Ka Pa tawh Tonsim (Champhai) ah ka gaaltaaina uh

Ka Pa tawh Tonsim (Champhai) ah ka gaaltaaina uh

Galkaapte’n gam-ukna a laakna uh pen Kawlgam suantaakna ngah zawh a masa in kum10, anihna kum26 hal leh tutung aa pen, kum32 hal cihbang a hihi. Bang hunciang hong khah/kihong kik zeel ding cihbel, Pasian lo-ngal a thei om-in, ka um kei hi. A hizong in, a kisamlo leh a kullo mite’bawltawm hatsatna kituak peelmawh den hi. Galkaap cih pen gamlutang kumpite sawltaak khutlehkhe a hi uhhi. Lutang omlopi khut leh khe a tattat hang’ bangciang matunzo mawk ding hiam? Lutang a kizatloh, a ginatlohna hang-in, khutlehkhe gim bek hilo, kisui kha uh aa, genthei haksakna tuak uhhi.

Gammipi te koici kepsiamding cih pen, naungek kep bang aa, kisin tohtoh ding thu a na hihi. Tate itlua leengzong kikeem khialtheidan hihtuak hi. It lua kisa in, a deihdeih a nopnop in a kikhahzau khaktheih mahbang in, zong kihumcip thei in, naaklah khuamulo, bingtuak inzong, kikoihkha thei a hihi.  Gamtat luheekna khat peuh, a sinzaw leh a siamzawdeuh te’n hong makaihding deihhuai leh saupi kimangzaw ban ah, buaina tawmtuam thei hi. Ih makaai, hong makaih kua hi mawk hiam?

Mei pen mei tawh ki phelh lo-in, tuitawh ki phelh zaw hi. A kiim aa kuangthei dingte hepna tawh a kaang theizah pan bel, kidal thei khamah ding hi. Meikuanglai ih phelhzawh kei leh, hong katlohna ding ah, kihepsiamding zong kisam hi. Hangsanna pen pilvaang tak-in, a kizatsiam ciang, muibun zaw tham hi. Lungleeng thovai bang-in, hong kaangding thei gige tua-meimah ihbawh vanvanloh ding’ deihhuai hi.

Tuma kum32 val lai 1988kum, September kha in, Kawlgaalkap te’n gam-ukna la in, Khamtung Zogam zong a hong kahto uh hi. Tuama in bel, Kawlgaalkap te, Rih cihdan gamgi khuanew te leh Tonzaang khuanawl, Tuituumkhua khung ah outpost neukhat a omlam bek ka thei hi. Tuciang in, Tedim khuapi mualtuk ah bucing in, munla ta uh hi. Nitaak Curfew kitaangko-in, zanciang thau mawkgin thei lai a hih man-in, mite ki dipkua thei mahmah hi. Sunteng bel phadawm hi. Khangno lai kahih man-in, lauding taktak mel ka phawk pha kei hi.

Tuabang hunsung leh nikhat ka Pa-in, “Tonsim ah zato kilaknuam ingh” ci-in, ko pasalno thum hong ki thawipih hi. Tedim pan-in, Muizawlkhua lam tawn-in, Mualnuamkhua ka masuan uh hi. Khetawh khualzincilna phialmah a hih man-in, katung zokei dektak uh hi. Mualnuam pan meltheih kapute pawlkhat in, Lentaang ah hong nadawn uh aa, lawptak inzong zin a hong dolai uh hi. Kanuno Vial Khenh Cing te inn ah ka tawldam dong uh, ka taam khit uh teh, ka niineu Pau Khen Cing te omna Phaltaangkhua lamzuan in, ka ding khia leuleu uh hi. Tuuk-hun sung a hihmah bang in, khepaina lampite sakoltotna-in, tongkhatkhat bang a thuuk ban ah, a khote buannawi-in, a naal pha mahmah hi.

Pai nengneng in, Singleikhua aa meltheih inn khat mah ah, sun anne kawm in, ka tawlnga kik uh hi. Tua pan zaanglo pawlkhat ka kaan khit uh, Bukphil taang dung ka nawk khit uh teh, mualtung ah khua-kisaat Phaltaangkhua ka tung uh hi. Singlei-Bukphil dung lampi gei aa taaksing maam hilhial, singteh san hiuhiau, zaanglo leh mualbawk te etlawm, muhnop kasa mahmah aa, kigimlam zong kaciamteh kha kei hi. Phaltaang kaniineu kiang ah ka taam khit uh teh, a khang aa Ciau gun kaan in, Zotekhua ah kasuakto uh hi. Zote pan, Tonsim khuataw Taangnuamkhua ah, meltheih inn khat mah ah, suun anne tawlngak kawm-in, Tonsim ka gal-et uh hi.

Taangnuam pan, Tonsim khuasung sanggam melmak hun-in, ka lutto uh hi.  Lamziikpi dung ka pailaitak un, Palik te’n hong khawlsak in, ka Pa/midangtawh maw? a kiho laitak, Refugee a cih kaza aa, tua khit teh hong paisak suak uh hi. Tua pan, kanupi Khual Za Man tanu Ngaih Ciang mothakna Pa Khual Nang leh Nu Cin Za Ciin te inn lam kazuanto uh hi. Ka u Ngaih Ciang lawmpa sangsia hi-aa, cithei lel uh hi. Ko pata teng hong pumvak hilhel zo uh hi. Tawlkhat khit teh, Tonsim ah ka Pa bek nusia in, nasep zong, sum thalawh ding in, Aizawl lam kazuan uh hi.

