GZA pan lungdambawl thupha paihna

GZA pan lungdambawl thupha paihna

Leitung mun tuamtuam a om kong it uh Zomi akua mapeuh: Christian (Tapidaw) ta dingin athupi pen Lungdambawl hun hong tungkik ding hita hi. Ei Zomite i vekpi phial in Christian (Tapidaw), anungta Pasian thu um te ihih manin Lungdambawl pen Zomite’ pawi lian pen khat zong kici thei hi.

Leitungbup pulnatna (Covid-19 pandemic) hangin tukum Lungdambawl pen kumdang bangin pawlpibup in ahi zongin, innkuankim in ahi zongin suakta takin bawlthei khollo kha thei hihang. Bangbang hileh, Zomi u leh nau akua mapeuh in na omna tek uh ah khiatna nei tak leh lungtai takin Lungdambawl azang thei veve dingin kong lam-en uh hi.

Leitung mawhnei mite tankhia dinga Pasian taktak ahi i Topa Zeisu in leitungah a lu hong ngak ni pen leitung a ni thupipen ni ahi hi. Leitung mi khempeuh tankhia ding a hong pai ahih hangin leitung mi atamzaw in sang lo in nial uh hi. Tua kawmkal ah, Pasian hehpihna tuam vilvel in ei Zomite in i sangkha a, tua Tanpa leh atatkhiatna sang thei, um thei ihih manin leitung minam khempeuh lakah thupha ngah minam taktak ihi hi.

Anungta Pasian leh atatkhiatna thu sang thei bek zong hi loin, tua tatkhiatna lungdamna thu atangkokhia dingin Pasian in hong teel sawnsawn hi. Pasian zat minam ihi hi. Tukum Lungdambawl hunin Topa tungah lungdam ko ciat ni.

Topa Zeisu leitungah kilemna bawl dinga hong pai ahi hi. Mihingte leh Pasian hong kilemsakkik hi (Rm.5:10). Judah mite leh Gentile mite pumkhat hong suak sak hi (Eph.2:11-16). Zomi khempeuh kilem a pumkhat suah ding GZA i bulphuh lianpen ahihna tawh kizui in tukum Lungdambawl hun a kipan mailam ah Zomite kithutuakin, kipumkhatin, khut kilen a i kalsuankhop ding zong i kihanthawn nuam hi. Tua banah, Topa Zeisu, a bukim nuntakna pia dinga hong pai ahi hi (Jn. 10:10).

More: GZA: Kawlgambup ki teelpina tawh kisai tangkona

Zomite a bukim khantohna, a bukim nuntakna neih ding zong GZA i lungtup khat mah ahi hi. Tua ahih manin, tukum Lungdambawl hun a kipan hong tung ding hunte ah Zomite a bukim nuntakna nei dingin Topan hong siam tahen cih i thungetna leh i ki-aapna hisak ciat ni. Lungnop khamuanna hong pia dinga hong pai i Honpa in tu laitaka i tuah pulnatna sungah Zomi akua mapeuh lungnop khamuanna kicing hong pia tahen.

Leitungbup aom Zomi khempeuh tungah anuam mahmah leh khiatna nei taktak lungdambawl ahi zongin, daupaina leh gualzawhna tawh kidim kumthak ahi zongin hongtung tahen! Immanuel sungah, GZA Central Committee