Christmas bangci dawn ding?

Christmas bangci dawn ding?

Christmas hong tungding hita a Pasian’ thu-um tawh a umlo tawh adawn ding in kithawi khengkhangh ta hi. Nang bangci dawn ding na hiam cih kathei kei hi. Ahi zong in nang zong hoihtak phatak in dawn thei na hih lam kong gen nuam hi. Na dawn dan ding ih gen ma in kei’ dawn dan ding hong gen masa nuam ing.

Tuni (December ni 3) ni nitak in kawlte’ phungpi ahi Magway lam zuan in kapai ding hi. Ci adam leh ni 4 ni ka zing tun ding hi. Magway a Sia Pauboih (Ling Thuk) kep naupangte zanvak lapawl (choir) kahilh ding hi. Tua kazawh khit uh ciang un kawlkhua 10 val ah zan kavak ding uh a naupangte lasa sak in ken ka siam tawp in Lungdambawl thu kagen ding hi.

December 12 – 14 kikal Magway gambup a om thu-um miteng kaikhawm in omna leh nek le dawn leh lamsap sik in thusinna leh khanlawhna khawmpi ka bawlpih ding uh hi. Kyats 2.5 million bei ding in ka ngaihsun uh a mi khat in teng 5 ta kakhia ding uh hi. Ko avaihawm mi 5 kahi uh hi.

December 20 ni zan lam Zangkong khuasung a mizawng ninbung sawkte tawh Zeisu’ Suahna ka dawnkhop sawm uh hi. Sangkahpih lawmte tawh sum kidong in nik le puan leh nek le tak pawlkhat letsong piading in Zeisu’ itna thu gen ding ci’n ngaihsun ung.

Tua khit ciang in Zogam a amialpen mun khat ahi Tuipi khua kapai nuam hi. Zomi MP te tawh ka pai nuam hi. Amau tua hun in hong man theih kei ding uh leh lah kumsial ka paidetna mun ahi Shan gam lam kapai ding hi.

Nang bangci dawn ding ?

Zeisu mihing bang a hong suah pen hong itluat man ahi hi. Lungdambawl ih cih pen “Itna Khahkhiat Hun” hi. Sum neih loh hang ki dawn thei lua hi. Na itna kisam mi tam mahmah hi. Na maisak ding mi tampi om hi. Kuamah khih nawn kei in. Khahkhia ta in. Mi na khah khiat leh nang zong na suakta ding hi. Na ci hong dam ding hi. Khatvei hong genpha lai ning. Lungdambawl ih cih pen “Itna Khah Khiat Hun” hi. Lungdambawl abawlkhawm ding in itna tawh kong zawn hi.

Zeisu’ suah lungdamna nang leh na innkuanpihte’ tung ah hong tung hen la, Ama’ suahna tawh hong kenkhop lungnop suahtakna, cidamna, mapaina, khansauna, hauhna leh nopsaknate tuni a kipan nang’ a hingiat ta hen. Amen! Lungdambawl Thupha ! Nong-it (Mung Laan Thang) Zangkong