kik-in, khanpih teng khempeuh tung thupia; khanpih ten zong amah kita in, a sawl bangmah aa, kei ong gawtbawl (bully) ngeingai uh.

Amah a omlo’ ciang ka khanpih pawlkhat in ong thumkik, maiet-kik saisai uh. Zingsang khat, pai baih-in, “Nga-tat-pia” kiangah, ka moh neih khat a lang hawm in, “ ken, hihpen, phal tak-aa lawmta aa kong neihna tawh kong piak hi. Zawhthawh thu tawh nong nget-te peuhmah kong piak ding ki-phal zo ngeilo ding hing ka ci hi. Tua aa kipan, ken, ama tungah bangmah apia nawnlo suak ingh. Neu lai thu mangmawh hi.

Hun lui, hun-siat lai, langpan(Revolution) hun lai aa, gampua, Liberated Area(L.A) lam aa, gamvai Politics vei, a sem Kawl-te pawlkhat in, a genpi uh ahi, “Burma Da Kyat | Chin Da Kyat” acih sial uh, ka KG lai aa, ka “Nga-tat-pia”; khanpih khempeuh tungpan a lang la in, a ma aa, a lang, a khanpih-te a piapa peuh ong phawksak pahpah. A khanpih teng in, a ma piak a lang hawm lailai le uh bang a ngahmawk tam?

Khat veivei, tuni ciangdong mah hi. Minam vai te ah I dinpih sinsen pen kician sakzo taktak lo hileng kilawm kasa hi. A hun, a mun, tawh kituak-in, ki-lem nading deihluat na tawh, khat veivei, “Chin pen Zomi hi. Zomi pen Chin hi. Chin le Zomi a kibang hi”, cihdan I zakha theizel hi.

Khatvei vei I kibatna-te I zon thapaih ciang, a kibanglo peuh kibang tektek zaw in; I ki-gamla tektek zawthei hi. I kibatlo’na-te I telkim ciat ciang, I kibatna tampi peuh kileh muhkik zaw-in, ki-pumkhatna ong om theizaw hi.

A ki-pumkhat thei ngiatlo, minam khat peuhpeuh pen, tua bang aa a ki-pumkhat theihlo’-na uh ahang(The Why) a om gige ahi hi. Tua ahang pen, thudang hilo in, I kibatlo’-na pawlkhat hang mah ana hi lel hi. Tua ahih manin, I Minam sungah, I ki pumkhat theih nading, I lunggulh ciat takpi-leh, I ki pumkhat theihlo’-na, I kibatlo’-na, “A Hang”, (The Why) pen kancian ciat-aa; I kibatlo’na-te ki-banglo mah hi cih I telzawh ding ong kisam masa ding hi.

Tua bang aa, I kibatlo’na-te om mah hi cih, I sanzawh khit ciang in, I kibatna tampi-te damdam in I mu pan ding hi. I kibatna le I kibatlo’na-te, om mah hi; I kibatna pen “hih” hi. I kibatlo’na pen “hih” hi. “Hih” teng ah I kibang hi. I kibatlo’na te sang in, I kibatna tamzaw hi. Tua a tamzaw I kibatna-te, a kibanglo’ nang le kei, I vekpi aa ding, a thupi penpen hi. Tua ahih manin, “ hih’ pen i vekpi aa ding; I letkip ding; I dapphah(Principle) pi hi” ; ci-aa I tel ciang, om hi cih I sanzawh ciang, ki-lemna ong om pan ding hi.

Gentehna: Hih lai a sim thei, a tel thei teng khempeuh pen, atamzaw, I bulpi kibang ding I hi phot hi. A simtheilo, a tello atamzaw leuleu zong, I minam kibatpihlo’ ong hipah ding hi. A sim thei, a tel thei teng khempeuh zong, ki-bangkim gailo ding I hi lai hi. Tua teng khempeuh I thupiit bawltheih hun, I kilem hun ong hiding aa, I thahat hun leh, I khanto’ hun ong hipan ding hi.

Tuhun teh, Kawlgam vai ah Revolution hun ong bei pianpian ta-in, Parliamentary (MP) hun ong hi ta aa; hunsiat lai aa, luangkham aa, minam aa ding a kipia khia, I minam sung aa, Politics lam a thei, a siam taktak, nidang aa (Sangnaupang-te) I cihcih te sangin, tu nainai aa, ong phulkhia pawlkhat ki-tulmawh peuhmah keei I hih manin, khat veivei, I kampau-te, I pau maa in, I ngaihsun takpi (Think) mah hiam cih kei mimal in, na ngaihsun khathei zel ingh.

Kawlgam Politics pen, a dangdang-te sang’ zai(complex) zaw tham’ in, Kawlmi-te ii lungsim luanzia Politics zong a thei takpi kisam hi. Gam khat sungah om gai ahih zenzen hangin, Kawlgam dinmun ah, khang lam aa hoihpen ding khat pen, sak lam aa ding, a hoihpen ong hikhinlo hi. Banghang ciam cihleh, a gam neite kibanglo aa; i ngeina, i dante kibanglo ahi hi. A picing zo naailo nasep nasa-te a vei a kin, a thu thei teng in a zun ding ahi aa; a semngei, a thei-te, khuak manpha tampi I neih-te dotbawl aa, sepkhop ding ahi zaw hi. “I am the wisest man alive, for I know one thing, and that is that I know nothing.” – Plato

A tung aa, Plato’s paunak a om mah bangin, I theihlo’ lam tak I ki-telna in, pilna lianpi khat ana hi gige hi. I theih ciangciang thei-in, I theihlo’ tampi a om gige zong, I ki-phawkkhak ding kisam hi. Lian T. Pau