Hosanna ~ Samuel Mung Suantak

Hosanna ~ Samuel Mung Suantak

TEXT: Matthew 21:1-11; Psalm 118:25-26 – Buaina haksatna tampi kawmkalah Nisuh nipi cidama hong musak a vangalian i biak Pa Pasian tungah lungdamna ko masa hang. Tuni i omomna panin Pasian kammal mah tawh tha la khawm dingin i kicial hi.

Leitungah gualzawhna nam nih om hi. Khat pen thauvui thautang leh thatang hat thu tawh gualzawhna ahi hi. Hih bang a gualzote mite in kihta uh hi. Gualzawhna nihna pen kiniamkhiatna tawh thumaan a gualzawhna ahi hi. Hih dan a gualzote pen miten in itin zahtak uh hi. Topa Jesu in leitung hong vak lai-in gualzawhna a ngah nadingin a nih tuaktuakin zang thei napi a nihna pen hong tel zaw hi.

Ha tangin-ha zat nading mun ah min na pang langkhat hong betsak leh a langkhat lam zong na dawh zaw in cih siksanin nei hi. Napoleon in kei leh Alexander in namsau leh teipi tawh leitung ka zo uh a Topa Jesu in itna tawh leitung zo hi a cih pen maan mahma hi.

Hosanna a khiatna

A kammal hong kipatna Hebru kam panin hi a, Late 118:25 ah “hong honkhia in” ci a thumna leh phatna in zong a kizang khawm thei kammal ahi hi. Hih Late 118 pen lametna la leh gualzawhna la hi a, Paisan pawi sim dingin Jerusalem ah hong pai kawmun a sak ngei zel uh ahi hi. Hih la pen Topa Jesu tungah mipite in a sak uh ciangin amaute honkhia dingin singlamteh tungah sihna a thuak ding thu pulakna ahi hi. Lungdamna Thu (gospel) sungah guk vei kizang a, Topa Jesu Jerusalem ah a lut ciangin mihonpite’ kikona aw ahi hi (Matt. 21:9, 15; Mk. 11:9-11; Jn. 12:13). Hih lai ah Topa Jesu phatna ahih kei leh pahtawina-in kizang zaw hi.

Hosanna nam nih

Hosanna nam nih pha hi. Khat pen phatna leh a dang pen thumna, ngetna ahi hi.

Phatna Hosanna:

Hih lai a Jesu nung a zui mihonpite pen Jerusalem ah Paisan pawi sim ding in Galilee kuam sung pan hong paite ahi uh hi. Amaute in Galilee ah Jesu na lamdang bawlte na tel mahmah khin uh hi (Lk. 19:37).

Thuumna Hosanna

Bang hangin hih mite “hong hon in” ci-in kiko uh hi ding hiam? Ei leh ei I kipanpih zawh nawn loh ciangin midang hong hon thei ding kisam hi. Tua bang mite pen ei sangin a thahat zaw, a vanglian zaw, a pilzaw hiam khat ahih teitei kul hi. Jew miten zong a hun zui-in amau hanciamna tawh helna (revolution) na bawl zelzel uh hi. Ahih hangin tua in lungmuanna sawt daih zo ngei lo hi. Jesu nungzuite lak a khat bang “gamkhualpa” (zealots) na hi kha liang hi. Thu nam thum ah Jew te in nakpitakin netcipna na thuak kha uh hi: kivaihawmzia (Politics,) Ngeina (culture), leh Biakna-pau le ham (religion/language).

A thunung (historical background)

Bang hangin Jerusalem mihonpite’n “Hosanna” cihna tawh Jesu na muak uh hi ding hiam? Lai Siangtho siamte’ genna panin Thuciam Lui a kigelh khit a kipan Thuciam Thak hun kikal kum 400 tang (c. 432-5 B.C.) kia hi. Hih pen “Intertestamental period or silent years” na ci uh hi. Hih hun sungin thu leh la (events, literature, social forces) tampitak piang ahih manin Thuciam Thak tawh kizopna tampitak om kha hi. Hih thupiangte in Judah mite tangthu, Pasian Thu-upzia tampitak na khel hi. Hih thupiangte leh updan thakte in Thuciam Thak adingin kingakna thupitak piangsak hi.

Kivaihawmzia (politics)

Hih kum 400 sungin Palestine pen ukpi nih: Greek-te leh Rom-te ukcipna hakkol ah gentheih haksatna nakpitakin thuak uh hi. Judah mite pen amau deihtelna om ngiat lo-in ngeina dang (culture), Biakna dang, leh kivaihawmna dang (politics) te’n aana tawh zuih ding na kivaihawm khum hi. Pawlkhatte in amau a ukcipte thumang uh a, pawlkhatte in a sih dongun na do uh hi.

