Ka Zi Nik ~ Hau Za Cin

Ka Zi Nik ~ Hau Za Cin

Zonik a gensawm ihi hi. Minam kizepna puante a mel a etlawm mahmah hangin a puan, a khau gina khinlo hi cih ka zi nik ka nawt ciangin ka thei hi. Amau nasepna ah a kum khat khatvei Nitak Annkuang Umna (Corporate Dinner) nei den uh a, tua bang hun ciangin eima minam puan ciat silh ding ciin a office uh pan zasak uh hi.

Puansilh ding cih ciang numeite pen lawp mahmah uh a, amah zong lawp mahmah in a Zonik sawp pah hi. Kumsim silh ahih manin kum nihna bang bek ahih hang a sawp simin a keu ciang nawt kul a, a man zawzaw in puan ka nawt zel uh hi. Tukum pen a puansilh ding lunghiang pian a, kumdang zong ka silhsa hi ci pian hi.

Banghang hiding hiam ci in ka dottel leh “a puan” ciziau hi. Zopuan pen a mel hoih mahmah hi. A silhte zong kilawm mahmah hi. A gei pan en leng lah hoih, a gal pan mu leng lah hoihsem, a gensiatna ding omlo hi. Ahi zongin khatveivei ciang “a puan”, a khau pen hoihlua lo thei a, tua manin khatvei nihvei sawp leng nem pahpah hi.

Zomite zong leitung khantoh tawh kituak in van leh na a hoih, a siang sitset cih khawng a deihta, a theita ihih manin i khantoh tawh kituak in i van leh nate zong a hoih theithei in i bawl ding, i gat ding hiveh aw cih hong phawksak hi. A dawk ding teng a seel ciang bekin puan leh nik i silh i teen hunte in damdam in hong khengta a, lawm leh gual lak ah a hoih a kilawm taka i kilat ut hun hita hi. Mite mai ah Zomi a neusak nuamlote i hita hi.

Tua ahih manin puan bawlte, siamngante in khau hoih mah hong zangin a zuakna zong a sum tam deuh mai leh ahoih tam cih khawng hong ngaihsun sak hi. Minam puan diakdiak pen minam kidemna ahih loh hang ‘koh minam hi bang hi ung’ cih lahna ahih manin a quality hoih semsem leh mite lak ah i mai ngal semsem hi.

A mel a sa ah Zomi te puan zaha hoih leitungah a dang a om tuankei hi. Zomite minam puan zaha etlawm leh hoih ka mu nai tuan kei hi. A gial dan, a kizep dan, a tung gial, a phei gial a kilawm linlian in a kigeel, a kihelh hi a, zolia te duangtungah a etlawm penpen puan leh van ahi hi.

A mel leh sa a etlawm mahmah bangin a puan leh a khaute zong a hoih theithei mailam ah zang toto leng i minam mite in hong zahtakna uh khang semsem ding hi. Mite in zong Zopuan hong deih in hong etteh ding uh a, Zomi hihna hong angtanpih semsem ding uh hi. Zopuan leh Zovaphual mahmah kituak in kilawm a, Zomi te mit ah zong a etlawm pen hiden lai hi. Hau Za Cin