Kawlgam ahzong Zika Virus kimu ta

Kawlgam ahzong Zika Virus kimu ta

Kawlgam ahzong Zika Virus ki mukhiata hi ci’n kumpi thunei te’n zanni Friday (28 October) ni in genkhia uhhi. Kawlgamsung aom gamdang nupi naupaai khat tungpan in amuhkhiat uh cih AFP News pan kiza hi.

World Health Organization (WHO) te’nzong hih Zika Virus pen tukhasung in Asia gam tuamtuam ah kizelkawikawi khading hi ci’n genkhia uhhi. Tuciangciang Zika Virus pen leitung gam 70 ah kizelkhin in, tualak ah Asia Pacific gam 19 bang kihelding in kigen hi.

Tu’n Kawlgam ahzong Zika Virus kimuta ahih manin lungkhamhuai simtham hi. Hih akimukhia masapen gamdangmi “Foreign Woman” ci uh a, kum 32 aphakhin naupaai laitak nupi khat ahihi.

WHO te’n hih Zika Virus pen gam khangto zawdiak ahi China, Japan, Australia cihte banah Southeast Asia leh Pacific Islands sungteng ah kizellaiding in ummawh uh ci’n genkhia hi.

Leitung ah gamkhangto, gamsiangtho penpen khatin aminthang mahmah Singapore gamsung ahzong Zika Virus pen Case 400 tungbang ah kimukhin hi. Thailand ahzong Zika Virus a ngah omkhin ci’n nungkhasung in kumpi thunei te’n genkhia uhhi.

Gamsiangtho penkhat ahi Singapore gamsung nangawn ah Zika Virus Case 400 bang ki mukhia ahihleh Kawlgam sungah bangzah aom mawktam? Health Awareness ihki sapluat manin aomkhinkhian, aki genkhialo ahitam?

Zika Virus pen thongkang panin hongpiangkhia leh thongkang panmah in akilawhthei ahih manin, adiakdiak in nupi naupaai te kidop mahmahding thupi dinghi. AFP te genna ah tuciangciang hih Zika Virus kibawl nading in zatui zaha omnailo a, kidalkholh nading zong omthei nailo ci uhhi. “There is no cure or vaccine for the virus. AFP” ZD Sawltak #zomidaily