Hellinization: Alexander the Great pen 356 BC in suak hi. Kum 13 a phak in Athen philosopher Aristotle nuai ah pilna na sin ngei hi. Kum 20 a cin kum 336 BC in Macedon (tu hun Greece leilu lam) kumpi gam na luah zo hi. Greece gam panin India dong leilu lam ah Armenia leh Arabia leh Egypt dong na huam zo hi. Ama ukna gam sungah mi tuamtuam, tawndan ngeina tuamtuam tampi om hi. A ukna gam peuhpeuh ah mi tuamtuamte a huaikhop zaw nadingin Greek ngeina le tawndan nakpitakin sinsak hi. Hih Greek ngeina leh ngaihsutna thute pen ‘hellenism’ kici hi. Greek ngeinate picing mahmah ahih manin namdang ngeinate manlangtakin dep zo hi.

Ngeina (culture)

Jerusalem a om Judah-te ban ah gamdang a pemte zong Greek ngeina leh tawndante in na deep zo mahmah hi. Greek ngeina zuihna pen Judah mite biakna adingin tona lianpi suak hi. Judah khangnote zong Greek ngeina kimawlna ah kihel nuam uh hi. Hih kimawlna pen guaktang a kimawlna ahi hi. Tua in Judahte’ vun at ngeina pen nuam mawhsak mahmah hi. Hih thute hangin Judah mi tampitak in Greek-te kizep bang leh amau biakna zuihpih ding lunggulh lawh uh hi.

Biakna (religion)

Antiochus Epiphanes in Jerusalem hong uk ciangin 167 BC in hi bangin thupiakna hong bawl hi. (1) Jews te pen a pu le pate ngeina tawh kituakin a gamtat nawn loh ding uh (2) Meihal biakpiakna a piak nawn loh ding uh (3) Pawi a kham nawn loh ding uh (4) Naupangte vun at nawn loh ding (5) Kuamah in Sabbath tan nawn loh ding, cihte ahi hi.

Antiochus Epiphanes in Greek pasiante Palestine gamsung khempeuh ah tun ding thupia hi. Judah mite in tua pasiante mai ah biakna a piak ding uh; a ut lote kithat ding. Tua bek hilo-in Judah mi tampitak zong aana tawh voksa kinesak hi.

63 BC panin Rome te thunuai ah hong om kik uh hi. Tua hun a kipan Judah mite pen a banbanin Rom ukpite Pompey, Antipas, Herod the Great, Archelaus a banbanin hong kilaih toto uh hi. Gen zawh loh haksatna tampi Judah te adingin piang toto hi.

Judah minamte adingin kumsawt hai bang a ngak uh Messiah pen a ngaklahhaui tham mah ahi hi. A haksatnate uh hicizaw deuh leh cih nading om nawn lo-in sa lam kha lamah thuak kisa mahmah ta uh hi. Judah mi khat adingin bel Lai Siangtho in a ciam, a genkholh amaute a honkhia dingpa pen ngaklah loh theih loh, “hosanna” ci a kiko loh theih loh ahi hi.

Hosanna ci a tangkote sung panin ei koi pen ah I om kha hiam? Jesu tawh kituak a ama tung panin damna leh suahtakna a nei khin mi na hih leh nang a dingin “Hosanna” pen Pasian tung ah phatna pahtawina hi ding hi. Ahih hangin nang deihtelna ahi lo koltangna sung a om lai na hih leh “Hosanna” pen Topa ka saltanna panin tuni in hong gumkhia in cihna hi ding hi.

Thukhitna

Tuni in hotkhiat kisam I cihte pen amau leh amau a kihon tawm thei lo saltanna a nei mite ahi hi. Saltang I cih ciangin ei deihtelna hong kidong ngei lo ding hi. Hong nei khat om cihna ahi hi. Tua ahih manin tua hong nei pa’ thu lo-in bangmah kisem thei lo hi.

I saltanna mun uh kibang hetlo ding hi. Natna sal a tang, zongsatna hoih lo kol a tang, kikhop thadahna kol, lim hoih lo/kihhuai etnopna/zongsatna (Pornography), social media etc.

Judah mite in zong Topa Jesu tungah “HOSANNA” (Tu mahmahin hong honkhia in) ci-in nakpitakin a awt ngeingai bangun I saltanna tek panin I suahtak theih nadingin hong honkhia dingin Topa Jesu limtakin I sap ding uh ahi hi. 1 Korinth 6:20 ah “Note pen Pasian in hong leisa na hih manun na pumpi uh Pasian minthan nadingin na zang un” ci hi. Hih lai a kizang “lei” cih kammal pen agorazo kici a, nidang lai-in sila zuakna phual (Slave market) panin sum tawh a kilei silate genna kam ahi hi. Tua mah bangin Khrist in zong thu-um mite sila kizuakna phual, mawhna phual panin a suakta mi hi tawntung dingin hong lei hi (1 Kor. 7:23; Gal. 3:13). Samuel Mung Suantak