Cingno tawh lenna gam – 3 ~ Hau Za Cin

Cingno tawh lenna gam – 3 ~ Hau Za Cin

Hello! Cingno maw… tuazah maw le… :: Nitak an ka nek khit uh ciang ka holim laitak un melmuhloh tongsan hong ging a, Nu Haukhek in “Hello” ci a a hopih khit ciangin kei lam hong mit-hem giaugiau a, tua tak ciang lawmngai ngeite kiho bangin kei hong hopih nuam khat hi ngel ding hi ciin theisiam pah hi.

Ka upna a takpi na hi a, ka khut ah ka tawi khit ciang, “kua a?” ka cih leh Nu Lun hi, hong ci a, “Ngaih Anglai Ah Niangbawi nu pen hi,” hong cih khit ciangin, “aw thei lua ing ei” ciin ka bil ah koih to in ka muk pan, “hello, Niangbawi nu maw?” ka cih leh, “hi mah ing ei” hong ci a, “a na nuam khin khian si ing e maw” ka cih leh aman zong theisiam pah ahih manin ka nih un khitui kaai liangin ka nui thapai uh a, ka kihona uh ka zomkik pak thei kei uh hi.

Ngaih Anglaite lenna gam ahih manin Ngaih Anglaite cih dan i zatsiam kul hi. Ngaih Anglai Ah te kammal zangsiam kei leng pilna sin nuam laikung tawitheilo, football kimawl ding tukpeng sui theilo tawh kibang ding hi.

Cidam a nong tun lungdam ei. Zingciang kikhopna ah kimu ni ei. Kikhop zawhciang Khuado zong kizang suak ding hi a, nuamtak in zangkhawm ni e ci a NU banga hong hopih ciauciau ciangin ka inntek hanhan a, Zomi Innkuan mi khat ka bang pah hi. A zingciang hun dingte ka ngaklah mahmah hi.

Tua banga lum dinga ka kithawi laitak uh phone hong ging leuleu a, nupi te pau leh ‘hong hopih leh ka cih pen’ hita hi, ci pah mai ni. A birth-day ni a ka hopih lai mah bangin a aw nem a, a awsuah ngaihbangin, i duang hong zen hi. …zop lai ding… Dr. Hau Za Cin (Phuitong Liim)