I khuapi zem ni ~ Rev. Thang Khawm Pau

I khuapi zem ni ~ Rev. Thang Khawm Pau

Tedim khua in Mangte teenna khua ahi hi, ci-in Cope topa’ laibu bawl sungah i mu thei hi. Leitung minam tuamtuamte ii khantoh ma in Mangte pen eite sangin ana madawk mahmah minamte a hi uh hi.Hih mite in leitung mun tuamtuam na la zo uh a, om nading mun le gam annek tuidawn alim theithei pumpi kisap bang teng, pumpi thahat nading, mit, guh, khuak, vun, ci le sa hoih nading cihte na zong uh a, ahoih tampi mukhia-in tua bangin gamta in nuntak khuasak zia na nei uh hi.

Tedim khuapi pen mualtung khua khat hi a, tuipi panin 5667’ sangin khua hun nop bek mahmah mun khat ahi hi. Leitung mun tuamtuam ah hih bang khuahun nop a nei mun le gam tam het lo hi. I gam sungah zong khuahun nop penpen mun khat hi gige hi.

2009 kumin World Vision pan Kawlgam nasepnate en dingin America pan Charles le azi Ernie te nupa Tedim khuapi hong zinpak uh hi. Azi Ernie in Tedim khuahun le a kim apam nuam sa lua mahmah ahih manin a pasal tungah, “Khualum hiahua Yangon ah na zumpi uh na koih uh sangin hizah a khuahun le mun nuam omna Tedim, Chin State ah bangdia koih zaw lo na hi uh hiam? Yangon pan Kawlgam sung mun tuamtuam na zin theih uh mah bangin Tedim pan Yangon le mundang khuate kizin thei lel hi lo hiam? Vanleng a tuang ding hi le hang tai 57 a gamla het lo mun pan kituang thei lua hi. America gam a i inn pan vanlengtual i pai tawh kibang lel hi. Na zumpi uh tuah huai sa mahmah ing,” ci tantan keei hi.

2000 kum ma deuh lai-in Japante mipil pawlkhat zong hong zinin, “Khamtung tengah teeng un la Kawlpi zaang teng na logam dingun kho le uhcin an na kham mahmah ding uh a, gamdangah zong puak zo lai ding hi uh teh. Khamtungah teengin mualdawn pan a hong luang luitui siangte dawn leng kua cina in tautau nawn ding ahi hiam, ci ngaungau uh hi.

Hizah a gam khangto mahmah gam pan a hong zin mipilte teen nopna “Mim bang i pianna Tedim khuapi nuam” Pasian hong piak a ithuai, apuah huai, azuun huai mahmah ahih lam phawk kik dih ni. Tua ahih manin i khuapi sung akilawm dingin kep siam ding, i zep siam ding leh zuun siam ding thupi mahmah hi. Thu nih kikum pak dih ni.

Khatna ah inn kim inn pam siangthosak ni. Mimal khat ciat in plastic tawh kitun nek theih van tunna tuamtuam, PK hawng, suaklu hawng cih bang ninte ninbung ah hoih tak pai ni. Utna peuhah i pheng paih ciangin kim le pam nitna piangsak ahih manin eimah mimal ciat ii vaipuak ahi hi. Ninbung tawh innkuan leh veng sung teng kipantah in hoihtak nin pai ding hi hang.

Nihna ah Kawlpi pan a van hong kipuaktote agent a sem tampi om ta hi hang. Tuate in laidal golpipi tawh vanzuak taangkona (Advertisement) suan dingin hong pia uh hi. Tua laisuante tawh Kam Hau lampi dung a inn mai khempeuh kidim a, athak tawh alui tawh kisuang deudau hi.

I inn lamziate hoih thei mahmah a, aza amel tuamtuam zutin etlawm thei mahmah hi. Innza kizat hun lai sangin tampi etlawm zaw tham ta hi. Ahi zongin atung a i gen laisuante in a hoihna leh a etlawmna kiamsak mahmah hi. Tuate pen ataktakin ei a innteekte met nading om het lo a, lai hong suangte met nading vive ahi hi.

A diakin tua bang taangkona laisuante pen sumzuakte met nading zu taangkona khawng bang tam mahmah hi. A taktakin inn maite ah hi bang laite suangsak het kei leng hoih zaw tham ding hi. Hih laisuante pen bang tawh kibang hiam cih leh melhoih mahmah khat biakinn ah kikhawm ding, mopawi pai dingin nikten puansilh a hoih pen tawh kizemin make up hoih pen tawh kithawi napi khedap gina lo ‘C kilehbulh’ abang niknek zawzen khedap ka gawp ataw avang khin khat bulh sa a inn sung pan hong pusuak tawh kibang hi.

Tua ahih manin lamdung a innte leh sumbukte pen laisuante tawh kidimsak kei leng hoih mahmah ding hi. Gamdangte bangin i inn kawmte tungah “Stick no bill (Kyawnyar ma kat yah)” ci leng hong kisuang tantan ngam sam lo ding hi. A suang nuam teiteite in akhuam tawh atuamin asuan ding uh hi lel hi.

Innteekte mah athupi pen ihih manin khuapi hoih nadingin eimau ciat in kemin puahin zuun ciat ni. Hehpihna tawh i TEDIM khuapi zeem ni. Rev. Thang Khawm Pau