Refugee a cih kammal keima bilngiat tawh ka zakcilna hi-aa, Tan10 kahlaitak ka hih hang-in, a khiatna kamangsia khiat lel hi. Ka Pa tawh ka hih ban vuah, ka u pasal nih zong tawh ka hih man-in, launa-meel ding theilo in, lungmuang tak in, ka om hi.

Tu hun, tulai tak inzong Kawlgam pan mitampi Tonsimbeel om a hih man-in, ka lunglen pih mahmah hi. Ka khangham zawdeh, ziilehta ka neih khit teh, innteek te’ bangzah buaiding cih phawk in, ka ngaihsun kikkik thei pan hi. Refugee dongtuak a kem-mite khempeuh Pasian in, thupha hong piaksak ta hen.

1993kum leuleu in, Shangam Maishoo suangkhuuk minthang vangvang a hih man-in, ka lawmte panpihna tawh, Zogam khamtung pan-in pawlkhat ka kuankhia uh hi. Mandalay -Taunggyi-Maishoo lam kazui uh hi. Hilux nungkuang ah vanguan-in, kaki guang uh aa, khuliang in ka pai uh hi. Januarykha sung hi aa, khua a vot velval hang-in, Pinlong, Kalaw cihbang Shangamkhua leh mualdungte etlawmsa in leh lawmte tawh kilawpsuah in, nuam kasa mahmah lel uh hi. Lampi ah Kawlgaalkapte-om a kicih leh kinawk ngamlo in, tualo innteek gaalkap (Wah/SS etc) te a om leh bel, mikhat matawkhat bangzah cih tawh lemtaang lel hi. Wah gaalkap te bang naupang philphel in a thau puak uh tawh kikim phialphial cihnophuai liang hi. A neu liinleen uh hang, zatep bang khusak viauviau in, ding-liinleen geuh uh hi.

Maishookhua pan-in, suangtawhna pen khetawh tawlkhat mah kipai in, a mun gamlak ah gamgua sat-in, ih buuktekding kilam ciatciat pah hi. Mun khat ah, buuk 20-30ta bang pha aa, khuano khat tawh kibang hi. Ni khat, nitaak annek khit khuamui milmial laitak in, mualdung ah datmei taang mipawl khatin mu uh aa, “Kawl gaalkapte hi, taai un,” ci-in uimeikangbang uh hi. Ko zong ka buuk uh nusia in, khuazingsung singkung kuamlak ah, zan thapaai ka bu uh hi. Zingsang khuavak khit, gaalkap te huzap a venciang, ka buuk uh ka zuan kik uh hi.

A taailo pawl khat om aa, tuate pawlkhat gaalkap te vuakthuak in, pawlkhat vanpua(porter) ding in, paipih suak uh hi. Ko buuk bang a Bo pa giahna hi, a hong kici laideep hi.  A sawtlo in, gamlak market (Maw ci-uh) ah gal kisimna om in, taikhat khawng bek kigamla a hih man-in, thaupiging bang ngaih mahmah hi. Buuk kinusia in, kitaai phangphang leuleu hi. Ka paipih te a tamzaw zong innlam zuan ding-in, taai mangkhin uh hi. Innpan ka paipih a hilo innlam meltheih khat tawh ka kimuh leh sumdeihna in hong hansuah in, thaupi ginging taleh, taai lo-in, buukmunbek kheel in, ka omsuak hi. Ka paipih te’ inn a tunkik uh ciang-in, kei ka tunloh ban ah, thu kizalo a hih man-in, ka Nu leh Pa lungkham uh aa, ka nu bang a na kapkap hi.

Ka Tonsim taailai un, ka nung vuah, ka Nu bangzah lunglau ding cih, tudong ka ngaihsun ngam naaikei hi.

Tu-in kum90 a val khinta, Japan gaal nung ah, Kawlte tung ih ki-ap zawh, Thual Zen gaal, Khaimuulen, Lusei gaal teng ban ah, Kawlgaalkapte ukna laakna thumvei sitset a nawkkha ka pianna Nu in, Japan gaal leh Lusei gaal a taaina uh, a suutsuut ka bilkha in zaza lai aa, “Topa Pasian aw, ka nuteek gaaltai saknawn kei tapeuh in,. Topa Jesu aw, na Nu Maria, nungzui John na aap mah bang in, ka Nu zong nong kepbitsak nading’ na kiang ah kong aap hi”, ci-in ka tautau hi.

Ka khuanung phawk ciang in, ka Pa hang-in, galtaai kimlai ulian khualzin kasuak miikmeek uh hi. Zin hong do, thupha bawlte tung zong lungdam in zahtaakna kapia hi.  A tuuk dong in, thu hong ngetsak ka Pa tung ah, ka lungdamna cihmah ciang-in, kathukzo ngeikei ding hi.

Nu leh Pa te khempeuh ih biak Topa’n  hong kepcing sak henla, thupha hong piakkim ciatding ka thunget na hi. Nantal’suan  (Phamsa ka zua, ka ciin teng leh meltheih teng aw e, na leenna vangkhua ah nobeek na tawldam un maw.)