Malaysia, Johor aom datsisai ah pasalkhat aki thahlup laitak Video ki khahkhia

Malaysia, Johor aom datsisai ah pasalkhat aki thahlup laitak Video ki khahkhia

Malaysia, Johor Baru khuasung aom mawtaw datsi zuakna saikhat ah mi 1 aki thahlup laitak Video ki khahkhia a, mulkimhuai mahmah hi. Taman Pelangi, Jalan Sri Pelangi aom mitampi in anawkdet Petrol Station khatah thupiang tuni Sunday (Dec 17) nitaklam in thupiang ahihi.

Tua Petrol Station ah pasal kum 30 gualpawl khatin amawtaw Volkswagen Polo khawlsak in, Tyre teng Checking bawlbawl hi. Tualaitak in adang BMW mawtaw akangkhat hongtung in, tua mawtaw tungah atuang pasal 4 te kumkhia uh a, atungmasa pasalpa buanhuan uhhi.

Nitaklam 7:30pm hunpawl hi a, tua pasal 4 te’n launeilo, awlmawh neihtuak vetlo in, Petrol Station ah midangte muhtang mahin tuapa abawlsia uh ahihi.

Hihvai tawh kisai in palik thunei ahi Johor police chief Comm Datuk Mohd Khalil Kader Mohd in agenna ah tua bawlsiat athuakpa ii mawtaw sungah azizong atuang hi a, apasal akibawlsiat amuh ciangin taikhia vingveng in midangte tungah huhna ngen cihi.

Tualaitak in apasal pen adang pasal 4 te’n mawtaw sungah lutpihsawm uh a, ahi zongin apasal pen kitomgawp in, lutnuamlo hi.

Tuabangin aki tomgawp ciangin pasal khatin a awm aveilam ah temtawh dawtsuk a, apasal zong leilak ah tuksuk hi.

Tuakhit ciangin tua pasal 4 te mawtaw sungah lutkik uh a, apaikhiat kawmin mawtaw tawh apasal pen nihveitak atungah taihsuk sawnsawn uhhi. Tuabek thamlo, tua pasal 4 te’n Petrol Station panin apaikhiatding ciangin losan “firecrackers” halpuakkham uh a, agei aom te patausak mahmah uhhi.

Tua thupiangteng amukha azi tungpan in Police te’n Statement hoihtak lapah uh a, abawlsia tua pasal 4 te mattheih nadingin Police te’n ahanciam laitak uh cih theStar pan kiza hi.

More: Malaysia, Shah Alam vengsung ah Myanmar gammi khat alawm te’n thatlum

Police te’n hih buaina vaipen ki suamlupna “Murder Case” in ciamteh uh a, abawlsia pasal 4 tethu atheikha khatpeuh, Information anei khatpeuh in amanlang in Police Hotline ah hong zasak un ci’n tangkokhia uhhi. Malaysia gamsung migilo te gamtatzia pen gamhmahmah, cikziat huai mahmah hi. Sawltak #zomidaily