Lup hunman leh ihmut cimnapi in ihmut asuakden banghang hiding hiam?

Lup hunman leh ihmut cimnapi in ihmut asuakden banghang hiding hiam?

Mihing te ih nuntakna sungah ihmut cim ding zong pen cidamna dingin a thupi mahmah khat ahi hi. Mi khempeuh kumtawm/ kumtam kasai lo aa, nikhat atawm pen nai 7 sung hamtang ihmut ding kisam hi. Na ihmut a cim leh zingsang nathawh tungpan nibup tawntung navak ding cin aa, na nasep na-ah zong thangah in nadau pai mahmah ding hi.

Ahi zongin pawlkhat te’n ih mut cim napi zingsang tho leh cigik, nalung zing niainuai, lung khawng-am leh gim cih khawngin om thei mawk hi. Tua bang aa ahi thei mi pawlkhat te ading, a theih huai a hang (a thu) ong hawmkhia sawn ung.

1. Nitak lupma’ nai (6) sungin Caffeine dat apa kapi (Coffee) leh niangteh cihte nadawn khak leh zan na-ih mut hangin tua Caffeine dat in nakhuak nasem veve sak ahih manin zingsang nathawh ciang zing niainuai thei ding hi teh.

2. Nitak nalupma nai (2) sung ahih kei leh nitak nai(8) khit ciang an nanek aa leh nagilpi in an agawi kul ahih manin zan hong ih musak thei lo kha ding aa, na-ihmut theih leh zong zingsang ciang hong navak sak lo ding hi.

3. Nitak nalup kuan in Phone, Computer leh TV cih te na-et ciangin tua amaan te pan hong paikhia kik khuavak te-in namit sungah honglutin namit hong siasakthei ban-ah, zan na ihmut a cim hangin zingsang nathawh ciang namit thagui te na-in, natha hong gik sak ding hi.

4. Nitak nalup hun tawh kinai in zu nadawn leh tua nazu hangin na ihmut theih hangin, nuamtak hong ihmucip sak thei tuanlo ding hi.

5. Tuidawn ahoihlo ahih loh hangin nalup kuan tui nadawn leh nazun suak pahpah ding ahih manin na-ihmut hong cimsak lo ding hi.

6. Na nasepna pan nalung khamna, na lunggimna te nalup kuan in nangaih sutsut leh tuate in hong ihmu sak theilo ding hi. Na ih muthei zongin nalunghimawh veve ahih manin zingsang nathawh ciang na lungsim ahi zong napumpi mahmah zong thanem in gim ding hi teh.

Tua ahih manin zan nalup ciang nuamtak na- ihmut theih nading hih anuai aa, thute na zui-in.

• 1. Zan nalup kuan phone, computer leh TV et kidawm in.
• 2. Nalupna khan pen meimial sak in.
• 3. Cafeine dat apa kapi (coffee), niangteh leh a vot tui te zingsang bekin dawn in. (Nitak nalup kuan dawn kei in.)
• 4. Zu dawn/kham sa-in lum ken.
• 5. Sathau apa ante nalup kuan in nek kidawm in. (Ne kei in)
• 6. Cidamna tawh akituak annek tuidawn tebek ne-in dawnin.

Khat veivei ihmut cimloh pen adah huai ahih loh hangin, nisim in na-ihmut cim kei den leh asawt teh natna aa hong piang ding hi. Nitak sim ihmu theilo leh ihmu thei napi’n na om nuamlo in ihmut cimlo tawh naki bat leh siavuan te kiang kilak-in kisit sak in. ( Natna pawlkhat hangin zong ihmu theilo leh ihmut cim theilo hikha thei ding hi.) Credit: Lucky Myanmar (Health by KAM) Agelh kik masa: RVA Tedim Chin Service