Hanciamna i cih in bang ahiam

Hanciamna i cih in bang ahiam

Pilna i cih pen mun khempeuh pan kingah thei hi. Ahi zongin mun khempeuh pan pilna a ngah thei ding, mun khempeuh ah pilna a mu thei ding le a zong thei ding mi tam om lo hi. Tua ahi manin, mikim adingin mun khempeuh ah pilna a om lo tawh kibang hi.

Pilna thu a kigen ciangin mi a tam zawte mitkha ah mite zahtak mahmah, mite muan le suan, pilna sangpipi a sinte le gam makai, minam makaite, siavuan mangpite le vanzat na hoih tuamtuam a bawlsiamte pilnate bek pilna dan bekin kingaihsun kha pahpah thei hi. Ahi zongin pilna i cih in tua bangpipite bek a huam na hi peuhmah lo hi. A beisa hun a hoih na sak loh na kammal zat khat na kipuahphatna zong pilna mah hi a, a hoih a pha khatpeuh kipuahphat ding le kisin ding na sawm denna zong na pilna, na thumuhna khat hi pah hi.

Mihingte khat le khat i pil dan i siam dan kibang loin a tei deuh, thu a thei baih deuh, a tuam pian kiom sese hi. Ahi zongin tuate pen hamphatna khat hi lel a, ngahsutna maan lo, mihaite lo buang mihingte khempeuh a kibang khin ahi hi. Mipil misiamte in thu a gen uh tak ciangin lungkiatloh ding le hanciam ding a kammalte sung uah helh in gen tangtang thei zel uh hi. Ahi zongin “Hanciam” cih kammal ii deihna mikim in tel kim lo uh hi. Hanciam i cih ciangin mi pawlkhat in thatang tawh hanciam ding sa uh ahi manin, nakpitakin nasem uh hi. ahi zongin a sepna zahun lawhcing lo uh ahi manin guallel in khakun kik pahpah uh hi.

hanciam cih kammal in lungkia lo ding cihna hi a, lungkiatloh ding hanciam masak pen ding kisam hi. Mihingte sungah a lungkia thei lo ding mi tawm mahmah hi. Ahi zongin a gualzote sungah a lungkia baih mi om lo hi cih i theih ding thupi mahmah hi. Abraham Lincoln in, ” Gual lel a na puk ding hong dahpih keng, ahi zongin na kiphot kik zawh loh khak ding lunghimawh zaw ing,” na ci hi. Bang hang hiam cih leh mihingte in zual zawhna kingah nuam mahmah napi, tua gualzawhna a pian theih nadinga kibawl guallelhna, gentheihna tuamtuamte a nawk khak uh ciangin pukin tho zo nawn lo uh ahi manin, a guallel suak pahpah uh hi.

Lungkia lo a hanciamna khat sim khat sim ah hamphatna khat ciat kikoih hi. Ahi zongin tua hanphatnate khatkhat in hong pai pahpah lo thei hi. A hun a tun ciangin a lom a tangin hong pai thei ahi manin, hun pia-a ngak ding a kisapna mun na om hi. A ngakzote’n thupha ngah kici hi lo a hiam!

(Lungkiatna le gualzawhna ton khawm thei ngiat lo hi.)

Lungdam
Job Cinpi
Zomi laisim nuamte