Cimphawng simding ~ Sermon leh Meh

Hi thuzui u le naute ih damdam mah hiam? Na man uh leh anui a nong sim sak vevua… cimphawng..

Khat vei thu um mikhat in pawlpi thukizakna (Tadensa) editor pa kiangah lai at in, lungkim lohna thu pawlkhat mitampi sim theih dingin hong pulak khia hi. Tua a laikhakna sungah nipi sim in a kikhop hang ki lamdanna/pianthakna a omloh nathu hici bangin at hi:

001joke “Kum 30 sung nipi sim in biakinn ka pai den a, sermon 3000 val ka za/ngai khin ta hi. Ahizongin bang thu teng kigen hiam cih hong kidong leh kagen thei nawn kei ding hi. Tua ahih manin kei ading hi taleh Pator pa ading hitaleh bangmah phat tuamna om kasa kei a, hun mawk bei lel kasa hi.”

Hih lai a simkha khempeuh in zong a thukim hetlo pawl khat a om tei hangin a thukim mahmah pawlkhat zong na om a, khat leh khat kinial ngeingai hih tuak hi. A tawpna ah khat in anuai a bangin hong at kik a, kinialna zong hong bei pah lian hi.

“Zi kaneih zawh kum 30 pha ta hi. Ka zineih akipan tu ni dong ka zi in meh nam 32,000 hong huan sak khin ta hi. Ahizongin tua mehte in bang meh hiam hong kidong leh kagen thei nawn hetkei ding hi. Ahi zongin ka gen theih khat om hi. Tua in, ka zi hong huansak meh te khempeuh pen a lim banah, cidam na tawh kituak vive hi a, na kasep zawh nang thatang tampi hong pia hi. A zenzen in kazi in tua bang mehlim te hong huan saklo hi leh tuni dong ka nungta kei ding hi.”

Tua khit zawh bangmah kam kinial na kiza nawn lo hi.

Akai khawm,
Fr. Raphael Khuppi
Manila