Kawlgam in Indonesia ah buhtang kumsim Ton 500,000 zuakding

Kawlgam in Indonesia ah buhtang kumsim Ton 500,000 zuakding

Kawlgam panin Indonesia gamah kumsim in buhtang Ton 500,000 ta zuaksawm, Export bawlsawm uh a, asawtlo in gamnih thukimna Memorandum of Understanding (MoU) bawlding uh cihthu Myanmar’s Commerce Ministry tungtawn in kiza hi.

Hihvai tawh kisai in lungkimna abawlsawm laitak uh hi a, ahi zongin Indonesia gam te ii “Minister of Commerce” pen athak kilaihzawh sawtnailo ahih manin, thukimna bawldingpen khinto phot uh cihi. Ahi zongin asawtlo in Myanmar’s Commerce Ministry te Indonesia vahawhding uh a, lungkimna bawlkhawmding uhhi ci’n Assistant Secretary Khin Maung Lwin in Myanmar Eleven News te tungah genkhia hi.

Hih gamnih ki thukimna Memorandum of Understanding (MoU) abawltheih uhleh kumsim in Kawlgam pan buhtang Ton 500,000 ta kizuakding a, tuapen 2019 kumdong hiding cihi.

Abeisa kumte ah Kawlgam panin buhtang akizuakkhia Rice Export atawmzawtham 90% bangpen Sengam vive ah kizuakden hi. Tu’n ahihleh Myanmar Rice Federation te’n Indonesia, Philippines leh Japan gamte ah zuaktheih nading in ahanciam laitak uh ahihi.

Indonesia gam inzong abeisa hunte ah buhtang pen Vietnam leh Thailand panin aleitawmzel uh hi a, agamsung ah buhtang hamsatna, kicinlahna omkhaleh cih ngimna tawh 2015 December kha akipan Kawlgam panin buhtang ngahtheih nading in ahanciam uh ahihi.

Indonesian Agriculture Ministry te genkhiatna ah 2016 May khasung inzong Kawlgam panin buhtang Ton 15,000 lungngeikhin a, Tanjung Perak Port, Surabaya, West Java dongah tungkhin cihthu kiza hi. ZD Sawltak #zomidaily