Iran gamah meileng kiphukha, mi 44 si, 82 liam

Iran gamah meileng kiphukha, mi 44 si, 82 liam

Iran gamsung ah zanni Friday (November 25) ni in meileng nih kiphukha in, meikuanggawp a, mizong 44 asihban ah adang aliamzong tampi om cih AFP pan kiza hi.

Kumpi thunei te’n State Television ah agenkhiatna ah hih meileng pen Tehran leh Mashhad khuakikal atai hi a, hih tuahsiatna pen Semnan Province sungah ahihi ci’n genkhia uhhi.

Hih Express Train tuahsiatna pen khuahun votlua ahih keileh aset siatna om “Mechanical Failure” hiding ci’n ki ummawh masa hi. Ahi zongin akhuanung ah hihpen setkem te khialhna “Human Error” hiding hi kicikik leuleu hi.

Friday ni zingsang 7:50am hunpawl in atuahsia hi a, meileng akhatpen amailam dawlnihbang meikanggawp cihi.

Meileng akhatpenzong meileng lampipan piankhia in kilumlet cihi.

Zato atung Passenger khat in State Television tetung ah agenna ah meileng katuan laitak in ka ihmuhkha a, ka khanlawh ciangin meikuang lakpan in hongki zawngkhia hi ci’n genkhia hi.

Asi aliam pen kibehlap toto ci’n anunungpen Iran’s Emergency Services pan agenkhiatna ah asi mi 44 pha cihi. Aliam zato kipuak mi 82 ci a, tualak ah mi 17 pen liamngawhna omlo ahih manin, akibawl khitciang in zato pan ki tuaksakpah cihi.

More: South Africa ah kamsang akici pa’n thoza tawh natna damsak theihing kici

Iranian Railways te genna ah hihpen setkem te khialhna, Human Error hi a, ahi zongin banghang in hihbang tuahsiatna piangthei cihpen ki theician nailo cihi. Semnan khuapan hongpai meileng pen paisuaktheih nading in phalna kipia ahih manin, ataisuak ciangin adang meileng khat anungpan in aphukha hi ci’n Iranian Railways te’n genkhia uhhi. ZD Sawltak #zomidaily