Galpi Khatna hun sunga Nalamdang piangte

Galpi Khatna hun sunga Nalamdang piangte

Kidona pen lipkhap huai in thu leh la zong hau hi.Kidona khat peuh ah nalamdang gen ding om nuam diak hi.Leitung galpi khatna hun lai in zong nalamdang pawlkhat om hi.Leitung galpi khatna huna minthang mah mah khat pen ‘Battle of Agincourt’ ahi hi.Kum 1914 a Mons, Agincourt muna Germany galkap leh British galkap te kikap na mun ahi hi.Tua tungin British galkapte vantungmi ten huh ahihmanin ’Angels of Mons’ kici hi.A gengan un Germany galkap ten British te umcih ta uh hi.Amau adinginmanawt ding haksa ta hi.Tua ahihmanin a nungtawlh uh hi zaw ta mai hi.Mikim patau in lauthawng mah mah uh hi.

Tuabanga dahna tawh a om laitak un British leh germany te kikal ah mi siangtho St.George leh a vantungmite hong kilaak uh hi.Teipi leh thal khawng tawi uh hi.Tua vantungmi ten Germany galkapte leh delh uh hi.Tua ciangin British ten zong amau lamah Pasian pang cih um in hong thalawp uh hi.Hangsan takin Germany galkap te delh mang thei uh hi, kici.Mi pawlkhat in hih pen phuahtawm hi ci uh hi.Tangthu phuahtawm ‘The Bowmen’ kici Arthur Machen-ii’ gelh pana kila sawn hi dingin ummawh uh hi.Tunai in hih tawh kisai sincianna kinei hi.Hih pen The Bowmen’ laibu kigelh ma nangawn in Mons a galkap om ten gen ngei uh cih kithei.Tua laibu gelhpa in hih thu pansan a, a gelh hih tuak zaw hi.Hih dan mah in France galkap te zong Joan of Arc leh a pawl ten huh cihdan khat kigen ngei hi.

Leitung galpi khatna hhhun laia British leh France galkapte laka thang mah mah khat pen ‘ Comrade in White/ The White Helper’ kici hi.Mi khat puankang tawh kizem in galkap a liam a tangzo nawnlo tem un muanhuaina lamah paipih hi.Amah pen mangkik pah zel hi.Mi tampi ten Jesu a taka hong kilaak danin ngaihsun uh hi.Kum 1915 in British galkap khat a khe a nihin melma ten kapliam uh hi.Amah bomb puahna mun kuakah awk(taang) hi.Taikhia thei nawn lo in a cimawh hi ta hi.Ahizongin puankang silh mi khat in va honkhia hi.Thau tang leeng ziah ziah kalah mun muan huaina tunpih ziau hi. Tua galkap pa in tuazah a tam thautang in a khakloh pen lamdangsa hi.Tuabanah amau Regiment lak pana a lian pen pawl amah thazawh taka a puak ziau pen lamdangsa hi.Mun muan huaina a tun ciangin puankang silhpa mang ziau hi.

Canadian galkap Corporal Richard-zong Germany galkap ten man uh hi.A guk in taikhia thei hi. Km 300 val a khe tawh pai in Holand gamgi va tung hi.Tua laiah lamka nih na om lian mawk hi.Lampi khat zaw pen Holand lam lutna hi in, a khatzaw pen Germany lam lutna ahi hi.Richard in koizaw zui ding cih thei siam lo hi.Holand gam lutna hi dinga a ummawh pen zui risk ziau hi.Gamla zong a pai ma in a mai ah a unaupa hong kilaak hi.A unaupa in” Lam khial hiteh, a khatzaw zui in” va ci in mangkik pah hi.Tuaciang Richard kileh kikin a khatzaw tawn in Holland gam cidam takin tung thei hi.Inn a tunciang a unaupa kiangah a gen leh a unaupa in bangmah thei kha lo hi.

British nungak khat in zong a cousin kidona-a si a mumangin mu zel hi.A cousin in a ‘tie-pin’ pen a zi dinga a khamnu kiangah pia nuam hi.Tua nu min leh address pen van lakah om cih gen hi.Ahizongin tuapa’ innkuanpih ten tuabanga zi ding khamsa a neih lam theihpih lo uh hi.A van a phel tak ciangun a zi ding a a khamsa min leh address leh a ‘tie-pin’ van lakah na om takpi mawk hi.

British Naval Officer khat ii’ zi Mrs Pownall in leitung galpi khatna hun sunga thupiang dingte mu khol thei hi.Kido na ah leitungin a lam-et hetloh Turkey gam zong kihel ding cih genkhol hi.A pasal Gallipoli a sihding thu, Germany ten Zeppelin zanga London a bomb ding thu, British submarine tui sungaa a tum ding thu, Silvertown-a puakthei bawlna mun puaktam ding cih khawng zong mukhawlin gen khawl hi. Hih a genkhempeuh piang takpi cih Society for Psychical Research(SPR) ten proved uh hi.

August 1915in Zealand Army galkap 22 ten British Army First Fourth Norfolks Battalion te meipi lamdang mah mah pongmoh tawh a kibangah a lut laitak uh mukha hi.Tua meipi tawh amau teng khempeuh a vek un mang uh hi.A takpi maw zuau cih zong theih haksa ta hi.British writer khat Paul Begg in a thu kan hi.A kan khiat theih ciang pen First Fourth Norfolks Batallion ten kido tawp dawngin galkap zong tam si lua lo in pangzo uh hi. First Fifth Batallion te bel galkap tampi a omna uh kithei lo in a kan ciangun advance party teng germany ten na that mang khin uh hi.Tuate Turkish Lines lamah phum cip uh hi.Hih thu huhau teng tawh a kithei cian khollo thu tuam tuam tampi om hi.

Pau Tun Thang