USA gam, Georgia State, Atlanta khuapi a teng Rev. Dr. Lien Cin Khup Taithul Kum 80 in abeisa January 08, 2017 ni zanlam nai 10:00PM hunpawlin Motor tuahsiatna hangtawh lipkhaphuai leh dipkuathuaitakin a leitung nuntakna ongbeisanta cihthu izahmanin Zomi Innkuan USA kipawlna in nakpitakin kidahpih, ki lainatpih hi.
Rev. Dr. Khup pen Zogam, Lamka khuapi a teng hi-in Pilna sangkan sinnopna hangtawh abeisa 2003 kumin USA gam ongtung ahihi. leitung a nuntaksungin Pilna deihmahmah ahihmanin sangminthang tuamtuam ah kahkawikawia gualzawhna tampi ongngah hi. Zomi leh Zogam it mahmah khat ahihmanin a tuntunna ah Minam kipawlnate ah ahihtheihzahin ma apangden Makai muanhuai mahmah khatzong ahihi. a nuntakna a beidong, a hutawpna asankhiat dongmah Pasian gamleh Minam adingin ma apangden makaimuanhuai mahmah khat in hicibanga ong nusiat vatmawkpen a innkuanpihte bek supna hilo in I Zomi bupa supna lianpi khat hicih Zomi Innkuan USA kipawlna in kiciamteh hi.
I it, I zahtak mahmah Rev. Dr. Khup Taithul pen USA leitangtunga ong nusia Zomi laizom khat ahihna tawh kizui-in Zomi Innkuan USA kipawlna in Paakkual khattawh Mangpha khakna kinei ding hi.
I siapa tawh a nunungpen hunzatkhopding pen ong tungding January 14, 2017 (Sat) ni-in Memorial Dr. Prebyterian Church, 5140 Memorial Dr, Stone Mountain, GA 30083 ah 12:00PM hunin amahtawh a nunungpen hehnephunbawlna kineidinga tuakhitciangin Floral Hills Funeral Home & Cemetery, 3150 Lawrencesville Hwy, Tucker, GA 30084 ah a luanghawm vuina, daitansakna kinei ding hi.
Related: Malaysia akithat Kawlgammi 5 te vaitawh muanmawh mi 15 kimanta
I it mahmah Rev. Dr. Khup ong nusiatna hanga adah akap, a lungleng khuangai a suan akhakteng leh Tanau meltheih akua mapeuh tungah ibiak Vanglian Pasian khasiangtho in aluang khituite ong nulsakhenla lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.
Dahpihna lianpitawh,
Executive Committee
Zomi Innkuan USA, Inc.
January 13, 2017
Comment piaknop aomleh...